35 ПАСТАҒ

Хайди Худайның нанҷызы полып аларға?

Джеремиге уғаа аар полғанда, ол Худайнаң нанҷыласханы нинҷе аарлығ полчатханын піліп алған. Ол чоохтапча: «Мағаа 12 час полғанда, пабам пісті тастап парыбысхан. Пірсінде хараазын мин Иеговаа пабамны нандыра айландырзын тіп матап пазырғам».

Джереми, сыдаҷаа чох полғанда, Библия хығыр сыххан. Псалом 10:14-ке читкенде, тын таа полбиныбысхан. Ол стихта Иеговадаңар піди чоохталча: «Ӧкіс пала [«пабазы чох халған оолах», сноска] позын сағаа пир салча. Син позың аның полысчызы пол парғазың». Джереми сағысха кирче: «Мағаа Иегова минзер айланча, минің полысчым, минің Пабам полча тіп пілдір парған. Ол иң чахсы паба, аннаң артых паба чоғыл!»

АРСА, син дее, Джереми чіли, чобалчазың. Чобалбинчатсаң даа, Иегова сині аның нанҷызы ползын тіп хынча. Библияда чоохталча: «Худайға чағдаңар — сірерге Ол чағдирох» (Иаковтың 4:8). Сағын на кӧр: ниме анзы таныхтапча? Син Иегованы кӧрбинчетсең дее, ол синнең час полбаза даа, сині позының нанҷызы поларға хығырча!

Сынында, Худайның нанҷызы полып алар ӱчӱн, кӧп кӱс саларға кирек. Кӧзідімге, син ибіңде чахайах ӧскірчезің. Аны суғлабазаң, андар удобрение салбазаң, ол ӧспес, хурғап таа парар. Анзы Худайнаң ынархасханына тӧӧй. Хайди андағ ынархасты «ӧскіріп аларға»?

Ӱгренгені аарлығ

Ынархазар ӱчӱн, чоохтанарға ла нимес, истерге дее кирек. Худайнаң ынархасханы андағох. Библия хығырчатсабыс паза істесчетсебіс, ол піске ниме чоохтап пирерге хынчатханын исчебіс (Псалом 1:2, 3).

Че ӱгренерге хынминчатсаң чи? Библия ӱгренгенҷе, син телевизор кӧріп аларға алай нанҷыларыңнаң хада тус иртірерге хынарҷыхсың, арса? Че пасха оңдайнаң Худайға нанҷы пол полбас. Аның Сӧзін істезіп, ол ниме чоохтапчатханын истерге кирек.

Пичелленме, Библия ӱгренгені ирістіг полбас. Кинделер хығырарға хынминчатсаң даа, Библияны істезерінде ӧрініс таап поларзың. Пастап Библия ӱгренеріне тус таап ал. Лайш тіп аттығ хыс чоохтапча: «Минің график пар. Иртен сай мин Библиядаң пір пастағ хығырчам». 15 частығ Марияның пасха график. Ол тіпче: «Мин узир алнында Ызых Пічиин кӧп нимес хығырып алчам».

Библияны график хоостыра хығырар алнында  «Библияны позың істес» тіп рамканы хығырып ал. Хаҷан Библияны 30-ча минут хығыр поларзың алтында пас сал.

․․․․․

График пастағы ла алтым. Библияны ӱгрен сыхсаң, анда тирең сағыстар пазылчатханын піліп аларзың. Син 11 частығ Джезриел чіли сағынчазың, арса. Ол тіпче: «Библияның пірее кизектерін хығырарға хынығ нимес паза уғаа сидік полча». Че холларың тӱзірбе. Библия ӱгренчетсең, позыңның нанҷыңның, Иегова Худайның чооғын исчем тіп сағын. Син позың Библия ӱгредиин хынығ паза тузалығ ит поларзың!

