1, 2. Кізілерні ниме сағыссыратча?

ПӰӰН аймах-пасха чобағлардаңар исчебіс. Суғ тазып, тураларны паза аалларны чууп парыбысча, терроризм кӧптең кӧп полча, рак ағырығның ӱчӱн кӧп кізі хырылча, аннаңар палалар паба-іҷелері чох халчалар.

² Андағ хыйаллардаңар паза чобағлардаңар исчетселер, кізілер сурчалар: «Ноға анҷа кӧп ирее?» Олар чир-чалбахта анҷа кӧп хыртыстаныс паза чобағ полчатхан ӱчӱн сағыссырапчалар. Сірер чи андағ сурығ турғысхазар ба?

3, 4. а) Аввакум Иеговаа хайдағ сурығлар турғысхан? б) Иегова ағаа ниме нандырған?

³ Библияда андағ сурығларны Худайға киртіністері пик кізілер дее турғысчаңнар тіп пазылча. Кӧзідімге, Аввакум Иеговадаң сурған: «Ноға син мағаа чабал киректерні паза иреелерні кӧзітчезің? Ноға минің алнымда тонағ паза кӱстег? Ноға хырыс-табыстар паза ыырластар полчалар?» (Аввакум 1:3).

⁴ Аввакум 2:2, 3-те Худай ол ухаанҷаа ниме нандырғанынаңар паза ол киректі алыстырарға молҷағ пиргенінеңер пазыл парған. Библияда Иегова кізілерге тың хынча тіп чоохталча. Анда пазылча: «Худай сірердеңер сағынча» (1 Петрның 5:7). Сынында Худай чабал киректерге паза иреелерге пістең дее тың хырт кӧрче. Андағда чир-чалбахта ноға анҷа кӧп ирее? Пу сурыға нандырығ Библиядаң таап алаалар.

5. Хыйаллар пол парза, абыстар ниме тіпчелер? Хыйаллардаңар Библияда ниме чоохталча?

⁵ Кізілер ирееленчетселер, кӧп абыстар паза религиознай ӱгретчілер Худайның кӧңні андағ полған тіп ӱгретчелер. Оларның піреелері хайдағ киректер паза хыйаллар пол парарынаңар Худай азынада пӧгін алча тіп ӱгретчелер паза ноға хыйалға кір парғанын кізі хаҷан даа піл полбас тіпчелер. Пасхалары, тізең, Худай кізілерні, палаларны даа, тигірзер апарыбысча, аннаңар олар ӱрепчелер тіпчелер. Че пу ӱгредіглер чой ӱгредіглер. Иегова кізілерге чобағлар ыспинча. Библияда чоохталча: «Сын Худай хаҷан даа хомай итпес паза „Прай нимедең кӱстіг Худай“ хара сағыснаң хаҷан даа тудынмас!» (Иов 34:10).

6. Ноға кӧп кізілер прай хыйаллар ӱчӱн Худай пыролығ тіпчелер?

⁶ Кӧбізі чир-чалбахнаң Худай устапча тіп сағынчалар, аннаңар хыйаллар полчатханында Худайны пыролапчалар. Че, хайди ӱзінҷі пастағдаң піліп алғабыс, сынында чир-чалбахнаң Сайтан устапча.

7, 8. Ноға чир ӱстӱнде анҷа кӧп хыйал?

⁷ Библияда чоохталча: «Тиксі-тилекей чабал кӱзі алтында» (1 Иоанның 5:19). Чир-чалбахтың устағҷызы, Сайтан Диавол, уғаа чабал. Ол «прай чир ӱстӱндегі чоннарны алаахтырча» (Азых чоох 12:9). Кӧп кізілер, Сайтан чіли, чабал пол парчалар. Сайтанның ӱчӱн чойланыс, хыртыстаныс паза кӱстег чир ӱстӱне тол парған.

⁸ Чобағлар пасха даа нимелернің ӱчӱн полчалар. Адамнаң Ева Худайдаң тоғыр пар сыхханда, оларның чазыхтығ палалар тӧрееннер. Чазыхтығ кізілер пасхаларына иреелер ағылчалар. Олар пірсі пірсінең артых поларға кӱстенчелер, ӱлгӱ пылазып, кӱресчелер,  чааласчалар паза кізілерні пазынҷыхтапчалар (Экклезиаст 4:1; 8:9). Ідӧк андағ хыйаллар «тус паза кинетін пол парчатхан киректер» ӱчӱн пол парчалар (Экклезиаст 9:11). Аннаңар пірееде кізі, килістіре нимес туста алай килістіре нимес орында пол парған ӱчӱн, киненге кір парча.

