Кічігдең сығара Самуи́л ызых отахта чуртап нымысчыланған. Кізілер ол отахсар Иеговаа пазырарға килҷеңнер. Пілчезің ме, хайди Самуил анда пол парған? Пастап аның іҷезінең, А́ннанаң, танызып алааң.

Анна палалығ поларға тың хынған даа полза, ол ӱр пала таап полбаан. Позының пала ползын тіп, Анна Иеговаа суранып пазырған. Оолах тӧрізе, аны ызых отахта нымысчыланарға пирібізербін тіп сӧс пирген. Иегова аның пазырызына нандырған, іди аның оолғыҷах тӧреен. Ол аны Самуил тіп адап салған. Самуилға ӱс алай тӧрт час толғанда, Анна сӧс пирген хоостыра, аны ызых отахта Худайға нымысчыланарға пирібіскен.

Ол туста И́лий ызых отахта иң улуғ абыс полған. Андох аннаң хада аның ікі оолғы нымысчыланған. Ызых отах Худайның туразы полған, анда нымысчыланчатхан кізілер, прайзы, орта тудынарға кирек полғаннар. Че Илийнің ооллары постарын уғаа хомай тудынғаннар. Самуил прай ол киректерні кӧрген. Самуил, Илийнің ооллары чіли, хомай тудынған ма?~ Чох. Ол хаҷан даа орта тудынған — іди аны іҷе-пабазы ӱгреткен.

Илий оолларын хайди идерге кирек полған? Хайди сағынчазың?~ Оларны хатығлирға паза Худай туразында нымысчыланарға чаратпасха кирек полған. Че Илий іди итпеен. Аннаңар Иегова ағаа паза аның оолларына ӧкпелен парған. Оларны хатығлирға пӧгін алған.

Пірсінде хараазын Самуил узупчатханда, кем-де аны хығырчатханын ис салған: «Самуил!» Ол Илийзер чӱгӱр килген, че Илий: «Мин сині хығырбаам», — теен. Аның соонда аны пазох ікі хати хығырғаннар. Самуил ол ӱнні пазох ис салза, «Иегова, чоохта, мин исчем», — тіп нандырарға Илий чоохтаан. Самуил сах іди иткен. Иегова Самуилға чахаан: «Илийге аның сӧбірезінің  чабал киректерінің ӱчӱн хатығлирым тіп чоохтап пир». Хайди сағынчазың, Самуилға ол чахығны толдырарға ниик полған ма?~ Йа, оой полбаан. Ағаа хорығыстығ полған полза даа, Самуил Иегованың чооғын прай толдыр салған. Сағын кӧр, Иегованың сӧстері прай тол парғаннар! Илийнің ікі оолғы ӧл парған, ол позы даа ӱреп парған.

Самуил — піске чахсы кӧзідім. Пасхалары хомай тудынзалар даа, ол орта тудынған. Син чи? Самуил чіли, хаҷан даа орта тудынарзың ма? Орта тудынзаң, Иегованы паза іҷе-пабаңны ӧріндірерзің.