Хайди пу брошюрада чоохталған, Библияда сірерге паза сірернің сӧбіреңерге тузалығ принциптер кӧп. Сірерні часкалығ ползыннар тіп Иегова хынча. Худайға нымысчыланғаны чуртазыңарның пастағы орнында полза, «пасхазы [кирек нимелер]... сірерге хоза пирілер» тіп Худай Сӧзі молҷапча (Матфей 6:33). Сірерні Худайның нанҷылары ползыннар тіп ол тың хынча. Худайнаң палғалыстарыңны тилідерге полысчатхан прай нимелернең тузаланыңар. Худайға нанҷы полғаны кізее иң улуғ улуғлас полча (Матфей 22:37, 38).

БИБЛИЯ НИМЕ ЧООХТАПЧА. «Мин сірернің пабаларың полыбызарбын. Сірер Минің оолларым паза хыстарым полыбызарзар. Іди Прай нимедең кӱстіг Хан Худай тіпче» (2 Коринфтегілерге 6:18). Сірерні Иеговаа чағын нанҷылары пол парзыннар тіп Худай хынча. Анзына пазырыс полысча. Иегова пісті: «Сыбыра пазырыңар», — тіп кӧӧктірче (1 Фессалониктегілерге 5:17). Постарыңның сағыссырастарыңнаң паза чазыт сағыстарыңнаң Худайнаң ӱлесчетсер, ол истерге хаҷан даа тимде (Филипптегілерге 4:6). Сӧбіренең хада пазырчатсар, Худай сірерге сынап пар полчатханын чағын кізілерің кӧрерлер.

Худайға пазырғаны ла нимес, че аны искені дее уғаа аарлығ. Худайның Сӧзін паза Библияда тӧстелген пічіктерні істезіп, Худайны ис поларбыс (Псалом 1:1, 2). Піліп алған нимелердеңер сағыныңар (Псалом 77:11, 12). Худайны истер ӱчӱн, христианскай чыылығларға сыбыра чӧрерге кирек (Псалом 122:1—4).

Ағаа хоза, Иеговадаңар пасхаларына чоохтазар, Худайнаң палғалызыңарны тыыт поларзар. Анзын нинҷе кӧп идерзер, анҷох Худайға чағын поларзар (Матфей 28:19, 20).

ТУЗАЛЫҒ ЧӦПТЕР

• Библия хығырарға паза пазырарға кӱннің сай тус табыңар

• Сӧбіреңерде тынағ паза ӱтертініс нимес, че духовнай киректер пастағы орында полар ӱчӱн кӱс салыңар

БИБЛИЯ НИМЕ ЧООХТАПЧА. «Худайға чағдаңар — сірерге Ол чағдирох» (Иаковтың 4:8). Сӧбіре пазырызын хаҷан иртірерге азынада сағынып ал турыңар паза аның хоостыра тудыныңар (Бытие 18:19). Ағаа хоза, кӱннің сай итчеткен киректер тузында Худайдаңар ундутпасха кирек. «Ибде одырчатсаң, чолҷа парчатсаң, узирға чатчатсаң паза турчатсаң, олардаңар [Худай сӧстерінеңер] чоохта» тіп хығырығ хоостыра тудынзар, сӧбіредегілернің Худайнаң палғалыстары тыып одырар (Второзаконие 6:6, 7). Анзында Иисус Навин чахсы кӧзідім полған. Ол теен: «Мин паза минің ибім — піс Иеговаа нымысчыланарбыс» (Иисус Навин 24:15).

ТУЗАЛЫҒ ЧӦПТЕР

• Сӧбіредегілернің полғанының на кирексіністерінеңер сағынып, хайдағ тема ӱзӱрерін азынада сағынып алыңар