Іҷе-пабаңның чооғын истерге оой ба?~ Чох. Иисус Иегованың, ідӧк іҷе-пабазының чооғын хаҷан даа искенін пілчезің ме?~ Іҷе-пабаңның чооғын истерге ниик тее полбаза, аның кӧзідімі оларның чооғын истерге сағаа полызар. Иисустаңар кӧп арах піліп алааң.

Чирзер килер алнында, Иисус тигірде Иегованаң хада чуртаан. Чирде Иисустың іҷе-пабазы полғанох. Оларны Ио́сиф паза Мари́я тіп адаҷаңнар. Хайди олар Иисустың іҷе-пабазы пол парғанын пілчезің ме?~

Тигірде чуртаан Иисустың чуртазын алып-алып, Иегова аны Марияның істінзер сал салған. Андада Иисус кізі полып тӧреен паза чирде чуртап сыххан. Анзы уғаа хайхастығ ниме полған! Палалар іҷелерінің істінде хайди ӧсчелер, ідӧк Иисус Марияның істінде ӧскен. Тоғысча ай пазынаң ол тӧреен. Іди Мариянаң Иосиф Иисустың чирдегі іҷе-пабазы пол парғаннар.

Иисусха 12 час полғанда, позының Пабазына, Иеговаа, ол хайди тың хынчатханын пір кирек кӧзіт пирген. Ол кирек, Иисус туғаннарынаң хада Па́сха тіп ӱлӱкӱнге Иерусали́мзер чӧргенде, пол парған. Ибзер парчатханда, Иосифнең Мария Иисус оларнаң хада парбинчатханын сизін салғаннар. Олар аны пір дее чирде таппааннар. Пілчезің ме, хайда ол полған?~

Иосифнең Мария сах андох Иерусалимзер айлан киліп, Иисусты тілеп сыхханнар. Аны пір дее чирде таап полбин, тың сағыссырааннар. Че ӱс кӱн пазынаң аны храмда кӧр салғаннар! Пілчезің ме, ноға Иисус храмда полған?~ Анда Пабазынаңар, Иеговадаңар, кӧп арах піліп аларға аның оңдай полған. Иисус Иеговаа хынған паза аны хайди ӧріндірерге піліп аларға хынған. Ол хаҷан даа, улуғ ӧс парғанда даа, Иегованың чооғын исчең. Пірееде ағаа ниик полбаза даа, Иисус іди тудынҷаң. Худайның чооғын истіп, ол ирееленерге дее тимде полған. Иосифнең Марияның чооғын ол ідӧк исчең ме?~ Библияда исчең тіп чоохталча.

Иисустың кӧзідімі сині нимее ӱгретче?~ Сидік тее полза, іҷе-пабаңның чооғын истерге кирек. Син іди тудынарға кӱстенерзің ме?~