25 ПАСТАҒ

Хайди мастурбировать полбиныбызарға?

Мин сигіс частаң ала мастурбировать пол сыххам. Анаң Худай анзына хайди кӧрчеткенін піліп алғам. Мастурбировать полған соонда, мин позымны хырт кӧргем. Мин сағынғам: «Мин осхас кізее Худай хын полар ба?» (Луис)

СААРБАХ туста кізінің сексуальнай хынығыстары уғаа кӱстіг. Аннаңар піреезі мастурбировать пол сыхча a. Кӧбізі анзында пір дее хомай ниме чоғыл тіп санапча. Олар тіпчелер: «Анзының ӱчӱн пір дее кізі ӧлбеен!» Че анзынаң хыйа тудынарға кирек полчатханына аарлығ сылтағ пар. Павел илҷі пасхан: «Аның ӱчӱн постарыңның пу чирдегі ит-ханыңарны ӧлдірібізіңер... хыҷыхты» (Колосстағыларға 3:5). Мастурбация хыҷыхты кізіде ӧлдірбинче, че уламох анзын ӧскірче. Ағаа хоза...

● Мастурбировать полчатхан кізі позының хынығыстарынаңар ла сағынча.

● Мастурбировать полчатхан кізі пасха кізілерзер, позының сексуальнай хынығыстарын толдырҷаң нимее чіли ле кӧрче.

● Мастурбация кізіні позынаңар ла сағынарға кӧӧктірче. Анзы хоныхтағы сексуальнай палғалысха харығ поларға айабас.

Сексуальнай возбуждение пол килген ӱчӱн мастурбировать полар орнына, посты холда тударға кӱстен (1 Фессалониктегілерге 4:4, 5). Библияның чӧбінҷе чуртирға кӱстен. Сексуальнай хынығыстарны сығарчатхан киректердең хыйа тудын (Притчи 5:8, 9). Син анзына пӱкӱлее кір парған ползаң, ниме идерге? Арса, син ол кӧнігісті тастирға кӱстенгезің, че синің пір дее ниме киліспеен. Хол тӱзірібізерге оой: «Мин Худайның принциптерінҷе чуртап полбинчам! Паза хайди полам?» Педроның сах андағ сағыстар полғаннар. Ол піди тіпче: «Мастурбировать полған соонда, мағаа уғаа хомай полҷаң. Мин сағынҷам: „Минің пыромны пір дее тастап полбас“. Мағаа пазырарға уғаа сидік полған».

Синің андағох чувстволар полза, хол тӱзірбе. Ол кӧнігісті тобырып аларға оңдай пар. Чииттернің паза улуғ кізілернің аразында кӧп кізі ол кӧнігісті тобырып алған. Син дее аны тобырып аларзың!

Посты иртіре пыролаанын хайди тобырып аларға

Хайди кӧрдібіс, мастурбировать полчатхан кізі позын пыролапча. Анзы хомай нимес. Андағ пыросыныс Худайның кӧңніне кірче паза ол хомай кӧнігісті артыс саларға кӧӧктірер (2 Коринфтегілерге 7:11). Че посты иртіре пыролааны хорғысха ағылча. Кӧңнің саңай тӱс парза, син ол кӧнігістең паза харбас полбассың (Притчи 24:10).

Анзына орта кӧрерге кӱстен. Мастурбация — ол арығ нимес кӧнігіс. Ол кӧнігіс сині хыҷаланыстарға, «чуртас хыниина салынған хул» ит саларға паза саба сағыстар ӧскірерге айабас (Титке 3:3). Мастурбация ол сайбах тудыныс осхас аар чазых нимес (Иуданың 7). Аннаңар мастурбировать поларға кӧнік парған ползаң, ол пыро тасталбас чазых тіп сағынма. Ол хыҷаланысха тоғырлан паза аннаң харбазарын хаҷан даа тохтатпа!

Тыстан полбин хатап мастурбировать полған соонда хол тӱзір саларға оой. Паза харбазарың килбинібіссе, Притчи 24:16-ғы сӧстердеңер сағын кӧр: «Арығ чӱректіг кізі читі дее хати аңдарыл парар, че хайди даа турып алар. Чазыхтығ кізі, тізең, чобағ тузында аңдарыл парып, тур полбас». Ам тыстан полбаан ползаң даа, син хара сағыстығ кізі пол парбаазың, аннаңар холың тӱзірбе. Ноға пазох мастурбировать пол сыхханыңны піліп ал паза ол алҷаасты итпеске кӱстен.