Пазырыс аарлығ

Пазырыс — ол Худайнаң чоохтасханы. Сағын на кӧр, Худай сағаа хайдағ аарлығ сыйых сыйлап пирген! Сағаа андар ноо даа туста, хараа-кӱнӧрте айланарға оңдай пар. Иегова Худай сині истерге хаҷан даа тимде. Ағаа хоза, ол сині истерге хынча. Аннаңар Библияда пазылча: «Пазырчатсаңар, сурынчатсаңар, кӧңніңерні алғыстаснаң Худайға ас пир турыңар» (Филипптегілерге 4:6).

Хайди пу стихтаң кӧрінче, Иеговаа кӧп нимедеңер чоохтирға чарир. Кӧзідімге, сидіктеріңнеңер паза сағыссырастарыңнаңар. Ідӧк Худайны кӧп нименің ӱчӱн алғыстирға чарир. Нанҷың сағаа пірее чахсы ниме ит пирзе, алғыстабассың ма? Иегова сағаа нинҷе кӧп ниме итче, пір дее нанҷы сағаа анҷа кӧп ниме ит полбас. Аны алғыстирға кирек нимес пе? (Псалом 106:1).

Нименің ӱчӱн син Иеговаа алғыстығзың пас сал.

․․․․․

Пірееде сағаа хорғыстығ даа полча паза сағыссырастарға даа пастырчазың. Псалом 55:22-де чоохталча: «Чӱгіңні Иеговаа артыбыс. Ол сағаа хабазар. Арығ чӱректіг кізее аңдарыл парарға ол хаҷан даа пирбес».

Хайдағ сағыссырастарыңны Иеговаа пурнада чоохтап пирерге хынчазың пас сал.

․․․․․

Худай сағаа полысча

Худайнаң нанҷылазар ӱчӱн, ол сағаа хайди полысчатханын сизінерге кирек. Давид теен: «Амзап, Иегованың паарсазын піліп алыңар». 34-ҷі псаломны пазар алнында Давид нинҷе-де хати сала ӧл парбаан. Саул хан аны ӧдірібізерге чахаан. Ағаа ыырҷыларының, филистим чонының, аразында чазынарға киліскен. Ӧдірт саларға хорғыс полғанда, ол алығ кізі полыбызып, хайхастығ оңдайнаң тіріг халған.

Давид позының кӱзінең тіріг халған тіп санабаан. Ол анзында Худайның холын кӧрген. Олох псаломда ол пасхан: «Мин Иеговадаң сурынғамда, ол мағаа нандырған паза прай хорғыстарымны чох иткен» (Псалом 34:4). Давид чуртазында Иегованың полызиин кӧрген, аннаңар пасхаларын кӧӧктірген: «Амзап, Иегованың паарсазын піліп алыңар» *.

Иегова хаҷан-да сағаа полысханын сағысха кир поларзың ма? Хайди полысханын алтында пас сал. Хайдағ-да хайхастығ ниме тілебе. Кӱннің дее полчатхан киректер аразында кӧргле.

․․․․․

Арса, сині Библиядағы сыннарға іҷе-пабаң ӱгреткен. Андағ полза, аны аарлыға сана. Че ундутпа, сағаа Худайнаң позыңа ынархазарға кирек. Пу пастағ сағаа пастағы алтым идерге полыс пирер. Иегова, тізең, кӱс салғаныңны алғастир. Библияда чоохталча: «Полған на сурынған кізі алып алар, тілеен кізі табар» (Матфей 7:7).

[Сноска]

БИБЛИЯДАҢ АЛЫЛҒАН ӦӦН ТЕКСТ

«Духовнай кирексіністерін сизінчеткеннер часкалығлар» (Матфей 5:3, НТ).

ЧӦП

Кӱннің сай тӧртер дее страница хығырзаң, син пір чылға Библияны хығырыбызарзың.

ПІЛЧЕЗІҢ МЕ...?

Синің пу киндені хығырчатханың паза Библияның пу киндеде пирілчеткен чӧптерінҷе тудынчатханың, Иегова сағаа хайығ салчатханын кӧзітче (Иоанн 6:44).