9. Иреелерні тохтатпасха Худайның сылтағ парында ноға ікінҷілебеске чарир?

⁹ Иегова кізілерге хомай итпинче. Кізілер сайбағ итчеткен, чааласчатхан паза удур-тӧдір пазынҷыхтасчатхан ӱчӱн Худай пыролығ нимес. Ідӧк чир тітіреені, хазыр чиллер, суғ тасханы паза пасха даа хыйаллар ӱчӱн ол пыролығ нимес. Че сірер сағынчазар, арса: «Иегова Прай нимедең кӱстіг полза, ноға ол чабал киректерні чох итпинче?» Библияда Худай піске тың хынча тіп чоохталча. Аннаңар иреелерні тохтатпасха аның улуғ сылтағ пар полар (1 Иоанның 4:8).

10. Сайтан Иеговадаңар ниме теен?

¹⁰ Эдем тіп садта Сайтан Адамнаң Еваны алаахтырыбысхан. Иегова, хомай устағҷы, олардаң хайдағ-да чахсы нимені чазырча тіп чоохтаан. Сайтан Иеговадаң артых устағҷы поларбын тіп паза Худай кізілерге кирек тее чоғыл тіп киртіндірерге хынған (Бытие 3:2—5; 27 приложениені кӧріңер).

11. Хайдағ сурыға нандырығ пілерге кирек?

¹¹ Адамнаң Ева, Иеговадаң тоғыр парып, аның чооғын испинібіскеннер. Ниме чахсы, ниме хомай полчатханын олар постары пӧк поларлар тіп сағынғаннар. Иегова оларның саба сағынчатханын паза ол ла пісті часкалығ ит поларын хайди кӧзіт поларҷых?

12, 13. а) Ноға Иегова Адамнаң Еваны сах андох ӧдірібіспеен? б) Ноға Иегова Сайтанға чир-чалбахнаң устирға паза кізілерге постарының ӱлгӱлерін турғызарға тус пирген?

 ¹² Иегованың сағын салған сағызының хоостыра, чирде толдыра, чазых чох кізілер чуртирға кирек полғаннар, аннаңар ол Адамнаң Еваны сах андох ӧдірібіспеен. Худай Адамнаң Еваа палалар тӧрідерге чаратхан. Ол палаларға кемнің чооғын истерін таллирға оңдай пирілген. Андағ оңдайнаң, Диавол Худайға харығ поларға кӱстензе дее, Худайның сағын салған сағызы хайди даа тол парарҷых (Бытие 1:28; Исаия 55:10, 11).

¹³ Сайтан нинҷе-де миллион ангеллер алнында Иеговадаңар тайма чоох чоохтаан (Иов 38:7; Даниил 7:10). Аннаңар Иегова Сайтанға, аның сӧстері сын полчатханын кӧзіт пирзін тіп, тус пирген. Ідӧк кізілер Сайтанның устаанының хоостыра ӱлгӱлерні турғыс кӧрзіннер, постары постарынаң устап поларларын паза Худай оларға кирек чох полчатханын кӧзіт пирзіннер тіп тус пирген.

14. Нинҷе-де тус пазынаң ниме іле кӧрін парған?

¹⁴ Муңар чыллар кізілер пос постарынаң устирға кӱстенгеннер, че оларның устааны чахсы нимее ағылбаан. Нинҷе-де тус пазынаң Сайтан чой полчатханы паза кізілернің Худай полызии чох пос постарынаң устап полбинчатханнары іле кӧрін парған. Иеремия ухаанҷы аннаңар піди пасхан: «О Иегова, мин пілчем, кізі чолы аның ӱлгӱзінде нимес паза кізі хайдар алтирын пілбинче» (Иеремия 10:23).

15, 16. а) Ноға Иегова иреелерні амғаа читіре тохтатпаан? б) Ноға Иегова Сайтанның устаанының ӱчӱн полчатхан сидіктерні чох итпинче?

¹⁵ Ноға Иегова иреелерні амғаа читіре тохтатпаан?  Диаволның маңнаныстығ устап полбинчатханы іле кӧрін парар ӱчӱн, тус кирек полған. Кізілер аймах-пасха ӱлгӱлер турғысханнар, че постары постарынаң хаҷан даа чахсы устап полбааннар. Кізілер наукада паза техникада кӧп чидіглерге чидіп алған ползалар даа, чир-чалбахта сыны чох тудыныс, чох чуртас, сайбағлар паза чаалар кӧптең кӧп ле полып одырчалар. Анзынаң кӧрінче, кізілер Худай чох маңнаныстығ устап полбинчалар.

