1. Магияа паза сыбырағ кирегіне нинҷе кӧп кізі киртінче?

 «АФРИКАНЫҢ кибірліг религиялары» тіп киндеде Африкада алаамдыр ла кізі «сыбырағҷылар пар ба» тіп сурар тіп чоохталча. Олох киндеде «Африкада чуртапчатхан полған на кізінің чуртазында сыбырағ кирегі хайди даа полча» тіп пазылча. Сыбырағҷыларға ӱгренмеен дее, пӧзік ӱгредігліг дее кізілер киртінчелер. Исламның паза христианствоның религиознай устағҷылары даа сыбырағҷыларға киртінчелер.

2. Тарап парған киртініс хоостыра, магическай кӱс хайдаң килче?

² Африкада мындағ киртініс тарап парған: хайдағ-да мистическай духовнай кӱс пар. Ол Худайның кӱзі. Ол кӱснең хуттар паза мының алнында чуртаан кізілер тузаланчалар. Пірее кізілер ідӧк ол кӱсті хайди алып аларға пілчелер паза аннаң чахсы киректерге (ах магия) алай чабал киректерге (хара магия) тузаланчалар.

3. Хара магия нимедір ол паза піреелері ол хайдағ ӱрег ағылча тіп санапчалар?

³ Хара магиянаң ыырҷылардаң тоғыр тузаланчалар. Аннаң тузаланчатхан кізілер чарханаттарны, хустарны, сеектерні паза пасха даа тіріг нимелерні кізілерге хомай идер ӱчӱн ыс полчалар тіп саналча. Кізілер хара магияның ӱчӱн ыырласчалар, пала таап полбинчалар, ағырчалар алай ӧлчелер дее тіп киртінчелер.

4. Сыбырағҷыларның хайдағ способностьтар пар тіп санапчалар паза оларның піреелері ниме тіпчелер?

⁴ Хара магия сыбырағнаң хаданаң хада ла парчалар. Кізілер сыбырағҷылар пасха сыбырағҷыларнаң тоғазып алар ӱчӱн паза пасха кізілерні ӧдірер ӱчӱн, ит-сӧӧктерін хараазын артыс салып, учух парыбысчалар тіп санапчалар. Сыбырағҷыларның ит-сӧӧктері орғанда халчалар, аннаңар оларның учухчатханнарына оларның сӧстері ле киречілес полчалар. Кӧзідімге, пір африканскай журналда сыбырағҷы полған саарбах хыстарның сӧстері пазыл парған: «Мин, автомобильнай авария идіп, 150 кізі ӧдір салғам», «Мин, пис паланың ханын соорып, оларны ӧдірібіскем», «Мині ӱс оол тастабысхан, аннаңар мин оларны ӧдірібіскем».

5. Ах магия нимедір ол паза хайди аннаң айғасчалар?

⁵ Кізілер ах магия чабал нимедең арачылапча тіп санапчалар. Ах магиянаң айғасчатханнар магическай пурбалар алай браслеттер кис чӧрчелер. Олар арачылапчатхан эликсирні ісчелер алай аны ит-сӧӧктеріне сӱртчелер. Паза оларны арачылапчатхан нимелер пар тіп санапчалар. Ол нимелерні тураларында алай тура хыринда, чирге кӧміп, чазыр салчалар. Ідӧк оларны арачылапчатхан амулеттер кис чӧрчелер. Ол амулеттерде Кораннаң алай Библиядаң алылған сӧстер пас салчалар.

6. Сайтаннаң айналар пурунғыда ниме иткеннер паза анзына хайди хайарға кирек?

⁶ Сынында, Сайтаннаң айналар кізілернің хорығыстығ ыырҷылары. Олар кізінің чуртазына паза сағыстарына влиять полчалар. Пурунғыда олар кізілерге паза малларға кіріп алҷаңнар (Матфей 12:43—45). Оларның кӱстерін нимее салбасха чарабас, че олардаң иртіре хорығарға даа кирек чоғыл.

7. Сайтан ниме идерге кӱстенче? (Кӧзідім кӧзіт пиріңер.)

