Орта тудынарға оой ба?~ Кӧбізіне оой ла нимес. Библияда Иосия оолағасха орта тудынарға уғаа сидік полғаннаңар чоохталча. Че аның чахсы нанҷылар пар полған. Олар ағаа полысханнар. Иосиянаң паза аның нанҷыларынаң чағын арах танызып алааң.

Ачырғасха, аның пабазы, иудейлернің ханы, Амо́н, уғаа хомай тудынҷаң паза чой худайларға пазырҷаң. Амон ӱреенде, Иосия аның орнына хан пол парған. Андада ағаа сигіс ле час полған! Иосия, пабазы чіли, хомай пол парған ма? Хайди сағынчазың?~ Чох, пол парбаан!

Иосия хаҷан даа, кічіг дее полғанда, Иегованың чооғын истерге кӱстенҷең. Аннаңар Иеговаа хынчатхан кізілер аразында ла нанҷыларны таллаҷаң. Олар Иосияа орта тудынарға полысчаңнар. Кем аның нанҷылары полған?

Аның нанҷыларының пірсін Софо́ния тіп адааннар. Ол ухаанҷы полған. Иуданың чуртағҷылары чой худайларға пазырзалар, олар чобаға кірерлер тіп  искірген. Иосия Софонияны исчең, аннаңар чой худайларға пазырбин, Иеговаа ла пазырҷаң.

Ідӧк Иосия Иереми́янаң нанҷыласхан. Оларның частары тиң полған полар паза олған тузында олар удур-тӧдір ырах нимес чуртааннар. Олар чағын нанҷылар полғаннар, аннаңар Иосия ӱреенде, Иеремия сарын пас салған. Ол сарында хайди Иеремия Иосияа сағынчатханнаңар чоохталча. Иеремиянаң Иосия орта тудынарға паза Иегованың чооғын истерге удур-тӧдір полысчаңнар.

Иосияның кӧзідімінең піс нимее ӱгрен поларбыс?~ Иосия кічігдең сығара сыбыра орта тудынарға кӱстенҷең. Иеговаа хынчатханнарнаң на нанҷыласханы аарлығ полчатханын ол пілген. Син дее ідӧк Иеговаа хынчатханнарның аразында нанҷылар табарға кӱстен. Олар сағаа хаҷан даа орта тудынарға полызарлар!