План пазып ал!

Библия ӱгренгенінең кӧп арах туза алып алар ӱчӱн, мин ․․․․․

Пазырарға ундутпас ӱчӱн, мин ․․․․․

Іҷе-пабама турғызарға хынчатхан сурығларым: ․․․․․

ХАЙДИ САҒЫНЧАЗЫҢ?

● Хайди Библия ӱгредиин хынығ арах идіп аларға?

● Ноға Иегова чазыхтығ кізілернің пазырыстарын истерге хынча?

● Хайди пазырыстарны чахсыландырарға?

[Вставка]

«Мының алнында мин пір ле оңдайнаң пазырҷаң полғам. Амды, тізең, Иеговаа пӱӱн полған чахсы даа, хомай даа киректерімні чоохтапчам. Кӱннің сай тӧӧй киректер полбинчалар, аннаңар пазырыстарым даа аймах-пасха полчалар» (Эва).

[Рамка/хоос]

 Библияны позың істес

1. Библияда ниме хығырып аларға хынчазың сағынып ал. Ол кизекті піліп аларға полыс пирзін тіп Худайға пазыр.

2. Ситкеп хығыр. Маңзыраба. Хығырчатсаң, позыңны анда, ол тустарда, ол киректерде араласчатхан чіли сағын. Полчатхан киректерні харахтарыңнаң кӧрчеткен чіли хығыр. Ӱннерні истерге, чыстарны чыстирға, чиистің татхынын піліп аларға кӱстен. Хығырған ниме синің сағызыңда тіріл парзын!

3. Хығырған соонда сағынып ал. Позыңа сурығлар турғыс, кӧзідімге, мындағ:

● Ноға мыны Иегова позының Сӧзінде пас салған?

● Хайдағ кӧзідім кӧӧгерге турыстығ, че хайдағ кӧзідім сизіндіріг ползын тіп пазылған?

● Хығырған нименең хайди чуртаста тузалан полам?

● Иеговадаңар паза аның хайди тудынчатханынаңар ниме піліп алдым?

4. Хысхаҷахти Иеговаа пазырып ал. Библияны ӱгреніп ниме піліп алғаныңны, хайди ол пілістернең тузаланарға сағынчатханыңны ағаа чоохтап пир. Иегова сағаа аарлығ сыйых, позының Сӧзін, Библияны, пирген ӱчӱн алғыстирға ундутпа!

[Хоос]

«Синің Сӧзің — минің азағыма чарытхы полча паза минің чолымны чарытча» (Псалом 119:105).

[Рамка/хоос]

Пурун тастар, анаң хум

Пазырарға маң чоғыл? Библияны ӱгренерге тус таппинчазың? Удаа анзы нимені пастағы орынға турғысчатханыңнаң палғалыстығ.

Эксперимент турғыс кӧр. Кӧнекке чоон тастар сал сал. Оларның аразына кӧнекке толдыра хум ур сал. Кӧнегіңе тастар даа, хум даа сыып парды.

Ам кӧнектегі нимелерні пірее чирзер ипти ур сал. Анаң пастап хумны, соонаң тастарны нандыра сал сал. Тастар сыңминчалар ба? Пурун хумны урғазың, аннаңар сыңминчалар.

Нимее ӱгреніп алдыбыс? Библия «иң артыхты таллирға» чӧп пирче (Филипптегілерге 1:10). «Хумны», кӧзідімге, ӱтертеністі, пастағы орынға турғысса, духовнай киректерге тус халбас. Чуртазыңда иң аарлығ нимелерні пастағы орынға турғыссаң, Худайның Хан-ӱлгӱзіне дее, тынанарға паза ӱтертенерге дее тус чидер. Анзы ниме син кӧнекке иң пурун сал салғаныңнаң палғалыстығ!

[Хоос]

Худайнаң ынархасханы чахайахха тӧӧй. Аны мааннирға кирек, андада ла ол чахайахтанар