УРОК 2
Реве́кка Иегованы ӧріндірерге хынған
Ревекка Иеговаа хынған ипчі полған. Аның ирі Исаа́к полған. Ол ідӧк Иеговаа хынған. Хайди Ревекка Исаакнаң танызып алғанын паза хайди ол Иегованы ӧріндірерге хынчатханын кӧзіт пиргенін, піліп алааң.
Исаактың іҷе-пабазы Авраа́мнаң Са́рра полған. Олар прай сӧбіренең Ханаа́н чирінде чуртааннар. Андағы кізілер Иеговаа пазырбааннар. Че Авраам аның оолғы Иеговаа киртінчеткен ипчіні алзын тіп хынған. Аннаңар ол Елиезе́рні, позының нымысчызын, Харра́н саарзар Исаакха ипчі таап пирерге ысхан. Ол саарда Авраамның туғаннары чуртааннар.
Ревекка тибелерні суғарарға прай кӱзін салған
Елиезер Авраамның пасха нымысчыларнаң хада чолға сығыбысхан. Ол ырах чорых полған. Елиезер он тибее сыйыхтар паза чиистер артып алған. Че хайдағ хысты Исаакха ипчее таллап аларын Елиезер хайди піліп аларҷых? Харранзар чидіп, Елиезер позының кізілерінең хада хутух хыринда тохтабысхан. Ӱр ниместең хутухсар кізілер суға килерінеңер ол пілген. Андада ол Иеговаа пазыр сыххан: «Хыс, хайзынаң мин суғ сурим, мағаа паза минің тибелеріме суғ ур пирзе, ол хыс син таллап алған хыс ползын».
Мына хутухсар Ревекка килче. Библияда ол уғаа сіліг полған тіп чоохталча. Елиезер аннаң суғ сураанда, ол теен: «Йа, пирем! Сағаа даа, синің тибелеріңе дее». Сағын на кӧр, нинҷе суғ тибелер ізібісчелер! Аннаңар Ревеккаа нинҷе-нинҷе хати хутухсар суға чӱгӱр чӧрерге киліскен. Хооссар кӧр кӧр: кӧрчезің, хайди ол кӱлӱк тоғынча?~ Иегова аның пазырызына хайди нандырғанына Елиезер тың хайхап парған.
Елиезер Ревеккаа кӧп сіліг сыйыхтар пирген. Ревекка аны паза Авраамның пасха нымысчыларын пабазының ибінзер хығырған. Елиезер ноға Авраам аны пеер ысханнаңар паза хайди Иегова аның пазырызына нандырғаннаңар чоохтап пирген. Ревекканың туғаннары аны Исаакха ирге пирібізерге ӧрініснең чаратханнар.
Ревекка Исаактың ипчізі полар ӱчӱн, Елиезернең хада Ханаанзар парған
Хайди сағынчазың, Ревекка Исаакха ирге парарға хынған ма?~ Ревекка пілген, Елиезерні пеер Иегова ысхан. Аннаңар ибдегілер аннаң Ханаан чирінзер парып, Исаакха ирге парарға хынчазың ма тіп сурғанда, ол: «Йа, хынчам», — тіп нандырған. Ол, соона салдырбин, Елиезернең хада чолға сығыбысхан. Ханаанзар килгенде, ол Исаактың ипчізі пол парған.
Ревекка Иегованың кӧңнінҷе прай ниме иткен, аннаңар ол аны сыйыхтаан. Ол Иисус Христостың ӧбекезі пол парған! Син Ревеккаа кӧӧксең паза Худайны ӧріндірзең, Иегова сині дее алғастир.
