Сағаа хорғыстығ полза, син ниме итчезің?~ Син пабаңзар алай іҷеңзер чӱгӱрче поларзың. Че оларнаң пасха сағаа полызар кем-де парох. Ол прайзынаң кӱстіг. Пілчезің ме, кем ол?~ Ол Иегова Худай. Амды Давидтеңер, чиит оолдаңар, чоохтас кӧреең. Аннаңар Библияда чоохталча. Иегова ағаа хаҷан даа полызарын ол пілген, аннаңар махачы полған.

Давидтің іҷе-пабазы аны кічігдең сығара Иеговаа хынарға ӱгреткеннер. Анзы ағаа хорғыстығ туста хорыхпасха полысхан. Иегова аның Нанҷызы полчатханын паза хаҷан даа ағаа полызарға тимдезін ол пілген. Пірсінде, Давид хой хадарчатханда, ала парыс кинетін сых киліп, хой хаап парыбысхан! Давид ниме идібіскен, пілчезің ме? Тиріглер чох полған полза даа, ол ала парысха чидіп алып, аны ӧдірібіскен! Пасха туста хойларға аба тыыныбысхан. Давид аны ідӧк ӧдірібіскен. Хайди сағынчазың, Давидке кем полысхан?~ Орта, Иегова.

Пірсінде Давид уғаа махачы тудынған. Израильтяннар хонҷых чоннаң, филисти́мляннарнаң, чааласханнар. Пір филистимскай чааҷы уғаа пӧзік полған — алып кізі! Аның ады Голиа́ф полған. Ол Израильдегі чааҷыларға паза Иеговаа кӱлген. Голиаф израильтяннарны харбазарға хығырған, че прайлары аннаң хорыхханнар. Давид аннаңар ис салғанда, Голиафха теен: «Мин синнең харбазарбын! Иегова сині чиңіп аларға мағаа полыс пирер!» Хайди сағынчазың, Давид махачы полған ма?~ Йа, уғаа махачы полған. Анаң андар ниме полғанын пілчезің ме?

Давид праща (пӱктеп салған хур) паза пис чылбырах тас алып алып, ол алыптаң тоғыр сыххан. Чиит Давидті кӧр салып, Голиаф ағаа кӱл сыххан. Че Давид ағаа теен: «Син миннең тоғыр хылыснаң сыхтаң, мин, тізең, синнең тоғыр Иегованың адынаң сыхтым!» Давид Голиафха удур чӱгӱріп, пращазына тас салып, аны, алыптың хамағына хап-орта тастабысхан! Анзы чирге  ӧліг тӱс парған! Ол киректі кӧр салып, филистимляннар, хорых парып, тизібіскеннер. Хайди чиит Давид алыпты чиңіп алған?~ Ағаа алыптаң хай-хай кӱстіг Иегова полыс пирген!

Давидтеңер чоох пісті нимее ӱгретче?~ Иегова прайзынаң кӱстіг. Ол синің Нанҷың. Аннаңар хорыхчатсаң, ундутпа, Иегова сағаа махачы поларға полызар!