10-ҶЫ ПАСТАҒ
Иисус айналардаң хай-хай кӱстіг
ХУДАЙНЫҢ ангеллерінің пірсі ноға Сайтан Дьявол пол парғанын пілчезің ме? ~ Ол позының хынығыстарының соонҷа пар сыххан, аннаңар Худайдаң тоғыр кӧдірілібіскен. Ол ағаа пазырзыннар тіп хынған. Сайтанға пасха ангеллер хозылғаннар ба? ~ Я. Библияда олар Сайтанның ангеллері алай айналар тіп адалчалар (Азых чоох 12:9).
Ол хомай ангеллер алай айналар Худайға киртінчелер бе? ~ Я, хайди Библияда чоохталча, айналар Худай парына киртінчелер (Иаковтың 2:19). Че ам олар, хорығып, тітіресчелер. Прай иткен хомай киректер ӱчӱн Худай оларны хатығлирын олар пілчелер. Олар хайдағ хомай киректер ит салғаннар? ~
Библияда ол ангеллер, тигірдегі чуртастарын артыс салып, чирзер, ир кізілер чіли, чуртирға тӱскеннер тіп чоохталча. Чирде чуртапчатхан сіліг ипчілерні кӧр салып, оларнаң сексуальнай чуртас апарарға хынғаннар (Бытие 6:1, 2; Иуданың 6). Син секстеңер ниме пілчезің? ~
Иреннің ипчі кізінең пасхаҷыл оңдайнаң чағын полғаны — ол сексуальнай палғалыс полча. Аның соонда іҷезінің істінде пала ӧс сыхча. Че ангеллерге сексуальнай палғалыстар чарадылбааннар. Худай ир кізі ипчізінең не андағ палғалыстығ ползын тіп хынған. Андада ла, пала тӧріп парза, олар аны, хайраллап, ӧскір поларҷыхтар.
Пу ангеллер хайдағ хомай киректер ит салғаннар?
Ангеллер, кізілернің ит-сӧӧгіне хубулып алып, чирдегі ипчілернең сексуальнай чуртаснаң чуртап сыхханнар. Олардаң тӧреен палалар алыптар пол парғаннар. Олар, уғаа чабал кізілер пол парып, пасха кізілерні иреелеҷеңнер. Чирні алыптардаң паза прай чабал кізілердең арығлабызар ӱчӱн, Худай илбек Чайых иткен. Че орта тудынған кізілерні арачылап алар ӱчӱн, Худай Нойға ковчег алай улуғ керіп пӱдірерге чоохтаан. Илбек Ӱгретчі Чайых тузында ниме полғанын сағыста тутханы аарлығ тіп чоохтаан (Бытие 6:3, 4, 13, 14; Лука 17:26, 27).
Илбек Чайых тузында, ол хомай ангеллер хайди полғаннар пілчезің ме? ~ Олар, ит-сӧӧктерін артыс салып, тигірзер нандыра парыбысханнар. Че олар аннаң андар Худайның ангеллері пол полбааннар. Олар Сайтанның ангеллері алай айналар пол парғаннар. Оларның палалары чи, алыптар, хайди полғаннар? ~ Олар илбек Чайыхта хырыл парғаннар. Прай Худайның чооғын испеен кізілер ідӧк хырыл парғаннар.
Ноға ам чир ӱстӱнде чуртас андағ аар?
Илбек Чайых соонда, Худай айналарға кізее хубуларға паза чаратпаан. Піс айналарны кӧрбинчетсебіс тее, олар, мының алнындағох чіли, кізілерні чабал киректер идерге кӱстепчелер. Ам айналар тигірдең чирзер тастаттырыбысханнар, аннаңар олар кізілерні мының алнындағызынаң хай-хай кӧп иреелепчелер.
Ноға піс айналарны кӧр полбинчабыс пілчезің ме? ~ Олар кізі харағына кӧрінмес хуттар. Ікінҷілебеске чарир: олар сынап парлар. Библияда Сайтан «прай чир ӱстӱндегі чоннарны алаахтырча» тіп чоохталча. Анзында ағаа айналар полысчалар (Азых чоох 12:9, 12).
Дьявол паза аның айналары пісті алаахтыр поларлар ба? ~ Я, сиргек полбазабыс. Че піске олардаң хорығарға кирек чоғыл. Илбек Ӱгретчі піди теен: «Аның Миннең устаҷаң ӱлгӱзі чоғыл». Піс Худайға нанҷы ползабыс, ол пісті Дьяволдаң паза аның айналарынаң арачылир (Иоанн 14:30).