⁷ Сайтан алаахтырарға ус. Кізілер аны хыри-пазы чох кӱстіг тіп сағынзыннар тіп хынча, че сынында ол андағ кӱстіг нимес. Пір кӧзідім кӧр кӧреелер. Пір африканскай хазнада чаа тузында чааҷылар, ыырҷыларын хорыхтыр салар ӱчӱн, уғаа кӱстіг звуковой системанаң тузаланғаннар. Чаалазар алнында чааҷылар аар артиллерия паза мылтыхтар атчатханын ойнатчаңнар. Ыырҷылары улуғ армия олардаң тоғыр парча тіп сағынзыннар тіп хынғаннар. Сайтан ідӧк, кізілер аның кӱзінің хыри-пазы чоғыл тіп саназыннар тіп хынча. Аның кӧстии — кізілерні хорыхтыр саларға. Олар Иегованың кӧңнін толдырар орнына аның кӧңнін толдырзыннар тіп хынча. Сайтан таратчатхан ӱс чой чоохты ӱзӱрібізеелер.

8. Сайтан хайдағ чой чоохты таратча?

⁸ Пастағы чой чоох: хомай кирек хаҷан даа позы алынҷа пол парбинча. Ноо даа чабал киректі, кізі итпеен полза, сыбырағҷы ит салған полар. Кӧзідімге, пала, маляриянаң ағырып, ӱреп парған. Аның іҷезі малярияны сарығ сеектер таратчатханын пілче полар. Че ол сарығ сеекті палазына кем-де, сыбырап, ысхан тіп сағынар.

9. Хайди Библия Сайтан прай сидіктерібісте пыролығ полбинчатханын кӧзітче?

⁹ Сайтан кізілерге ӱрег ағылча, че ол прай сидіктерібістің ӱчӱн пыролығ тіп сағынарға кирек чоғыл. Библияда чоохталча: «Табырах чӱгӱрчеткеннер чарыста паза кӱстіглер кӱресте сыбыра утпинчалар, хыйғаларның чіҷең нимелері сыбыра полбинча паза уғаа хыйғалар даа пай полбинчалар, пілчеткеннер дее маңнаныстығ полбинчалар, че прай ниме тустың паза кинетін пол парчатхан киректернің холында» (Экклезиаст 9:11). Марығда чарысчатхан кізі прайзынаң табырах чӱгӱрчетсе дее, ол хайди даа прайзынаң пурун килер тіп полбас. «Прай ниме тустың паза кинетін пол парчатхан киректернің холында» нооза. Чӱгӱрчеткен кізі, харыл парып, аңдарыл парарға паза азағын хынҷыхтыр саларға айабас. Андағ ниме полған на кізінең пол парарға айабас. Анзы хайди даа Сайтаннаң паза сыбырағнаң палғалыстығ полбас. Ол олаңай ла пол парған.

10. Сыбырағҷылардаңар ниме чоохтапчалар паза анзы чой чоох полчатханын хайдаң пілчебіс?

¹⁰ Ікінҷі чой чоох: хараазын сыбырағҷылар, ит-сӧӧктерін артыс салып, пасха сыбырағҷыларнаң тоғазарға алай кізілерні ӧдірерге чӧрчелер. Амды, тізең, сағын кӧріңер: «Сыбырағҷы сынап іди чӧрчетсе, аның ит-сӧӧгін артыс салып, ниме парыбысча?» Хайди піс піліп алғабыс, тын — ол кізі позы, че ит-сӧӧкті артыс салып, парыбысчатхан ниме нимес. Хут — кізее чуртас пирчеткен кӱс. Ол ит-сӧӧктең оонаң пір дее ниме ит полбинча.

11. Сыбырағҷылар, ит-сӧӧктерін тастап, чӧр полбинчатханнарын хайдаң пілчебіс? Сірер анзына киртінчезер бе?

¹¹ Тын даа, хут таа, кізінің ит-сӧӧгін тастап, постары чахсы алай хомай нимені ит полбинчалар. Аннаңар сыбырағҷылар, ит-сӧӧктерін тастап, чӧр полбинчалар. Олар пірее киректерні иткебіс тіпчелер алай сағынчалар, че сынында оларны итпееннер.

12. Хайди Сайтан кізілерні олар ниме-де чоохтааннар алай иткеннер тіп киртіндірче?

