Иегова — ол Худайның ады. Ол ат таныхтапча: «ол поларға пирче». Иегова — ол Прай нимедең кӱстіг Худай паза ол прай нименің Чайаачызы. Аннаңар Худайның позының сағын салған сағызын толдыр салар кӱзі пар.

Пурунғы еврейлернің тілінде пу ат тӧрт букванаң пазылча. Хакас тілінде оларға ЙХВХ алай ИГВГ буквалар килісчелер. Еврей тілінең пазылған оригиналда Худайның ады 7 000-ҷа хати учурапча. Пасха-пасха чоннар «Иегова» тіп атты пасха-пасха оңдайнаң постарының тіллеріне килістіре адапчалар.

▸ 1 пастағ, 15 абзац

Библияны кізілер пасхан ползалар даа, аның авторы Худай. Анзы пастых хачызына пічік пастырғанына тӧӧй. Ол пічікте хачының сағыстары нимес, пастыхтың сағыстары полар. Худай ідӧк, ызых хутнаң тузаланып, кізілерге Библияда позының сағыстарын пастырған. Худай хабарларын кізілерге аймах-пасха оңдайларнаң читірҷең: кӧзідімге, кӧспек алай тӱс кӧзітчең. Соонаң ол кізі кӧрген нимені пас салҷаң.

▸ 2 пастағ, 5 абзац

Библиядағы принцип — ӧӧн сынны чарыда чоохтапчатхан ӱгредіг. Кӧзідімге, «чабал кізілернең нанҷыласханы чахсы хылыхтарны ардатча» тіп принцип ӱгретче: пістің нанҷыларыбыс пісті чахсы алай хомай саринзар алыстырчалар (1 Коринфтегілерге 15:33). «Кізі позы таарыпчатхан нимені чыып алча» тіп принцип, тізең, піс иткен киректерібістің салтарлары хайди даа полар тіп ӱгретче (Галат чиріндегілерге 6:7).

▸ 2 пастағ, 12 абзац

Ухаанҷылас — ол Худайның хабары. Анда ол позының кӧңнін асча, чахығ, устағ пирче алай чарғызын искірче. Пірее ухаанҷыластар алнында ниме поларынаңар чоохтапчалар. Библиядағы ухаанҷыластарның кӧбізі тол парған.

▸ 2 пастағ, 13 абзац

Библияда Мессийдеңер ухаанҷыластар уғаа кӧп. Олар Иисус Христоста тол парғаннар. « Мессийдеңер ухаанҷыластар» тіп рамканы кӧріңер.

▸ 2 пастағ, 17 абзац, сноска

Иегова чирні, прай чир ӱстӱнде рай ползын тіп паза анда ағаа хынчатхан кізілер чуртазыннар тіп, чайаан. Аның сағызы алыспаан. Ӱр ниместең ол прай чабал киректерні чох идібізіп, кізілерге мӧге чуртас сыйлап пирер.

▸ 3 пастағ, 1 абзац

Сайтан — ол ангел. Ол Худайға тоғырланғаннарның пастағызы полған. Иеговаа тоғырланған ӱчӱн ол Сайтан тіп адалған. Сайтан «ыырҷы» тіп тілбестелче. Ідӧк Худайдаңар чой чоох чоохтапчатхан ӱчӱн паза кізілерні алаахтырчатхан ӱчӱн ол Диавол алай «хоп чоохчы» тіп адалча.

▸ 3 пастағ, 4 абзац

Чирні чайирының хай-хай алнында Иегова чӱс миллион азыра ангел чайап салған (Даниил 7:10). Олар тигірде чуртирға чайалғаннар. Оларның полғанының на позының ады паза хылии пар. Худай оларны пасха-пасха синінде турғыс салған. Худайға киртістіг ангеллер пазымнығлар, аннаңар кізілернің пазырызын постарына алынминчалар. Оларға пасха-пасха тоғыстар пирілче, кӧзідімге: Иегованың ӱлгӱ сіреезінің алнында нымысчыланчалар, Худайның хабарларын читірчелер, аның чирдегі нымысчыларын арачылапчалар паза оларнаң устапчалар, Худайның чарғыларын толдырчалар паза искіріг тоғызына хабасчалар (Псалом 34:7; Азых чоох 14:6; 22:8, 9). Армагеддон тіп чаада олар Иисус Христоснаң хада чаалазарлар (Азых чоох 16:14, 16; 19:14, 15).