¹⁶ Ноға Иегова Сайтанның устаанының ӱчӱн полчатхан сидіктерні чох итпинче? Иегованың ол сидіктерні чох иткені аның Сайтанға полысчатханын таныхтирҷых. Ағаа хоза, Худай позы сидіктерні пӧккен полза, кізілер пос постарынаң чахсы устапчабыс тіп сағынарҷыхтар. Сайтанға даа, кізілерге дее полысхан полза, Худай чой кирекке хабасчатхан поларҷых. Ол пір дее чойланминча, аннаңар андағ киректе хаҷан даа араласпас (Еврейлерге 6:18).

17, 18. Сайтанның тоғырланызының салтарларын Иегова хайди чох идібізер?

¹⁷ Сайтанның ӱчӱн паза кізілернің чоох испинчеткенінің ӱчӱн пол парған прай сидіктернің салтарларын Иегова чох ит полар ба? Йа, ит полар. Иегова ит полбас ниме чоғыл. Сайтанның чойланғаны саңай киречілел парза, Иегова прай сидіктерні чох идібізер. Чирні рай ит саларға сағынған сағызы андада тол парар. «Сыыраттарда чатчатханнар» тірілерлер (Иоанн 5:28, 29). Ағырығлар паза ӧлім чох полар. Иисус «сайтанның киректерін чох идер» паза аның ӱлгӱзінің салтарларын чох идібізер (1 Иоанның 3:8). Ам, тізең, кізілер Иеговадаңар піліп алып, аны постарының устағҷызына таллап алзыннар тіп, ол тыстаныснаң сахтапча! (2 Петрның 3:9, 10 хығырыбызыңар.) Амғы туста сидіктерге урунчатсабыс  таа, Иегова піске оларны тобырып аларға полызар. (1 Коринфтегілерге 10:13 хығырыбызыңар.)

¹⁸ Иегова аның чооғын истерге кӱстебинче. Кізі позы пӧгін аларға кирек: Худайның чооғын истерге алай испеске. Пос кӧңніліг пӧгін алғаны уғаа аарлығ сыйых. Ол сыйых ниме таныхтапчатханын кӧр кӧреелер.

19. Иегова кізілерге ниме пирген? Ноға анзын аарлирға кирек?

¹⁹ Кізілер маллардаң пасха чайалғаннар, пісті Иегова постарыбыстың сағыстарыбыснаң пӧгін аларға чайаан. Маллар инстинкт хоостыра чуртапчалар, кізілер, тізең, хайди чуртирға постары пӧкчелер (Притчи 30:24). Пістің чуртазыбыс Иегованы ӧріндірер бе алай ӧріндірбес пе, позыбыстың пӧгінінең палғалыстығ. Піс программа ла хоостыра тоғынчатхан роботтар нимеспіс. Иегова чуртас піске ӧрініс ағылзын тіп хынған, аннаңар хайдағ кізі поларға, кемнең нанҷылазарға, чуртаста нименең айғазарға піске позыбысха таллирға оңдай пирген.

20, 21. Хайдағ чол иң чахсы чол?

²⁰ Иегова пісті ағаа хынзыннар тіп хынча (Матфей 22:37, 38). Пабазы хаҷан ӧрінер: пала пос кӧңнінең «Мин сағаа хынчам» тізе алай піреезі аны кӱстезе? Иегова — пістің Пабабыс, ол пісті ағаа хынарға кӱстебинче. Піс постарыбыс пӧкчебіс: ағаа нымысчыланарға алай чох. Сайтан, Адам паза Ева Худайның чооғын испеске пӧгін алғаннар. Сірер чи хайдағ пӧгін аларзар?

²¹ Иеговаа нымысчыланғаны — чуртастың иң чахсы чолы. Ол чолҷа парыңар! Миллионнар Сайтанға нимес, че Иеговаа нымысчыланарға пӧгін алғаннар. Анзына Худай тың ӧрінче (Притчи 27:11). Иегова полар туста кізілер ирееленместер тіп молҷапча. Сірер чи, пу молҷағ толарын кӧрер ӱчӱн, ниме ит поларзар? Аннаңар мының соондағы пастағдаң піліп аларбыс.