¹² Андағда сыбырағҷылар аймах-пасха нимелер итчебіс тіп чоохтапчатханнарына хайди хайарға? Сайтан кізілерні олар ниме-де иткеннер тіп киртіндір полча, че сынында ол кізілер андағ ниме итпееннер. Аның кізее кӧспек кӧзідерге кӱзі пар, аннаңар кізее ол ниме-де кӧрген, искен алай ниме-де иткен тіп пілдірер, че сынында андағ ниме полбаан. Сайтан, кізілер Иеговадаң хыйа айланыбыссыннар паза Библияа киртінмин сыхсыннар тіп, андағ оңдайларнаң тузаланча.

13. а) Ах магия чахсы ба? б) Библияда магиядаңар ниме чоохталча?

¹³ Ӱзінҷі чой чоох: ах магия чахсы, ол хара магиядаң арачылапча. Библия хайдағ даа магияны хырт кӧрче. Иегова Израиль чонына магиядаңар паза сыбырағҷылардаңар пирген нинҷе-де чахығны кӧр кӧреелер.

•   «Ханнығ нимені чібеңер. Танығларға киртінмеңер паза магиянаң айғаспаңар» (Левит 19:26).

•   «Хуттарны хығырчатхан алай алнында ниме поларын ухаанҷылапчатхан ир алай ипчі кізіні ӧдірібізерге кирек» (Левит 20:27).

•   «Сірернің пірдеезі... тӧлке салбасха, магиянаң айғаспасха, танығларға киртінмеске, сыбырабасха, харғабасха, хуттарнаң чоохтасчатханнарзар алай ухаанҷылапчатханнарзар айланмасха... кирек» (Второзаконие 18:10—14).

14. Ноға Иегова магиянаң айғазарға чаратпаан?

¹⁴ Хайди пу чахығлардаң кӧрінче, Худай позының чонына магиянаң айғазарға чаратпаан. Иегова позының чонына хынған, аннаңар, олар хорығыстың паза азаныстың холына кір парбазыннар тіп, пу чахығларны пирген. Сынында, ол оларны айналарның ӱлгӱзінде полбазыннар тіп хынған.

15. Иегова Сайтаннаң хай-хай кӱстіг полчатханын Библия хайди кӧзітче?

¹⁵ Библия айналар ниме ит полчатханнаңар паза ниме ит полбинчатханнаңар чоохтабинча. Че Иегова Худай Сайтаннаң паза айналардаң хай-хай кӱстіг полчатханын кӧзітче. Иегова Сайтанны тигірдең сӱрібіскен (Азых чоох 12:9). Кӧріңер, Сайтан, Иовты сынирға чаратсын тіп, Худайдаң сурынған. Худай Иовты ӧдірерге чаратпаан, аннаңар Сайтан аны ӧдірбеен (Иов 2:4—6).

16. Піске кемде арачыланыс тілирге кирек?

¹⁶ Притчи 18:10-да чоохталча: «Иегованың ады — пик сівее. Арығ чӱректіг кізі, андар тизіп, арачыланыс алча». Аннаңар піске, арачыланыс тілеп, Иеговазар айланарға кирек. Худайның нымысчылары, Сайтаннаң паза айналардаң арачыланып алар ӱчӱн, сыбырағҷыларның харғастарынаң паза олар иткен нимелернең тузаланминчалар. Ідӧк олар сыбырағҷыларның харғастарынаң хорыхпинчалар. Олар Библияда пазылған сӧстерге киртінчелер: «Чӱректері пӱкӱлее аның сариндағыларға чахсы полар иде кӱзінең тузаланар ӱчӱн, Иегованың харахтары прай чир ӱстӱн кӧрглепчелер» (2 Летопись 16:9).

17. Иаковтың 4:7 хайдағ ізеніс пирче паза піс ниме идерге кирекпіс?

¹⁷ Сірер Иеговаа нымысчыланчатсар, пу сӧстер сірерзер айланчалар. Иаковтың 4:7-де чоохталча: «Худайның холына кіріңер. Сайтанға тоғыр полыбызыңар, ол сірердең андада тизіп ойлир». Сын Худайға нымысчыланчатсар паза аның чооғын исчетсер, Иегова сірерні хайди даа арачылир.