▸ 3 пастағ, 5 абзац; 10 пастағ, 1 абзац

Чазых — Иегованың кӧңніне тоғырланчатхан хайдағ даа чувство, сағыс алай тудыныс. Чазых пісті Худайдаң хыйа тартча, аннаңар Худай піске піле тура чазых ит салбасха полысчатхан чахығлар паза принциптер пирген. Иегова чайаан нимелер прай чахсы полған, соонаң Адамнаң Ева піле тура Иегованың чооғын испинібізіп, чазыхтығ, толдыра нимес пол парғаннар. Аның ӱчӱн, киріп парып, ӱреп парғаннар. Адамнаң сығара чазых прайзына тарап парған ӱчӱн, піс прайзыбыс киріпчебіс паза ӱрепчебіс.

▸ 3 пастағ, 7 абзац; 5 пастағ, 3 абзац

Чаа, хайзында Худай Сайтанның чир-чалбағын паза прай чабал киректерні чох идібізер.

▸ 3 пастағ, 13 абзац; 8 пастағ, 18 абзац

Худайның Хан-ӱлгӱзі — Иегова тигірде турғыс салғын ӱлгӱ. Аның ханы Иисус Христос. Полар туста Иегова Хан-ӱлгӱзінің пастыра чабал киректерні прай чох идібізер. Худайның Хан-ӱлгӱзі чирнең устир.

▸ 3 пастағ, 14 абзац

Иисус — ол прай чайаахтардаң пурун чайалған чайаах. Иегова аны, кізілернің ӱчӱн чуртазын пирібіссін тіп, чирзер ысхан. Иисусты ӧдірібіскеннер, Иегова, тізең, аны тіргізібіскен. Амды Иисус Христос Хан полча. Ол тигірде Худайның Хан-ӱлгӱзінде устапча.

▸ 4 пастағ, 2 абзац

Мессий чирзер килер тус Библияда хап-орта ухаанҷылалған. Ол 69-ҷы «неделя» тоозылчатхан туста килерге кирек полған. Ол «неделялар», п. э. алнында 455 чылда пасталып, п. э. 29 чылда тоозылғаннар.

Мессий п. э. 29 чылда килерге кирек полғанын хайдаң пілчебіс? 69 «неделя» п. э. алнында 455 чылда, Неемия иңзеріл парған Иерусалимні хатап пӱдірерге килгенде, пасталған (Даниил 9:25; Неемия 2:1, 5—8). Хайди пір хоных тізелер, 24 час сағысха кірче, ідӧк «неделя» тізелер, 7 кӱн сағысха кірче. Ухаанҷыластарда «пір кӱн пір чылға» саналча, аннаңар пу ухаанҷыласта неделялар 7 кӱнніг неделялар нимес, че 7 чыллығ неделялар (Числа 14:34; Иезекииль 4:6). Андағ оңдайнаң, полған на «неделя» читі чыл полза, 69 «неделя» 483 чыл полар (69 x 7). П. э. алнындағы 455 чылдаң 483 чыл санабыссабыс, п. э. 29 чылға килербіс. Сах ол чылда Иисус кіреске тӱзіп алып, Мессий пол парған (Лука 3:1, 2, 21, 22).

 Олох ухаанҷыласта ол чылның соондағы пір «неделяда» полар киректердеңер пазылча, ол «неделяда» ідӧк 7 чыл. Ухаанҷылас хоостыра ол «неделяның» ортызында Мессий ӧдірт саларға кирек полған. Аны п. э. 33 чылда ӧдір салғаннар. Ол «неделя» тоозылчатхан туста, п. э. 36 чылда Хан-ӱлгӱдеңер чахсы хабарны еврейлерге ле нимес, че пасха даа чоннарға искір сыхханнар (Даниил 9:24—27).