Айналар пісті хайдағ хомай киректерге тартчатханнарын пілерге кирек. Сағын кӧреең. Айналар чирде хайдағ хомай киректер иткеннер? ~ Илбек Чайых алнында, олар ипчілернең сексуальнай чуртас апар сыхханнар. Ангеллерге, тізең, ипчілернең чуртирға чарадылбаан. Пӱӱн кізілер секстеңер Худай пирген чахығны сайбапчатсалар, айналар ӧрінчелер. Хайди сағынчазың, кемге сексуальнай чуртас апарарға чарадылча? ~ Орта, ирепчілерге ле.
Пӱӱн пірее палалар сексуальнай чуртас апар сыхчалар, че оларға анзын идерге чарабас. Библияда половой органнардаңар чоохталча (Второзаконие 23:1). Иегова кізінің ит-сӧӧгінің ол чардыхтарын сексуальнай чуртасха чайап салған. Анзы, тізең, ирепчілерге ле чарадылған. Кізілер Иегова чаратпинчатхан киректерні итчетселер, айналар ӧрінчелер. Кӧзідімге, оолахтар хызыҷахтарның, хызыҷахтар оолахтарның половой органнарынаң ойнапчатсалар, айналар ӧрінчелер. Че піс айналарны ӧріндірерге хынминчабыс, я? ~
Айналар хынчатхан, че Иегова хырт кӧрчеткен паза пір ниме пар. Пілчезің ме, нимедір ол? ~ Кӱстег (Псалом 11:5). Кӱстег — ол хазыр тудыныс паза пасха кізілерні иреелеені. Сағысха кир кӧр, айналарның ооллары, алыптар, сах іди тудынғаннар.
Ағаа хоза, айналар кізілерні хорыхтырарға хынчалар. Пірееде олар ӧліг кізее хубулып алчалар. Айналар ӱреен кізінің дее ӱнінең чоохтанчалар. Іди олар ӱреен кізілер аннаң андар чуртапчалар паза тіріг кізілернең чоохтасчалар тіп кӧп кізілерні алаахтырып алчалар. Я, айналар, кізі ӱреен соонда, аның сӱрні чӧрче тіп кӧп кізілерні киртіндірчелер.
Сайтан паза аның айналары пісті алаахтырып албазыннар тіп, піске уғаа сизіктіг поларға кирек. Библияда Сайтан позын, чахсы ангел чіли, кӧзідерге кӱстенче тіп чоохталча. Аның нымысчылары ідӧк тудынчалар (2 Коринфтегілерге 11:14, 15). Че сынында айналар уғаа чабаллар. Хайди олар пісті постарына тӧӧй поларға кӱстепчеткеннерін кӧр кӧреең.
Сағын кӧр, кізілер кӱстеге, чарадылбинчатхан сексуальнай чуртасха хайда ӱгренчелер? Хуттардаңар паза сӱрнілердеңер хайда піліп алчалар? ~ Телепередачалар паза фильмнер кӧрчетселер нимес пе? Компьютернай паза видеоойыннар ойнапчатсалар, Интернетнең тузаланчатсалар паза комикстер хығырчатсалар нимес пе? Хайди сағынчазың, андағ киректер пісті кемге чағын итчелер — Худайға алай Дьяволға паза аның айналарына? ~
Кӱстегдеңер кӧрчетсебіс, ниме пол парарға хорғыс пар?
Хайди сағынчазың, прай хомай нимелерні иссіннер паза кӧрзіннер тіп, кем хынча? ~ Я, Сайтан паза аның айналары. Аннаңар сағаа паза мағаа ниме идерге кирек? ~ Піске туза полчатхан паза Иеговаа нымысчыланарға полысчатхан нимелерні хығырарға, истерге паза кӧрерге кирек. Хайди сағынчазың, анзына ниме кірче? ~
Нименең айғасханы туза полар?
Орта тудынчатсабыс, піске айналардаң хорығарға кирек чоғыл. Олар постары даа аннаң хорыхчалар. Пірсінде, айналар, хорых парып, Иисустаң сурғаннар: «Пісті чох идерге килгезің?» (Марк 1:24). Тус читсе, Иисус Сайтанны паза аның айналарын чох идібізер. Андада піс уғаа тың ӧрінербіс, я? ~ Ам, тізең, Иисуснаң паза аның Пабазынаң нанҷылассабыс, Иисус пісті айналардаң арачылирында ікінҷілебинчебіс.
Ам піске ниме идерге кирек полчатханнаңар хығырып алааң: 1 Петрның 5:8, 9 паза Иаковтың 4:7, 8.