ИЕГОВА кічиҷек паза арачылан полбинчатхан нимелерні арачылир ӱчӱн, пірееде хайхастығ нимелер итче. Паркта алай арығда чӧрчетсең, Иегованың андағ нимелердеңер сағыссырапчатханы кӧрін парча. Че пастап анзын піліп аларға оой ла полбинча.

Арығда парчатсаң, синің алныңда чирзер хус тӱсче. Ол палығлат салғанға тӧӧй, ханадын сӧзірче. Син андар чағын пазарға кӱстенчезің, ол, тізең, тисче. Кинетін ол хус учуғыбысча. Аның ханады пӱдӱн полтыр! Андағда ноға ол іди пол чӧрген? ~

Ол хус тӱскен орыннаң ырах нимес, от аразында аның палалары полтырлар. Хус, син аның палаларын таап алып, оларға хомай идерзің тіп хорых парған. Аннаңар ол, синің алныңда іди чойланып, сині палаларынаң оортах апарыбысхан. Пілчезің ме, пісті, палаларын арачылапчатхан хус чіли, кем арачылап полар? ~ Библияда Иегова палаларын арачылапчатхан уғаа чоон, кӱстіг хара хуснаң тиңнестірілче (Второзаконие 32:11, 12).

Иегованың иң аарлығ палазы — ол аның хынған Оолғы, Иисус. Тигірде чуртаанда, Иисус, Пабазох осхас, уғаа кӱстіг хут полған. Андада аның позын арачылирға кӱзі пар полған. Че Иисус чирзер килгенде, позы позын арачылап полбаан. Аны кемге-де арачылирға кирек полған.

Худайның кӧңнін толдырар ӱчӱн, Иисусха ӧзіп аларға паза толдыра, улуғ кізі пол парарға кирек полған. Сайтан анзын пілген, аннаңар Иисусты, ол кічіг полғандох, ӧдірібізерге хынған. Библияда хайди Иегова позының Оолғын арачылааннаңар хайхастығ чоох пар. Чоохтап пирим ме? ~ Андағда ис.

Иисус тӧреен соонда, ӱр ниместең, Сайтан тигірнің іскеркі саринда уғаа чарых чылтыс чарыдыбысхан. Астрологтар, чылтыстарны істесчеткен кізілер, ол чылтыстың соонҷа нинҷе-де чӱс километр парғаннар. Чылтыс оларны Иерусалимзер ағылған. Саарзар киліп, олар сур сыхханнар: «Иудей ханы поларға тӧреен Пала хайдадыр?» Аннаңар Библияда ниме пазылчатханын пілчеткен кізілер нандырғаннар: «Иудей чиріндегі Вифлеемде тӧрирге кирек» (Матфей 2:1—6).

Ирод, Иерусалимде устаан чабал хан наа хан Вифлеемде тӧреннеңер ис салғандох, астрологтарға піди теен: «Парыңар, ол Час Паладаңар прай нимені чахсы иде піліп алыңар. Таап алзаңар, мағаа искіріңер». Пілчезің ме, ноға Ирод Иисусты таап аларға іди тың хынған? ~ Ол істі чох кізі полған. Аннаңар наа ханны ӧдірібізерге хынған!

Хайди Иегова позының Оолғын арачылаан? ~ Иисусты таап алып, астрологтар ағаа уғаа кӧп сыйыхтар сыйлап пиргеннер. Анаң Худай оларға тӱстерінде Иродсар нандыра айланмасха чоохтаан. Нандыра парчатханда, астрологтар, Иерусалимзер кірбин, постарының чирлерінзер парыбысханнар. Аны піл салып, Ирод уғаа тың тарыныбысхан. Иисусты ӧдірібізерге хынып, ол Вифлеемдегі ікі часха читкелек оолахтарны прай ӧдірібізерге чахығ пирібіскен! Че ол тусха Иисус анда чох полған.

Хайди Иисус арачыланып алған, пілчезің ме? ~ Астрологтар парыбысхандох, Иегова Марияның иріне, Иосифке, чоохтаан: «Тур, Час Паланы паза іҷезін алып, Египетсер тис». Анда Ирод Иисусха пір дее хомай ниме ит полбасчых. Нинҷе-де чыл пазынаң Иосифнең Мария Египеттең нандыра айланғаннар. Худай, тізең, Иосифсер тӱзінде киліп, прай сӧбірезінең хада Назаретсер парарға чоохтаан. Иисусха анда хорғыс чох полған (Матфей 2:7—23).

