Сӧбіре паза хоных часказының ӱчӱн кӧп кӱс салчатсар даа, сірернің істіндегі амырны кинетін сайбабызар пірее ниме пол парча (Экклезиаст 9:11). Сидіктерге урунчатсабыс, Худай хыныснаң піске хабасча. Кинетін пірее улуғ чобаға урун парзар, алтында пазылған библейскай принциптер сірерге паза сірернің чағын кізілеріңе полыс пирер.

БИБЛИЯ НИМЕ ЧООХТАПЧА. «Худай сірердеңер сағынча. Аннаңар прай сағыссырастарыңны Ағаа салдырыбызыңар» (1 Петрның 5:7). Сірер тоғасхан сынағларда Худай пыролығ полбинчатханнаңар хаҷан даа ундутпаңар (Иаковтың 1:13). Иеговаа чағдазар, ол сірерге прайзынаң артых полыс пирер (Исаия 41:10). «Прай чӱрееңерні ағаа ас турыңар» (Псалом 62:8).

Кӱннің сай Библия хығырғаны паза аны істескені сірерге часхарыс пирер. Иегова «пісті ноо даа сидіксіністерде часхарчатханын» кӧрерзер (2 Коринфтегілерге 1:3, 4; Римдегілерге 15:4). «Кізі сағызы чит полбас Худайның амыры» сірерге пирілердеңер Иегова молҷапча (Филипптегілерге 4:6, 7, 13).

ТУЗАЛЫҒ ЧӦПТЕР

• Иегова сірерге амыр чідірбеске паза чахсы сағынып оңнирға полыссын тіп пазырыңар

• Сидіктерде тудынарға чарир оңдайларны прай кӧрібізіңер паза сірерге иң килісчеткенін таллап алыңар

БИБЛИЯ НИМЕ ЧООХТАПЧА. «Піл полчатхан кізінің чӱрее піліс алча, хыйғаның хулағы піліс тілепче» (Притчи 18:15). Ноо ниме полчатханнаңар чахсы піліп аларға кӱстеніңер. Сӧбіреңернің полғаны ла ниме кирексіпчеткенін піліп алыңар. Оларнаң чоохтазып алыңар. Ситкеп истіңер (Притчи 20:5).

Чағыннарыңның піреезі ӱреп парза чи? Чувстволарыңны кӧзідерге уйатпаңар. Андағ кирек пол парғанда, Иисустың даа «харах частары аххан» (Иоанн 11:35; Экклезиаст 3:4). Чахсы тынанарға паза тосханҷа узирға кирек (Экклезиаст 4:6). Анзы чобағны ирт парыбызарға кӱс пирер.

ТУЗАЛЫҒ ЧӦПТЕР

• Пірее чобағ пол парза, сӧбіреде азых чоохтасханы кӱс пирер. Андада сӧбіредегілер сірерзер чалтанмин айланарлар

• Сірер кӧрген чобаға тӧӧй чобағны кӧрген кізінең чоохтазып алыңар

БИБЛИЯ НИМЕ ЧООХТАПЧА. «Сын нанҷы хайдағ даа туста хынча, ол чобағ тузына тӧреен харындас» (Притчи 17:17). Нанҷылар хаҷан даа полыс пирерге тимделер, че пірееде хайди аны идерге пілбинчелер. Нимеде кирексінчеткеніңерні чоохтирға уйатпаңар (Притчи 12:25). Библияны чахсы пілчеткен кізілерзер духовнай полызығ суранып айланыңар. Олар Худай Сӧзінің сағыстарынаң ӱлезерлер. Ол сағыстар сірерге хайди даа полыс пирерлер (Иаковтың 5:14).

Худайға киртістіг паза аның молҷағларына ізенчеткен харындас-пиҷелернең удаа чоохтазып, кирек полызығ табарзар. Часхарыс кирексіпчеткен кізее полызып, постарыңар даа часхарыс аларзар. Иеговаа паза аның молҷағларына киртінчеткеннеріңнең оларнаң ӱлезіңер. Сидіктерге кір парған кізілерге полызарға прай кӱстеріңні салыңар паза сірерге хынчатхан, сірердеңер сағыссырапчатхан кізілернең хыйа тудынмаңар (Притчи 18:1; 1 Коринфтегілерге 15:58).

ТУЗАЛЫҒ ЧӦПТЕР

• Чағын нанҷынаң чоохтазып алыңар паза аның полызиин хыйа итпеңер

• Ниме кирексіпчеткеннеріңнеңер чоохтирға уйатпаңар