▸ 4 пастағ, 7 абзац

Иегова Худай прай нименің Чайаачызы тіп Библия ӱгретче, Иисус Христос, тізең, «ноо даа чайаахтаң пурун» чайалған (Колосстағыларға 1:15, 16). Иисус Прай нимедең кӱстіг Худай нимес. Ол хаҷан даа Худайға тиңзім тібеен, че «Пабам Миннең дее илбек» тіҷең (Иоанн 14:28; 1 Коринфтегілерге 15:28). Андағ даа полза, пірее религияларда Худай Троица полча тіп ӱгретчелер. Ол ӱгредіг хоостыра Пабазы, Оолғы паза ызых хут пірігіп, пір худай полчалар. Че Библияда «Троица» тіп сӧс чоғыл. Ол чой ӱгредіг.

Ызых хут — ол Худайның кӱзі. Ол кӱснең Худай позының кӧңнін толдырча. Библияда ол кӱстің тоғызынаңар піди пазылча: пастағы вектегі христианнарға «Худай Худы тол парған» тіп пазылча. Ідӧк Иегова теен: «Мин Позымның Худымны полғанына ла чай пирем» (Илҷілернің 2:1—4, 17). Мыннаң кӧрінче, ызых хут личность нимес.

▸ 4 пастағ, 12 абзац; 15 пастағ, 17 абзац

Ноға сын христианнар, Худайға пазырчатсалар, кіреснең тузаланминчалар?

1. Чой религияларда кіреснең хас-хаҷаннаң тузаланҷаңнар. Пурунғыда чир-чайаанның кӱзіне пазырчатсалар паза чоннарның сайбах кибірлерін иртірчетселер, кіреснең тузаланҷаңнар. Христос ӱреен соонда, 300 чылҷа аның ӱгренҷілері кіреснең тузаланмааннар. Соонаң Рим императоры Константин устаан туста кірес христианствоның символы пол парған. Іди император кізілерні христианствозар тартып аларға хынған. Че кірес Иисус Христоснаң пір дее палғалыстығ полбаан. «Католиктернің наа энциклопедиязында» чоохталча: «Кірес христианство тӧстелер алнындағы паза христианскай нимес культураларда пар».

2.  Иисус кіресте ӧлбеен. «Кірес» тіп тілбестелген сӧс грек тілінде «тӧгені» алай «ағасты» таныхтапча. Пір пічікте  пазылча: «[Наа Молҷағның] грек текстінде ікі тӧгедеңер пір дее чоохталбинча» (The Companion Bible). Иисусты, чіке турчатхан тӧгее хазап, ӧдірібіскеннер.

3.  Иегова ағаа обрастарнаң паза символларнаң пастыра пазырзыннар тіп хынминча (Исход 20:4, 5; 1 Коринфтегілерге 10:14).

▸ 5 пастағ, 12 абзац

Иисус Христос ӱгренҷілеріне аның ӧлімін сағысха кирҷең Иирдегі азыранысты таныхтирға чахаан. Ол 14 нисанда, Израиль чоны Па́сханы ӱлӱкӱннеен кӱнде, таныхталча. Иирдегі азыранысты таныхтирға килгеннер холдаң холға халас паза хызыл араға пирчелер. Халаснаң хызыл араға Христостың ит-сӧӧгін паза ханын таныхтапча. Иисуснаң хада тигірде устир кізілер халаснаң хызыл арағаны амзапчалар. Чирде мӧгі чуртирға ізенчеткеннер халаснаң хызыл арағаны амзабинчалар. Олар, андар киліп, Иирдегі азыраныс хайди таныхталчатханын улуғласнаң кӧрчелер.

▸ 5 пастағ, 21 абзац

Кізі ӱреп парза, аның хайдағ-да чардығы хаҷан даа ӧлбинче тіп кӧп кізі санапча. Олар, кізі ӱреп парза, аның ӧлбинчеткен чардығы тігі чирде чуртапча тіп киртінчелер. Андағ кӧрістер тың тарап парған полза даа, Библия андағ нимее ӱгретпинче. Ол, тізең, кізілер, ӱреп парып, мал чіли, чох пол парчалар тіп ӱгретче (Бытие 3:19; Экклезиаст 3:19, 20).

