Иегованың киречілерінің хада Библияны ӱгренчетсер, сірер ӱгредіге азынада тимненерге кӱстенче поларзар. Ідӧк ӧме чыылығларына тимненерге кӱстенерге кирек. Сірер аны сыбыра идерге ӱгрен парзар, чахсы поларҷых. Андада анзы маңат салтарлар ағылар.

Хаҷан паза хайда тимненердеңер сағынып алыңар. Хайдағ туста сизіктіг ӱгренерге сірерге оой арах полча? Иртен иртӧк, тоғыс пастир алнында? Алай орай иирде, палалар узупчатсалар? Ӱр тимненерге киліспезе дее, ол кирекке нинҷе тус таап поларзар пӧгіп алыңар паза ол туста пасха нимее хайииңарны айландырбасха кӱстеніңер. Сірерге пір дее ниме харығ полбас, сым паза амыр чир таап алыңар. Радио, телевизор паза мобильнай телефонны ӱзӱр салыңар. Ӱгренер алнындағы пазырыс прай сағыссырастарыңны хыйа сал саларға паза Худайның Сӧзінеңер ле сағынарға полызар (Филипптегілерге 4:6, 7).

Материалны істезіп алыңар паза чыылығда аралазарға сағыс тудыңар. Пастап материалнаң танызып алыңар. Статьяның алай пастағның адынаңар сағынып алыңар. Хайди полған на подзаголовок ӧӧн теманаң палғалыстығ полчатханнаңар сағынып алыңар. Ӧӧн сағыстарны іле кӧзітчеткен хоостарға паза сағысха хатап кирҷең сурығларға хайығ салыңар. Аның соонда полған на абзацты хығырыбызыңар паза алтында пирілген сурыға нандырығ таап алыңар. Скобкалардағы библейскай стихтарны азып хығырып алыңар. Хайди пу сағыстар материалнаң палғалыстығ полчатханнаңар сағын кӧріңер (Илҷілернің 17:11). Нандырығ сағынып алып, постарыңның нандырығларыңны табырах сағысха киріп аларға полысчатхан нинҷе-де ӧӧн сӧстерні алай сағыстарны абзацта алтынаң сиип таныхтап салыңар. Андада чыылығда холыңарны кӧдіріп, постарыңның сӧстеріңнең хысхаҷахти нандырығ пир поларзар.

Неделя сай чыылығларда ӱзӱрілчеткен аймах-пасха темаларны істезіп, библейскай пілістеріңнің ис-пайына наа сағыстар хозып одырарзар (Матфей 13:51, 52).

• Хайда паза хайдағ туста сірер чыылыға тимнен поларҷыхсар?

• Хайдағ тимненіс чыылығда чахсы комментарий пирерге полызар?