Иегова позының Оолғын хайди арачылаан кӧрчезің ме? ~ Че кем от аразында чазыр салған хус палаларына алай кічиҷек Иисусха тӧӧй? Арса, син? ~ Сағаа даа хомай идерге хынчалар нооза. Пілчезің ме, кем хомай идерге хынча? ~

Библияда Сайтан пісті чібізерге хынчатхан, ыыран чӧрчеткен ала парыснаң тиңнестірілче. Хайди ала парыстар, кӧбізін, малларның палаларын тудып алчалар, Сайтан паза аның айналары ідӧк кічиҷек палаларға хомай идерге кӱстенчелер (1 Петрның 5:8). Че Иегова Сайтаннаң хай-хай кӱстіг. Иегова позының палаларын арачылап алар паза Сайтан иткен хомай нимелерні прай чох идібізер.

Пу кинденің 10-ҷы пастааның хоостыра, Дьявол паза аның айналары кізілерні хайдағ хомай киректерге тартчалар, сағысха кирчезің ме? ~ Я, олар пісті Худай піске чаратпаан сексуальнай палғалыстарға тартчалар. Че кемнің аразында сексуальнай чуртас чарадылча? ~ Я, хоных хонған иреннең ипчінің аразында.

Ачырғастығ, че пірее улуғ кізілер палаларнаң сексуальнай чуртас апарарға хынчалар. Улуғ кізілер палаларны андағ хомай киректерге ӱгрет салзалар, оолахтар паза хызыҷахтар ідӧк уғаа хомай тудын сыхчалар. Олар постарының половой органнарынаң чарадылбинчатхан оңдайнаң тузалан сыхчалар. Кӧп чыллар мының алнында Содом тіп саарда сах андағ чон полған. Библияда Лотсар аалҷылар килгенде, ол саарның прай чуртағҷылары — оолахтар даа, апсахтар даа — Лоттың аалҷыларына кӱл саларға кӱстенгеннер тіп пазылча (Бытие 19:4, 5).

Хайди Иисусты арачылирға кирек полған, сині дее синнең половой чуртас апарарға хынчатхан улуғ даа кізілердең, палалардаң даа арачылирға кирек. Кӧбізін, андағ кізілер сағаа нанҷы полчам тіп чойланчалар. Олар синнең ниме идерге хынчатханнарын пірдеезіне чоохтабазын тіп, хайдағ-да сыйых таа сыйлап пирербіс тирлер. Че андағ кізілер, Сайтан паза аның айналарох чіли, постарынаңар ла сағынчалар. Олар хынығыстарын на толдырып аларға хынчалар. Постарының хынығыстарын толдырып алар ӱчӱн, олар палаларны сексуальнай киректерге тартып аларға кӱстенчелер. Анзын идерге чарабас!

Постарының хынығыстарын толдырып алар ӱчӱн, андағ кізілер ниме итчелер, пілчезің ме? ~ Андағ кізілер синің половой органнарыңны тутхлирлар алай сыйбирлар. Алай олар постарының половой органнарын синің половой органнарыңа теертерлер. Че син позыңның половой органнарыңнаң пірдеезіне ойнирға чаратпа. Пірдеезіне: харындазыңа даа, пиҷеңе дее, іҷеңе дее, пабаңа даа!

Че сағаа позыңны сайбах сағыстығ кізілердең хайди арачылирға? ~ Позыңның половой органнарыңнаң ойнирға пірдеезіне чаратпа. Кем-де анзын идерге кӱстензе, син, хорыхпин, тыыда чоохтан: «Тохтат сал! Синнеңер прай чоохтап пирем!» Ол кізі син позың пыролығзың тіпчетсе, ағаа киртінме. Ол чойланча! Ол кем дее полза, парып, аннаңар прай чоохтап пир! Ол сині аннаңар пірдеезіне чоохтабасха чӧптепчетсе дее, чоохтап пир. Андағ кізі сині хорыхтырарға алай аарлығ сыйыхтар сыйлирға сӧс пирерге айабас. Че сағаа, сах андох андартын парыбызып, аннаңар прай чоохтап пирерге кирек.

Хорығарға кирек чоғыл, че сизіктіг поларға кирек. Іҷе-пабаң андағ хара сағыстығ кізілердеңер паза хорғыс ағылчатхан орыннардаңар сизіндірчетселер, оларның чооғын истерге кирек. Сӧс истеечі ползаң, хомай кізілерге сағаа хомай идерге сидік арах полар.