▸ 6 пастағ, 5 абзац; 15 пастағ, 17 абзац

«Хут» тіп сӧснең тілбестелчеткен еврейлернің паза гректернің сӧзі аймах-пасха кӧрінмес нимелерні таныхтапча. Кӧзідімге,  чилні, кізінің кӧңнін, ызых хутты алай Худайның кӱзін. Че Библияда «хут», ӧлген кізідең сығып, аннаң андар чуртапча тіп чоохталбинча (Иезекииль 11:19; Иоанн 3:8; Лука 11:13).

▸ 6 пастағ, 5 абзац; 15 пастағ, 17 абзац

Иерусалим хыриндағы похсах ӧртеҷең ойымны «геенна» тіп адаҷаңар. Иисус Христостың тузында анда кізілерні алай малларны иреелееннерін алай тіріге ӧртееннерін пір дее ниме киречілебинче. Аннаңар Библияда «геенна» тіп сӧс ӱреен кізі успас отта алай кӧйчеткен кӧрінмес чирде ирееленчеткенін таныхтабинча. Иисус, гееннадаңар чоохтаанда, кізіні саңай чох идерінеңер чоохтаан (Матфей 5:22; 10:28, НТ).

▸ 7 пастағ, 20 абзац

Ол пазырыстың хоостыра Иисус ӱгренҷілеріне хайди пазырарға кирек полчатханын кӧзіт пирген. Ол ідӧк «Молитва Господня» тіп адалча. Худайзар мындағ сурыныстарнаң айланарға чарир:

• «Синің Адың сабланзын»

  Тигірде дее, чирде дее прайлары Худайның адын сабландырзыннар тіп, піс Иеговадаң позының адын полған на чой чоохтаң арығлап салзын тіп сурынчабыс.

• «Синің хан-ӱлгӱң пеер килзін»

  Худайның ӱлгӱзі Сайтанның чабал чир-чалбағын чох итсін, прай чир ӱстӱнең устазын паза чирні райға айландырзын тіп пазырчабыс.

• «Чир ӱстӱнде дее... Синің кӧңніңҷе прай ниме ползын»

  Худайның чирдеңер сағын салған сағызы толзын паза чазых чох, Худайның чооғын исчеткен кізілер райда мӧгі чуртазыннар тіп пазырчабыс. Худай, кізілерні чайаанда, андағ чуртас ползын тіп хынған.

▸ 8 пастағ, 2 абзац

Кізілерні чазыхтаң паза ӧлімнең осхырып алар ӱчӱн, Иегова толығ пирген. Пастағы кізі, Адам, чідір салған, чазых чох, толдыра чуртасты нандыра садып аларға кирек тӧлегнің паазы толығ полча. Ідӧк толығның ӱчӱн Худайнаң чаразып алҷаң оңдай пол парған. Иегова Иисус Христосты прай чазых кізілернің ӱчӱн чуртазын пирібізерге чирзер ысхан. Иисустың ӧлімінің сылтаанда кізілернің, чазых чох, толдыра кізі полып, мӧгі чуртирға оңдай пол парған.

▸ 8 пастағ, 21 абзац; 9 пастағ, 13 абзац

Даниилның киндезінде 4-ҷі пастағда пазылған ухаанҷылас хоостыра, Худай 1914 чылда Хан-ӱлгӱзін турғыс саларға кирек полған.

Ухаанҷылас. Иегова Навуходоносор ханға тӱзінде узурылған чоон ағастаңар ухаанҷылас кӧзіт пирген. Ол ағас «читі тус» ӧспезін тіп, аның тӧкпезіне тимір паза чис хурлар кизірт салчалар. Нинҷе-де тус пазынаң ол ағас хатап ӧс сығарға кирек полған (Даниил 4:1, 10—16).

Хайди пу ухаанҷылас піске теепче? Ағас — ол Худайның ӱлгӱзі. Израиль чонынаң Худай Иерусалимдегі ханнарнаң пастыра устаан (1 Летопись 29:23). Че ол ханнар Худайға киртістіг полбааннар, аннаңар оларның устааны тохтадыл парған. П. э. алнында 607 чылда Иерусалим иңзеріл парғанда, «читі тус» пастал сыххан (2 Царей 25:1, 8—10; Иезекииль 21:25—27). Иисус Христос: «Иерусалимні, тізең, Худайы чохтар, тустары тоозылғанҷа, типсирлер», — теенде, ол «читі тустаңар» чоохтаан (Лука 21:24). Аннаңар Иисус чирде полғанда, ол «читі тус» тоозылбаан полған тирге чарир. «Читі тус» тоозыл парза, Иегова позының ханын хатап турғыс саларға молҷаан. Ол Иисус Христосты ханға турғыс салған. Аның устааны Худайның прай чонына мӧгі алғастар ағылар (Лука 1:30—33).

