8 ПАСТАҒ

Хайди чахсы нанҷыларны таап аларға?

Тарынчатсам, кемге-де чоохтап пирерім килче. Кӧңнім тӱс парза, кем-де мағаа: «Прай ниме чахсы полар», — тіп чоохтап пирерін сағыпчам. Часкалығ ползам, ӧрінізімнең кемнең-де ӱлезіп аларға маңзырапчам. Хайди нанҷылар чох чуртирға пілбинчем! (Бриттани)

ПАЛАЛАРҒА хада ойнирға палалар кирек. Улуғ кізілерге нанҷылар кирек. Олар нименең пасхалар?

Хада ойнапчатхан арғыснаң син тус ла иртірчезің.

Нанҷың син аарлыға санапчатхан нимелерні ідӧк аарлыға санапча.

Ағаа хоза, Библияда чоохталча: «Сын нанҷы хайдағ даа туста хынча, ол чобағ тузына тӧреен харындас» (Притчи 17:17). Мында хумда ойнапчатхан палаларның палғалызынаң хай-хай тирең палғалыстаңар чоохталча.

Факт. Ӧзіп одырзаң, сағаа нанҷылар кирек полар, хайзылары:

1) чахсы качестволығлар;

2) пӧзік нормаларҷа чуртапчалар;

3) сині чахсы саринзар тартчалар.

Сурығ. Андағ нанҷыларны хайди таап аларға? Кӧр кӧреең.

1. Чахсы качестволар кирек

Сағаа ниме пілерге кирек? Полған на синің нанҷыңмын тіпчеткен кізі сынында сағаа сын нанҷы нимес. Библияда «удур-тӧдір ыра-чара тартыбызарға тимде нанҷылар полчалар» тіп пазылча (Притчи 18:24). Андағ ниме полбинча тіп сағынчазың ма? Арса, синің дее андағ нанҷы полған: син аны нанҷаа санаазың, ол, тізең, синнең тузаланған паза синнеңер чоох таратхан. Аның ӱчӱн син ағаа ізенмин сыххан поларзың a. Ундутпа, андағ кізілернең нанҷыласханҷа, асхынах нанҷылар ползын.

Ниме ит кӧрерге чарир? Кӧӧгерге турыстығ нанҷыларны талла.

«Минің ӧӧремнеңер, Фионадаңар, уғаа кӧп чахсы нимелер чоохтапчалар! Миннеңер дее ідӧк чоохтазыннар тіп хынчам. Андағ ӧӧрем парына уғаа ӧрінчем» (Иветт, 17 час).

Пу тоғысты ит сал.

1. Галат чиріндегілерге 5:22, 23 хығырып ал.

2. Позыңнаң сурыбыс: «Минің нанҷыларымның Худай худының нимізіне кірчеткен качестволар пар ба?»

3. Иң чағын нанҷыларыңның аттарын мында пас сал. Полған на нанҷыңның адыңның хыринда аның качествозын пас сал.

Ады

․․․․․

Качествозы

․․․․․

Чӧп. Хомай ла качестволар сағысха кірчетсе, сағаа наа нанҷылар тілирге кирек, арса.

2. Пӧзік нормалар кирек

Сағаа ниме пілерге кирек? Нанҷылар пір дее таап полбинчатсаң, хайдағ ла полза кізілернең нанҷылас сығарға хорғыс пар. Библияда чоохталча: «Алығларнаң чӧрчеткен кізі... чобаға кір парар» (Притчи 13:20). Мында «алығ» тіп сӧс сағыстары хомай паза хомай ӱгренчеткен кізілерні таныхтабинча, че хыйға чӧптерні паза нравственнай нормаларны хыйа итчеткен кізілердеңер чоохталча. Пір саблығ поэт піди чоохтаан: «Кемнең не хада полғанҷа, чалғызан полғаны артых»!

Ниме ит кӧрерге чарир? Синнең нанҷылазарға тимде ноо даа кізінең нанҷыласпа, сизіктіг пол (Псалом 26:4). Че анзы кізілердеңер азынада хомай сағынғанын таныхтабинча. Сизіктіг полғаны «арығ чӱректіг паза хара сағыстығ, Худайға нымысчыланчатхан паза ағаа нымысчыланминчатхан кізілернің пасхазын» кӧріп оңнаанын таныхтапча (Малахия 3:18).

«Іҷе-пабам мағаа миннең тиң частығ духовнай христианнарның аразында нанҷыларны таап аларға полыс пиргеннер. Аның ӱчӱн мин оларға уғаа алғыстығбын» (Кристофер, 13 час).

Пу сурығларға нандыр кӧр:

Нанҷыларым мині пірее хомай кирекке тартып аларлар тіп сағыссырапчам ма?

□ Я

□ Чох

Нанҷыларым іҷе-пабамның кӧңнілеріне кірбес тіп, оларны іҷе-пабамнаң чазырчам ма?

□ Я

□ Чох

Чӧп. Пу сурығларға «я» тіп нандырған ползаң, пӧзік арах моральнай нормалығ паза христианскай ӧмеде чахсы репутациялығ кізілер аразында чахсы нанҷыларны тіле.

