Пурунғы туссар айланып, сағызыбыста Ханаа́н чиріндегі Иерихо́н саарда полчабыс тіп сағын кӧреең. Аның чуртағҷылары Иеговаа киртінминчелер. Анда Раав ипчі чуртапча.

Раав кічіг хызыҷах полғанда, ағаа хайди Моисе́й Хызыл талайның суун чарыбызып, израильтяннарны Египеттең сығарып алғаннаңар чоохтааннар. Ол ідӧк хайди Иегова израильтяннарға ыырҷыларны чаалап аларға полыс пиргеннеңер искен. Ам, тізең, израильтяннар Иерихонның хыринда лагерьнең турыбысханнаңар ол ис салча.

Пірсінде иирде Израиль чонынаң ікі кізі Иерихонны кӧрерге парчалар. Олар Раавтың туразынзар килгенде, ол оларны удурлапча паза позында хонарға артысча. Хараазын Иерихонның ханына саарда ікі разведчик паза олар Раавтың ибінделер тіп искірчелер. Андада хан позының кізілерін оларны тудып аларға ысча. Раав ікі разведчикті тура хырында чазырча (тура хырлары ол чирде тӱс полҷаң) паза ханның кізілеріне тіпче: «Йа, разведчиктер пеер кил парғаннар, че олар саардаң парыбысханнар. Сірер табырах сӱріссеңер, оларға чидіп аларзар!» Ноға Раав разведчиктерні арачылапча, пілчезің ме?~ Раав Иеговаа киртінче паза ол израильтяннарға Ханаан чирін пирібізерін пілче.

Иерихон иңзерілчетсе, Раав паза аның сӧбірезі арачылан халардаңар разведчиктер, аның ибінең парар алнында, сӧс пирчелер. Олар ағаа ниме идерге чахыпчалар?~ Олар тіпчелер: «Хызыл пағ алып, кӧзенектең сығара іл сал. Іди ит салзаң, синің тураңдағы кізілер, прайзы, арачылан халарлар». Разведчиктер Раавха хайди чахааннар, ол сах іди итче. Анаң чи ниме полча?~

Нинҷе-де кӱн пазынаң израильтяннар саарны пір дее ниме чоохтанмин ибіріп пастапчалар. Алты кӱн олар кӱннің сай саар ибіре пірер хати чӧрчелер. Читінҷі кӱнінде, тізең, олар саарны читі хати ибірчелер паза тың хысхырчалар.  Андада Иегова саар ибіре стеналарны иңзерібісче. Че кӧзенегінде хызыл пағ іліл парған тура иңзерілбинче! Хооста ол тураны кӧрчезің ме?~ Раав паза аның сӧбірезі арачылан халғаннар!

Раавтың кӧзідімі сині нимее ӱгрет полар?~ Иегова иткен хайхастарны Раав прай пілген, аннаңар ол ағаа киртінген. Сағаа ідӧк Иегованың уғаа чахсы киректерінеңер піліп аларға чарир. Раав чіли, Иеговаа киртінчезің ме?~ Киртінчеткеніңе ікінҷілебинчебіс!