 «Читі тус» нинҷе ӱр полған? «Читі тус» 2 520 чыл полған. П. э. алнында 607 чылдаң 2 520 чыл санабысса, 1914 чыл пол парар. Ол чылда Иегова Иисусты — Мессийні — позының тигірдегі Хан-ӱлгӱзінің ханына турғыс салған.

2 520 чыл хайдаң алылған? Азых чоох тіп киндедең ӱс чарым тус 1 260 кӱн полчатханын піліп аларға чарир (Азых чоох 12:6, 14). Читі тус ӱс чарым тустаң ікі хати узун, аннаңар «читі тус» 2 520 кӱн полча. Ызых Пічікте пазылған сӧстер хоостыра «пір кӱн пір чылға» саналча. Аннаңар 2 520 кӱн 2 520 чыл пол парча (Числа 14:34; Иезекииль 4:6).

▸ 8 пастағ, 23 абзац

«Архангел» тіп сӧс «ӧӧн ангелні» таныхтапча. Библияда пір ле архангелдеңер пазылча. Аның ады Михаил (Даниил 12:1; 1 Фессалониктегілерге 4:16; Иуданың 9, НТ).

Азых чоох 12:7-де чоохталча: «Пір саринда улуғ ангел Михаил паза аның ангеллері, паза пір саринда, тізең, сыр чылан позының ангеллерінең хада олардаң тоғыр чааласхан». Пу стихтаң кӧрінче: Михаил Худайға киртістіг ангеллернің пазы полча. Азых чоохта аннаң андар Иисус Христостаңар Худайның чааҷыларының пазы тіп чоохталча. Мыннаң кӧрінче: Михаил — ол Иисус Христос. Михаил Иисустың аттарының пірсі (Азых чоох 19:14—16).

▸ 9 пастағ, 4 абзац

Ол Сайтанның чир-чалбағын чох идерінің саңай алнындағы тус. Ол туста чирде улуғ киректер полар тіп чоохталған. Библияда ол тус «тӱгенҷі тус» паза «Кізі Оолғы килер тус» тіп адалча (Матфей 24:3, 27, 37). Тӱгенҷі кӱннер 1914 чылда пасталғаннар. Андада Худайның Хан-ӱлгӱзі тигірде устап пастаан. Худайның Хан-ӱлгӱзі Сайтанның чир-чалбағын Армагеддон тіп чаада чох идібіссе, тӱгенҷі кӱннер тоозыл парарлар (2 Тимофейге 3:1; 2 Петрның 3:3).

▸ 9 пастағ, 5 абзац

Ӧлген кізіні чуртасха нандыра айландырғаны тіріліс тіп адалча. Библияда тоғыс кізі тірілгеннеңер чоохталча. Оларны Илья, Елисей, Иисус Христос, Пётр паза Павел тірілдіргеннер. Олар анзын Худай ла кӱзінең ит полғаннар. Иегова «арығ даа, арығ нимес тее чӱректіг кізілерні» чирде хатап чуртирға тірілдірерге молҷапча (Илҷілернің 24:15).  Ағаа хоза, Библияда піреелері тигірдегі чуртасха тірілерлер тіп чоохталча. Худай таллап алған алай ол таңмалап салған кізілер Иисус Христоснаң хада тигірде чуртирлар (Иоанн 5:28, 29; 11:25; Филипптегілерге 3:11; Азых чоох 20:5, 6).

