Пала тӧреені ирепчілернің кӧбізіне кӧп ӧрініс, олох туста хорылыс ағылча. Паланы кӧрерге кӧп тус алай кӱс парчатханы хайхастығ пілдірер дее. Наа сағыссырастар паза уйғу читпинчеткені ирепчінің палғалызын пірееде уйан идібісчелер. Паланың соонҷа кӧрерге маңнанар паза удур-тӧдір пик палғалыстығ полар ӱчӱн, сірерге наа чуртасха кӧнігерге кирек полар. Сидіктерні тобырарға библейскай чӧптер сірерге хайди полыс пирерлер?

БИБЛИЯ НИМЕ ЧООХТАПЧА. «Хыныс тыстанча, хыныс айапча». Ағаа хоза, «посха ла тартынминча, тыртыстанминча» (1 Коринфтегілерге 13:4, 5). Чиит іҷенің сағызы палада ла полчатханы хайхастығ нимес. Иріне, тізең, анынаңар ундут салғаннар тіп пілдірче полар. Аннаңар ипчізі иріне хайығ саларға ундутпасха кирек. Ипчізінің тыстанызы паза паарсазы ирін аарлыға санапчатханын паза пала кӧрерінде ол аарлығ полызығ итчеткенін пілінерге полызар.

«Сірер дее, ирлер, ипчілеріңнең чуртап, піліңер: олар порт ідіс осхастар» (1 Петрның 3:7). Ипчізінің уғаа кӧп кӱзі пала кӧрерге парыбыс турарын ирі санға аларға кирек. Паланаң палғалыстығ наа киректер ӱчӱн, ипчізінің сыбыра аны майыхтырчатхан алай депрессияға даа ағылчатхан сидіксіністер поларлар. Пірееде ипчізі иріне ӧкпеленер дее, че «ӧкпеленерге маңзырабинчатхан кізі кӱстіг кізінең артых», аннаңар иріне амыр тудынарға кӱстенерге кирек (Притчи 16:32). Сизіктіг полыңар паза ипчіңерге, полызығ кирек полза, полызыңар (Притчи 14:29).

ТУЗАЛЫҒ ЧӦПТЕР

• Пабаларға. Ипчіңерге хараазын даа паланы кӧрерге полызыңар. Пасха итчең киректерні хызырып, ипчіңернең паза палаңарнаң кӧп арах тус хада иртіріңер

• Іҷелерге. Иріңер пала кӧрерге полызарға хынчатса, ол полызығны хыйа итпеңер. Сірер хайди хынчазар, ол іди итпинчетсе, аны хомайлабаңар, че хайди орта идерге паарсаснаң кӧзіт пиріңер

БИБЛИЯ НИМЕ ЧООХТАПЧА. «Олар ікӧлең пір кізі осхас пол парарлар» (Матфей 19:5). Сӧбіреде пала тӧріп парза даа, сірер хада чуртапчатханнаң «пір кізі осхас» полчатханнарыңны ундутпаңар. Удур-тӧдір палғалыстарыңны тыыдарға прай кӱс салыңар.

Ипчілер, ирлеріңе полызығ паза хабазығ ӱчӱн алғыстығ полыңар. Сірернің алғыстығ сӧстерің, имнепчеткен чіли, пілдірер дее (Притчи 12:18). Ирлер, ипчілеріңе хынчатханнарыңны паза оларны аарлапчатханнарыңны кӧзідіңер. Олар хайди сӧбіредеңер сағыссырапчатханын кӧріп, оларны алғыстаңар (Притчи 31:10, 28).

«Пірдеезі постин тілебезін, че пасхазына туза идерге кӧрглезін» (1 Коринфтегілерге 10:24). Хада чуртапчатханыңарның кирексіністерінеңер хаҷан даа ундутпаңар. Ікӧлең чоохтазып аларға тус табыңар, махтирға ундутпаңар паза удур-тӧдір ситкеп ис турыңар. Интимнай чуртаста позының на кирексіністеріңнеңер сағынарға чарабас. Ипчіңнің алай иріңнің кирексіністерін ідӧк санға аларға кирек. Библияда чоохталча: «Чара хонмаңар. Хада чоохтас салза ла... чара поларға чарир» (1 Коринфтегілерге 7:3—5). Аннаңар пу сурығны чалтанмин ӱзӱріңер. Удур-тӧдір пілізіс кӧзідіп, тыстаныснаң тудынзар, палғалыстарың пик полар.

ТУЗАЛЫҒ ЧӦПТЕР

• Ікӧлең полып аларға тус тапханы аарлығ полчатханнаңар ундутпаңар

• Кӧңні кӧдірчеткен открытка, СМС-ка алай кічиҷек сыйых тіп оох-теек нимелердеңер ундутпаңар: олар хада чуртапчатханыңарға хынызыңарны кӧзідер

БИБЛИЯ НИМЕ ЧООХТАПЧА. «Син Худайның Пічиин кічігдең пілчезің нооза. Ол Христос Иисусха киртініс пастыра арачыланарға сағыс пирче» (2 Тимофейге 3:15). Хайди палаңарны ӱгредерінеңер чахсы иде сағынып алыңар. Тӧрир алнындох, ол прай нимее хайхастығ оңдайнаң ӱгреніп пастапча. Пала іҷезінің істіндӧк, сірернің ӱніңерні танирға паза кӧңніңеріңе хайарға ӱгренче. Палаңарға пастағы кӱннернең сығара хығырыңар. Сірер хығырчатхан сӧстерні ам пала піл полбинчатса даа, ӧс парза, ол хығырарға хынар.

Палаа Худайдаңар тӧрееннең сығара чоохтирға чарир. Сірер хайди Иеговаа пазырчатханнарыңны пала иссін (Второзаконие 11:19). Паланаң ойнапчатсар даа, Худай чайаан нимелердеңер чоохтаңар (Псалом 78:3, 4). Пала ӧсчетсе, Иеговаа хынчатханнарыңны кӧріп, ідӧк Иеговаа хынарға ӱгренер.

ТУЗАЛЫҒ ЧӦПТЕР

• Паланы ӱгредерге кирек хыйғадаңар пазырыста сураныңар

• Паланы сӧстерге паза аарлығ сыннарға хатап-хатап чоохтап ӱгредіңер. Іди ол кічігдең сығара ӱгреніп пастир