Сағаа піреезі, чазыттап, пірее нимені чоохтаан ма?~ * Чоохтаан полза, сағаа чазыт асханнар. Библияда пір уғаа аарлығ чазыттаңар чоохталча. Ол «илбек чазыт» тіп адалча. Худайдаң сыхчатхан ӱчӱн, ол илбек полча. Ол чазытты кізілер пілбееннер, ангеллер дее аннаңар кӧп арах піліп аларға хынғаннар. Ол чазытты піліп аларға хынчазың ма?~

Алында-пурунда Худай пастағы ир паза ипчі кізіні чайап салған. Оларны Ада́м паза Е́ва тіп адааннар. Худай оларға сіліг райскай тураны, Эде́м тіп адалчатхан садты, сыйлап пирген. Олар Райда мӧге чуртирҷыхтар. Че Адамнаң Ева ниме ит салғанын сағысха кирчезің ме?~

Олар Худайның чооғын испееннер. Аннаңар піс ам райда чуртабинчабыс. Че Худай прай чир ӱстӱн уғаа сіліг сад ит саларым тіп чоохтаан. Анда полған на кізі часкалығ полар паза мӧге чуртир. Хайди Худай аны ит салар? Кізілер ӱр тус аннаңар пілбееннер. Анзы чазыт полған.

Иису́с Христо́с чирзер килгенде, ол илбек чазыттаңар кізілерге чоохтап сыххан. Ол чазыт Худай Хан-ӱлгӱзінеңер чазыт полча тіп чоохтаан. (Худай Хан-ӱлгӱзі нимедір ол, аны 14 урокта піліп аларбыс.) Иисус, ол Хан-ӱлгӱ килзін тіп, пазырарға ӱгреткен. Ол Хан-ӱлгӱ чирні уғаа сіліг райға айландырарға полыс пирер.

Ол чазытты пілчеткеніңе ӧрінчезің ме?~ Ундутпа, Иего́ваның чооғын исчеткен не кізілер Райда чуртирлар. Библияда Иегованың чооғын искен кӧп кізілернің чуртастарынаңар чоохталча. Син чи, оларның піреезін пілчезің ме?~ Олардаңар хығырып алып, хайди оларның кӧзідім ал поларбыс тіп сағын кӧреең.