▸ 9 пастағ, 13 абзац

Демонизм алай спиритизм — ол айналарнаң палғалысханы. Кізілер айналарнаң постары алай сыбырағҷы, медиум паза экстрасенс пастыра палғалызарға сіренчелер. Спиритизмнең айғасчатхан кізілер ӱреен кізі хут пол парча тіп киртінчелер. Ол хут тіріг кізілернің чуртастарын алыстыр полар тіпчелер. Че пу ӱгредіг чой ӱгредіг. Айналарнаң палғалысханы саба кирек, олар кізілерні Худайның чооғын испеске кӧӧктірчелер нооза. Астрология, тӧлке салғаны, магия, сыбырааны, азанғаны, оккультизм паза хуттарның кӱзінең иділчеткен киректерге киртінгені демонизмнің чардығы полча. Ағаа хоза, кізіні чығҷаң кибірлернің кӧбізі демонизмнең палғалыстығ, оларның санында хомда хыринда хараа тооза одырғаны, «читі кӱнінің», «хырых кӱнінің», «чылының» ибіріглерін иртіргені. Кинделерде, журналларда, гороскоптарда, фильмнерде паза сарыннарда айналар, магия паза хуттарның кӱзінең иділчеткен киректер пыро чох, хынығ ниме чіли кӧзіділчелер. Айналарнаң палғалызар ӱчӱн, кізілер удаа наркотиктернең тузаланчалар (Галат чиріндегілерге 5:20; Азых чоох 21:8).

▸ 10 пастағ, 10 абзац; 16 пастағ, 4 абзац

Иегова — ол Прай нимедең кӱстіг Худай, Тилекейнің Чайаачызы (Азых чоох 15:3). Ол прай пар нименің ээзі, аннаңар аның прай нимее ӱлгӱ тутчаң правозы пар (Псалом 24:1;  Исаия 40:21—23; Азых чоох 4:11). Прай чайаахтар ол турғыс салған чахығлар хоостыра чуртирға киректер. Иегова пасхаларына ӱлгӱ пирче. Иеговаа хынып паза аның чооғын истіп, піс аның ӱлгӱзінің саринда турчабыс (1 Летопись 29:11).

▸ 11 пастағ, 10 абзац

Аборт — саай пол парған ӱчӱн алай ипчінің хазығы читпеен ӱчӱн паланы чідір салғаны нимес, че тӧреелек паланы ӧнетін чох иткені. Пала пол парғаннаң сығара іҷезінің чардығы полбинча, ол наа кізі.

▸ 13 пастағ, 5 абзац

Кізее ханны алай ханның ӧӧн тӧрт компоненттерін урчатхан медицинскай процедура. Кізее позының даа, пасха даа кізінің ханын урчалар. Ханның ӧӧн компоненттері: плазма, эритроциттер, лейкоциттер паза тромбоциттер.

▸ 13 пастағ, 13 абзац

Піске палаларны ӱгредерге, оларға чӧп пирерге кирек. Алҷаастар итчетселер, піске оларны хыныснаң тӱзедерге кирек. Иегова позының палаларынаң ідӧк тудынча; оларны хаҷан даа сӧклебинче паза оларға хаҷан даа иртіре хазыр полбинча (Притчи 4:1, 2). Иегова паба-іҷелерге уғаа чахсы кӧзідім кӧзітче. Худай кізіні ағаа туза ла полар иде тӱзетче, аннаңар аның тӱзедіглеріне прай чӱреебіснең хынып аларға оңдай пар (Притчи 12:1). Иегова позының чонына хынча, аннаңар оларны ӱгретче. Оларның саба сағыстарын  на тӱзетпинче, че аның кӧңніне кірер иде сағынарға паза тудынарға ӱгретчеткен чӧптер пирче. Хайди паба-іҷелер палаларын ӱгредерге киректер? Пастап, ноға паба-іҷезінің чооғын истерге кирек полчатханын палаларына піліп аларға полыс пирерге кирек. Ідӧк паба-іҷелер палаларына Иеговаа паза аның Сӧзіне, Библияа, хынарға полыс пирерге паза Библияның принциптерін оңарарға ӱгрет саларға киректер.

▸ 14 пастағ, 13 абзац

Айналар — кізі хараана кӧрінминчеткен кізідең хай-хай кӱстіг духовнай чайаахтар. Олар чабал ангеллер. Олар Худайның чооғын испееннер, аннаңар аның ыырҷылары пол парғаннар (Бытие 6:2; Иуданың 6). Айналар, Сайтанох чіли, Худайға тоғырлан сыхханнар (Второзаконие 32:17; Лука 8:30; Илҷілернің 16:16; Иаковтың 2:19).

▸ 16 пастағ, 4 абзац