Иисус чазых чох толдыра кізі полған, аннаңар, ирееленчеткен кізілернің кӧбізі чіли, чуртабаан. Іди дее полза, ол кізілерге уғаа тың айаан. Ол, кізілерге полызар ӱчӱн, прай кӱзін салҷаң. Нинҷе кирек полчатханынаң даа кӧп итчең. Ол кізілерге айаан, аннаңар оларға полысхан. 32, 37, 57, 99 пастағларны хығырып, Иисус айап тудынғаннаңар сағынып алыңар.

Иисус, улуғзырапчатхан паза маң чохтанчатхан кізі чіли, тудынмаан. Аннаңар чииттер дее, улуғланыбысханнар даа андар тартылғаннар. Иисус кізілерге кирегі халбин тудынмаҷаң паза кізілерге аннаң хада чахсы полҷаң. Анзын 25, 27, 95 пастағларны хығырып, сизінерге чарир.

Иисус чалғызан даа полза, Худайға киртінчеткен кізілернің аразында даа полза, прай чӱреен азып, Пабазына удаа пазырҷаң. Ол азыранар алнында ла нимес, хайдағ даа киректерде Пабазынзар айланҷаң. Иисус Пабазын алғыстаҷаң, сабландырҷаң паза аарлығ пӧгіннер алар алнында, аннаң устағ сурынҷаң. Хайдағ киректерде ол пазырғаннаңар 24, 34, 91, 122, 123 пастағларда хығырып аларға чарир.

Майых парған даа полза, Иисус пасхаларына полысчаң. Ол позынаңар ла хаҷан даа сағынмаҷаң. Анзында ол піске кӧзідім полча. Иисус, позына айанмин, пасхаларына полысханнаңар 19, 41 паза 52 пастағларда пазылча.

Иисус пасхаларының пыроларын тастирға ӱгреткен паза позы даа ӱгренҷілерінің паза пасха даа кізілернің пыроларын тастаҷаң. Хайди Иисус пыро тастааннаңар 26, 40, 64, 85 паза 131 пастағларда чоохталча.

Иудейлернің кӧбізі Мессийнің соонҷа парбастар паза аның ыырҷылары аны ӧдірібізерлер тіп ухаанҷылалған. Аннаңар кізілерге полызар ӱчӱн, прай кӱс саларға кирек тее чоғыл тіп пілдірген. Че Иисус нымысчыланыс тоғызына прай кӱс салған. Кізілер Худай сӧзін истерге хынминчатсалар даа паза ӱгренҷілер тоғырланысха урунчатсалар даа, хайди прай чӱреенең нымысчыланарға Иисус кӧзідім артыс пирген. Аннаңар 16, 72, 103 пастағларда хығырып аларға чарир.

Иисус чазых чох, толдыра кізі полған, аннаңар ол олаңай кізілердең хай-хай хыйға паза кӱстіг полған. Андағ даа полза, Иисус кізілерге пазымнығ нымысчыланған. Хайди Иисус пазымнығ тудынғанын 10, 62, 66, 94, 116 пастағларда таап аларға чарир.

Иисустың илҷілері паза пасха даа кізілер ол ӱгреткен нимелер хоостыра тудынмаан ползалар даа, Иисус оларға тыстаныснаң хайҷаң. Иисус оларға Иеговаа чағдирға полысчатхан сағыстарны тыстаныснаң нинҷе-нинҷе хати ӱлескен. Иисустың тыстанызынаңар 74, 98, 118, 135 пастағларда хығырып алыңар.