Хоных хонза, наа сӧбіре тӧрепче. Сірер іҷе-пабаңарға хаҷан даа хынарзар паза улуғлирзар. Че хоных хонған соонда, иріңер алай ипчіңер сірерге прай кізілернең аарлығ кізі пол парча. Туғаннарыңның піреезіне ол алызыға кӧнік парарға аар даа полар. Наа сӧбіре палғалыстарын пӱдіріп, сірерге хыйға тудынарға паза туғаннарыңнаң ынағ чуртирға библейскай принциптер полызарлар.

БИБЛИЯ НИМЕ ЧООХТАПЧА. «Паба-іҷеңні улуғла» (Ефестегілерге 6:2). Сірерге нинҷе дее час полза, іҷе-пабаңарны улуғлирға паза аарлирға кирексер. Хоных хонғаннарың кемнің-де оолғы алай хызы полча. Аннаңар ағаа іҷе-пабазына хайығ саларға кирек полчатханнаңар ундутпаңар. «Хыныс істі-чохтанминча», аннаңар хада чуртапчатханыңны іҷезіне алай пабазына кӱнирге саба полар (1 Коринфтегілерге 13:4; Галат чиріндегілерге 5:26).

ТУЗАЛЫҒ ЧӦПТЕР

• Кӧбізі чоохтанчатхан чіли: «Синің іҷе-пабаң сыбыра мағаа хазалчалар» алай «Іҷеңнің кӧңніне хаҷан даа кір полбас», — тіп чоохтанмаңар

• Хада чуртапчатханың прай нимее хайди кӧрчеткенін піліп аларға кӱстен

БИБЛИЯ НИМЕ ЧООХТАПЧА. «Ир кізі, паба-іҷезінең чарылып, ипчізінең пірік парар. Олар ікӧлең пір кізі осхас пол парарлар» (Матфей 19:5). Іҷе-пабаң син хоных хон салған соонда даа, синің ӱчӱн нандырығ тутча тіп сағынча поларлар. Олар сірернің сӧбіреңердегі киректерге тимеер ара кірчелер, арса.

Сӧбіреңернің киректерінде туғаннарыңа хай син аралазарға чарадарынаңар иріңернең алай ипчіңернең хада пӧгін алыңар. Анаң нымзах оңдайнаң оларны сизіндіріңер. Азых паза кӧні чоох хатығ чоохтазарын таныхтабинча (Притчи 15:1). Пазымнығ, нымзах, тоозылбас тыстаныстығ полғаны туғаннарнаң чылығ палғалыстығ, ідӧк тыстаныстығ паза хыныстығ поларға полызар (Ефестегілерге 4:2).

ТУЗАЛЫҒ ЧӦПТЕР

• Сірернің чуртастарыңа туғаннар тимеер ара кірчелер тіп пілдірчетсе, хада чуртапчатханнаң хырыспин чоохтазып алыңар

• Ниме идерінеңер паза хайди тудынарынаңар ікӧлең чӧптезіп алыңар