УРОК 13
Тимофе́й кізілерге полызарға кӱстенген
Тимофей кізілерге ӧрініснең полысчаң чиит оол полған. Кізілерге полызар ӱчӱн, ол чорыхха кӧп чӧрҷең паза аның чуртазы уғаа хынығ полған. Син аннаңар піліп аларға хынчазың ма?~
Тимофейнің іҷезі паза тай іҷезі ағаа Иеговадаңар чоохтааннар
Тимофей Ли́стра саарда ӧскен. Кічіг полғанда, аның тай іҷезі, Лои́да, паза іҷезі, Евни́ка, ағаа Иеговадаңар чоохтааннар. Тимофей ӧс парғанда, кізілерге Иеговадаңар піліп аларға полызарға хынған.
Тимофей чиит оол полғандаох, Павел аны позынаң хада ыраххы хазналарда чахсы хабарны искірерге хығырған. Тимофей сах андох теен: «Йа, парам!». Ол пасхаларына полызарға тимде полған.
Тимофей Павелнең хада Македон чиріндегі Фессало́ник саарзар пар сыххан. Андар чидіп алар ӱчӱн, олар ӱр чазағ, анаң керіпнең парғаннар. Фессалоникте Павелнең Тимофей кӧп кізілерге Иеговадаңар піліп аларға полысханнар. Че анзы Фессалониктегілернің піреезінің кӧңніне кірбеен. Олар Павелге паза аннаң хада чӧрчеткеннерге хомай идібізерге хынғаннар. Аннаңар, оларға ол саардаң парыбызып, пасха чирлерде Худай сӧзін искірерге киліскен.
Тимофейнің чуртазы часкалығ паза хынығ полған
Нинҷе-де ай пазынаң Павел Тимофейні, Фессалониксер хатап парып, анда наа харындастарға полыс пирерге сурынған. Ол саарзар хатап килер ӱчӱн, махачы поларға кирек полған! Че Тимофей хорых парбаан. Фессалоникте чуртапчатхан пір киртіністіглерге сағыссыраан ӱчӱн, ол андар айланған. Аның кӱстенгені тикке полбаан. Ол Павел илҷее Фессалониктегі харындастар пик киртіністіг полчатханнаңар ӧріністіг хабар искірген!
Тимофей Павелнең хада кӧп чыллар нымысчыланған. Тимофей ӧмелерге прайзынаң артых полысханнаңар Павел пірсінде пас салған. Ол Иеговаа паза кізілерге тың хынған нооза.
Син чи, кізілерге хынчазың ма паза оларға Иеговадаңар чоохтирзың ма?~ Хынчатсаң, синің чуртазың, Тимофейнің чуртазы осхас, часкалығ паза хынығ полар!