3. Чахсы саринзар алыстырарға кирек

Сағаа ниме пілерге кирек? Библияда чоохталча: «Чабал кізілернең нанҷыласханы чахсы хылыхтарны ардатча» (1 Коринфтегілерге 15:33). Лорен чоохтапча: «Миннең хада ӱгренчеткен палалар мин оларға тӧӧй пол парзам на, миннең нанҷылазарлар. Мағаа ирістіг полған, аннаңар мин оларға тӧӧй поларға пӧгін алғам». Лорен піліп алған: пасхаларының соонҷа парзаң, син оларның холында пешка пол парчазың. Олар сині хайди хынчалар, іди итчелер. Син хай-хай артых нимее турыстығзың!

Ниме ит кӧрерге чарир? Оларға кирек оңдайнаң тудынарға кӱстепчеткен кізілердең оортах тудын. Синің нанҷыларыңның саны асхынах пол парза даа, син позыңны улуғлирзың паза сын нанҷыларны таап аларзың. Олар сині чахсы саринзар тартарлар (Римдегілерге 12:2).

«Минің нанҷым Клинт ибіре сағынып оңнапча паза сизіктіг. Ол сыбыра мағаа хабасча» (Джейсон, 21 час).

Позыңнаң сурыбыс:

Нанҷыларымның кӧңніне кірер ӱчӱн, мин мының алнындағызының хыринда хомай тонан сыххам ма, хомай чоохтас сыххам ма паза хомай тудын сыххам ма?

□ Я

□ Чох

Нанҷыларымнаң хада позымның алынҷа хаҷан даа чӧрбес ікінҷілестіг чирлерзер чӧрчем ме?

□ Я

□ Чох

Чӧп. Пу сурығларға «я» тіп нандырған ползаң, іҷе-пабаңзар алай пасха даа кізізер чӧп сурынып айлан. Син Иегованың киречізі ползаң, ах сағалның чахсы саринзар тартар нанҷы таап пирзін тіп сурын.

ПУ ТЕМА ІДӦК 2-ҶІ ТОМДА, 9-ҶЫ ПАСТАҒДА ӰЗӰРІЛЧЕ

МЫНЫҢ СООНДАҒЫ ПАСТАҒДА

Синің нанҷыларың алай позыңның чӱреең хайдағ-да хомай ниме идерге кӧӧктірчетсе, ниме идерге? Анзына хайди тоғырланарға піліп ал!

[Сноска]

БИБЛИЯДАҢ АЛЫЛҒАН ӦӦН СТИХ

“Харындастаң даа артых хынчатхан нанҷы полча”. Притчи 18:24

ЧӦП

Пӧзік нормаларҷа тудынзаң, синзер андағох кізілер тартыларлар. Андада синің иң чахсы нанҷылар полар!

ПІЛЧЕЗІҢ МЕ... ?

Худай сырай таллабинча, че позының одаанзар кемні ааллап хығырарға пӧкчетсе, чахсы сағынып алча (Псалом 15:1— 5).

ПЛАН ПАЗЫП АЛ!

Чахсы нанҷылар таап алар ӱчӱн, мин...

Кемнең мин чағын танызып аларға хынчам (миннең улуғ арах кізілернің санынаң):

Іҷе-пабама турғызарға хынчатхан сурығлар:

ХАЙДИ САҒЫНЧАЗЫҢ?

● Нанҷыларыңның хайдағ хылыхтары кӧңніңе тың кірчелер паза ноға?

● Чахсы нанҷы полар ӱчӱн, сағаа хайдағ хылыхтарны тилідерге кирек?

[Вставка]

‘‘Іҷе-пабам мағаа пірее таныстарымнаң оортах тудынарға кирек тееннерін испеем. Мағаа артых нанҷылар чоғыл тіп пілдірген. Че іҷемнең пабам орта чоохтаптырлар. Мин анзын піліп алғамдох, кӧр салғам: ибіре нанҷылазарға турыстығ уғаа чахсы палалар толдыра’’ (Коул)

[Рамка]

Піди тудын кӧр

Іҷе-пабаңнаң чоохтас кӧр. Чиит туста оларның хайдағ нанҷылар полған тіп сур кӧр. Хаҷан-да кемнең-де чағын нанҷыласханнаңар ачырғанчалар ба? Мының алнында постары урунған сидіктерге хайди сағаа кір парбасха чоохтап пирзіннер.

Нанҷыларыңны іҷе-пабаңнаң таныстыр сал. Таныстырарға хынминчатсаң, сағын кӧр: ноға? Іҷе-пабаңның кӧңнілеріне кірбестер тіп сағынча поларзың. Андағда сағаа нанҷыларыңны хыйға таллирға кирек.

Ситкеп ис. Нанҷың хайди чуртапчатханын, нимедеңер ол сағыссырапчатханын піліп аларға кӱстен (Филипптегілерге 2:4).

Пыро тастирға ӱгрен. Тимде пол: нанҷыларыңның читпес сарилары полар. «Прайзыбыс таа кӧп чазых идедірбіс нооза» (Иаковтың 3:2).

Нанҷыңның ээзі полба. Нанҷыларыңны синнең не нанҷылассыннар тіп кӱстебе. Сағаа полызығ кирек полза, сын нанҷылар хаҷан даа полызарға тимде поларлар (Экклезиаст 4:9, 10).

[Хоос]

Пасхаларының соонҷа парзаң, син оларның холында пешка пол парчазың. Олар сині хайди хынчалар, іди итчелер