Хооста хызыҷахты кӧрчезің ме?~ Ол Иеффа́й тіп аттығ кізінің хызы. Ол хыстың ады Библияда пазылбинча, че ол пабазын паза Иегова Худайны ӧріндіргеннеңер піс пілчебіс. Анынаң паза аның пабазынаң, Иеффайнаң, танызып алааң.

Иеффай чахсы кізі полған паза хызына Иеговадаңар кӧп чоохтаҷаң полған. Ағаа хоза, ол кӱстіг ир кізі паза чааҷыларның ус устағҷызы полған. Аннаңар израильтяннар ыырҷыларнаң чааласчатханда, аны постарының устағҷызы ползын тіп хынғаннар.

Иеффай Иеговадаң позының чонына чиңіс тударға полыс пирерге сурынған. Ол, ибзер чиңіснең айланзам,  ибімнең иң пурун сыххан кізіні Иеговаа пирібізербін тіп, сӧс пирген. Ол кізі чуртас тооза ызых отах хыринда нымысчыланарға кирек полған. Ызых отах ол туста кізілер Худайға пазырчатхан орын полған. Иеффай чиңіп алған! Пілчезің ме, ол ибзер айланғанда, аны удурлирға иң пурун кем сыххан?~

Аның хызы! Ол аның чалғыс палазы полған, ам, тізең, ӧс парып, пабазынаң парыбызарға кирек полған. Иеффайға уғаа сидік полған. Че ундутпа, ол Иеговаа сӧс пирген. Аның хызы сах андох ағаа теен: «Пабам, Иеговаа сӧс пирген ползаң, аны толдырарға кирексің».

Ызых отахта нымысчыланза, ирге пар полбастаңар паза пала полбастаңар, Иеффайның хызына ідӧк ниик полбаан. Че пабазының пирген сӧзін толдырарға паза Иегованы ӧріндірерге ол тың хынған. Анзы сӧбіреліг поларынаң ағаа хай-хай аарлығ полған. Аннаңар ол ӧскен туразынаң парыбызып, чуртас тооза ызых отахта чуртаан.

Хайди сағынчазың, ол Иегованы паза пабазын ӧріндірген ме?~ Йа, ӧріндірген! Син, Иеффайның хызы чіли, Иегованың чооғын исчетсең паза ағаа хынчатсаң, аны паза позыңның іҷе-пабаңны ідӧк ӧріндірерзің.