Худайның хынызынаңар паза айапчатханнаңар сағынып аларға тус таап тур. Позының уйан сариларынаң, синӧк чіли, харбасхан Давид піди пасхан: «Хайди пабазы оолларына айапча, Иегова аннаң хорыхчатханнарға ідӧк айапча. Ол пісті нимедең пӱткенібісті чахсы пілче, піс чир тобырағы ла полчатханыбысты ундутпинча» (Псалом 103:13, 14). Я, піс толдыра нимес, чазых кізілер полчатханын Иегова пілче паза алҷаас итчетсебіс, ол «пыробысты тастирға тимде» (Псалом 86:5). Ідӧк ол пісті хомай кӧнігістерібісті тастазыннар тіп хынча. Піске анзында ниме полыс пирер?

Ӱтертіністерні сиргек талла. Сексуальнай хыҷаланыстарға кӧӧктірчеткен фильмнерні, телевизионнай программаларны кӧрчезің ме? Сайбах сайттарзар кірчезің ме? Псалмопевец Худайға піди пазырған: «Турыстығ нимес нимелердең харахтарымны хыйа ит» (Псалом 119:37) b.

Пасха нимедеңер сағынарға ӱгреніп ал. Христианин Уильям чӧп пирче: «Узир алнында пірее духовнай ниме хығырып ал. Узир алнында халғанҷы сағыс чахсы нимедеңер поларға кирек» (Филипптегілерге 4:8).

Пу сидіктеңер пірее кізінең чоохтазып ал. Ол сидіктеңер піреезінең чоохтазарға уйадыстығ пілдірер. Че аннаңар піреезіне чоохтап пирзең, анзы сағаа ол кӧнігісті тобырып аларға полыс пирер. Христианин Давид піди тіпче: «Мин аннаңар пабамнаң чоохтазып алғам. Ол мағаа тарынминчатханын кӧр салғамда, минің чӱрееме уғаа ниик пол парған. Ол мағаа паарсаснаң теен: „Мин сағаа поғдархапчам“. Мағаа ол сидіктеңер чоохтап пирерге хайди аар полғанын ол пілген. Пабамның сӧстері минің кӧңнімні кӧдіргеннер паза аннаң андар харбазарға кӱс киргеннер.

Ол Ызых Пічікті азып, нинҷе-де сағыс кӧзіт пирген паза мин аар чазых ит салбаанымны піліп аларға полыс пирген. Минің тудынызым нинҷе хомай піліп алғам ма, чох па піліп алар ӱчӱн, миннең хада нинҷе-де библейскай стих ӱзӱрібіскен. Ол теен: „Ам хатап орта тудынарға кӱстен“. Соонаң пу сурығны хатап ӱзӱрерге сӧс пирген. „Хатап мастурбировать полыбыссаң, хол тӱзірбе, че мастурбировать полбин кӧп арах тус тыстан кӧр“, — хосхан ол». Давид нимее ӱгреніп алған? Ол теен: «Минің сидігімні кем-де пілчеткені паза мағаа полысчатханы мағаа тың полыс пирген» c.

МЫНЫҢ СООНДАҒЫ ПАСТАҒДА

Полар-полбас кізінең секс — пырозы чох ниме тіп сағынчалар. Че анзы андағ нимес. Ноға? Піліп ал.

[Сноскалар]

БИБЛИЯДАҢ АЛЫЛҒАН ӦӦН СТИХ

“Постаң тустың хынығыстарына сабылба. Хан-пигібісті арығ чӱрекнең хығырынчатхан кізілернең хада сынға, киртініске, хынысха, амырға чағын тудынарға кӱстен”. 2 Тимофейге 2:22

ЧӦП

Мастурбировать поларың килібіссеӧк, пазыр. Хыҷыхтанысты тобырып алар ӱчӱн, Иеговадаң кӱс суран (2 Коринфтегілерге 4:7).

ПІЛЧЕЗІҢ МЕ...?

Посты холда тут полбинчатхан кізі сексуальнай хынығыстарына сабылча, кӱстіг кізі, тізең, аны пірдеезі кӧрбинчетсе дее, посты холда тутча.

ПЛАН ПАЗЫП АЛ!

Сағызым арығ тут полам, хаҷан ․․․․․

Хыҷыхтаныстарыма сабылар орнына, мин ․․․․․

Пу сурығларны іҷе-пабама турғызарға хынчам ․․․․․

ХАЙДИ САҒЫНЧАЗЫҢ?

● Ноға Иегова «пыро тастирға тимде» полчатханын ундутпасха кирек? (Псалом 86:5).

● Худай кізілерні сексуальнай кирексіністернең чайап салған, че олох туста посты холда тударға чоохтапча. Аннаңар аның синнең ниме киректирге правозы пар?

[Вставка]

‘‘Мин сидігімні тобырып алғам. Ам Иегованың алнында минің совезім арығ. Анзын мин пір дее нимее орнастырбассым!’’ (Сара)

[Хоос]

Марығда чарысчатхан кізінің аңдарыл парғаны ағаа марығны хатап пастирға кирек полчатханын таныхтабинча. Мастурбировать полбасха кӱстенчетсең, тыстан полбин халзаң даа, харбазарын тохтатпа