1. Худай кізілерні хайдағ кӧстегнең чайаан?

ХУДАЙНЫҢ кізілердеңер сағын салған сағызы уғаа чахсы полған. Ол пастағы кізілерні, Адамны паза Еваны, чайап салып, уғаа сіліг садта чуртат салған. Худай кізілерні палалар тӧрітсіннер, прай чир ӱстӱнде рай итсіннер паза аң-хустарны чахсы кӧрзіннер тіп хынған (Бытие 1:28; 2:8, 9, 15; 6 приложениені кӧріңер).

2. а) Сағын салған сағызын Худай хайди даа толдыр саларын хайдаң пілчебіс? б) Мӧгі чуртастаңар Библияда ниме чоохталча?

² Хайди сағынчазар, кізілер райда хатап чуртирлар ба? «Мин сағын салған сағызымны, толдыр саларбын», — тіпче Иегова (Исаия 46:9—11; 55:11). Ол сағын салған сағызын хайди даа толдыр салар, — пірдеезі паза пір дее ниме ағаа харығ пол полбас. Иегова чирні тикке ле чайабаан тіп пазылча. Пу сӧстер кӧзітчелер: чирні ол хайдағ-да кӧстегнең чайап салған (Исаия 45:18). Чир ӱстӱнде кізілер чуртазыннар тіп хынған. Че Худай хайдағ кізілерні чир ӱстӱнде чуртадарға хынча? Нинҷе тус олар чирде чуртирлар? Библия нандырча: «Арығ чӱректіглер [алай Худайның чооғын исчеткеннер] чирні ӱлӱске аларлар паза анда мӧгі чуртирлар» (Псалом 37:29; Азых чоох 21:3, 4).

3. Кізілер ағырчатхан паза ӧлчеткен ӱчӱн хайдағ сурығ сыхча?

³ Че амғы туста кізілер ағырчалар паза ӱрепчелер, чааласчалар паза ӧдірісчелер. Худай, кізілер іди чуртазыннар тіп, хынмаан. Андағда ниме пол парған паза ноға? Анзына Библия ла нандыр полар.

4, 5. а) Еванаң чылан пастыра кем чоохтасхан? б) Хайди кізі оғыр пол парарға айабас?

⁴ Худайның ыырҷызы пар. Библияда ол Диавол паза Сайтан тіп адалча. Пірсінде Эдем тіп садта Сайтан Еванаң чылан пастыра чоохтас сыххан (Азых чоох 12:9; Бытие 3:1). Сайтан Еванаң чылан чоохтасчатхан чіли идібіскен, че сынында ол позы чоохтасхан. (7 приложениені кӧріңер.)

⁵ Сайтан Диавол хайдаң сыххан? Аны Худай чайаан ма? Чох! Пастап ол ангел полған, соонаң хомай саринзар алыс парып, Диавол пол парған (Иов 38:4, 7). Хайди ол іди алыс парған? Анзын піліп аларға пір кӧзідім полыс пирер. Кізі тӧрееннең ала оғыр полбинча. Ол хайдағ-да туста пасха кізінің нимезіне хыҷалан сыхча. Анынаңар сағынарын тохтатпаза, аның хыҷаланызы тыңнаң тың на полып одырча. Анаң, оңдай пол парза, ол нимені оғырлап алча. Іди ол позы оғыр пол парча — аны оғыр идерге пірдеезі кӱстебеен. (Иаковтың 1:13—15 хығырыбызыңар; 8 приложениені кӧріңер.)

6. Хайди ангеллернің пірсі Худайның ыырҷызы пол парған?

⁶ Ол ангел сах іди алыс парған. Иегова Адамнаң Еваны чайап салғанда паза оларға палалар тӧрідерге чахаанда, ол ангел сағынған полар: «Прай кізілер Иеговаа нимес, мағаа пазырза, чахсы поларҷых!» (Бытие 1:27, 28). Сайтан аннаңар нинҷе кӧп сағынған, анҷох кӧп аның хыҷаланызы ӧскен. Прай кізілер Иеговаа пазырарға кирек полғаннар, Сайтан, тізең, прай чон ағаа пазырзын тіп хынған. Аның ӱчӱн ол, Еванаң чоохтазып, аны алаахтырып алған. (Бытие 3:1—5 хығырыбызыңар.) Іди ол Сайтан Диавол, Худайның ыырҷызы, пол парған.

7. а) Ноға Адамнаң Ева ӱреп парғаннар? б) Ноға піс киріпчебіс паза ӱрепчебіс?

⁷ Адамнаң Ева Худайның чооғын испин, чирге чарабас нимісті чібіскеннер (Бытие 2:17; 3:6). Іди олар чазых ит салып, нинҷе-де тус пазынаң ӱреп парғаннар. Иегованың сӧзі тол парған (Бытие 3:17—19). Адамнаң Еваның палалары чазыхтығ тӧрееннер, аннаңар ідӧк ӱреп парғаннар. (Римдегілерге 5:12 хығырыбызыңар.) Ноға оларның палалары чазыхтығ тӧріп парғаннарын піліп аларға полысчатхан кӧзідім кӧр кӧреелер: сірер ормай парған ідісте халас итсер, ол халас андағох ормайых полар. Ідӧк Адам, Худайның чооғын испин, чазыхтығ пол парған. Піс прайзыбыс Адамның палаларыбыс, аннаңар чазыхтығ алай «ормайых» тӧріпчебіс. Аның ӱчӱн піс киріпчебіс паза ӱрепчебіс (Римдегілерге 3:23; 9 приложениені кӧріңер).

8, 9. а) Сайтан Адамнаң Еваны нимее киртіндірерге хынған? б) Ноға Иегова оларны сах андох чох идібіспеен?

⁸ Сайтан, Адамнаң Еваны Иегованың чооғын испеске кӧӧктіріп, Иеговадаң тоғыр пар сыххан. Ол Адамнаң Еваны, Иегова чой паза хомай устағҷы, оларға часкалығ поларға пирбинче тіп, киртіндірерге хынған. Сайтан кізілерге Худайның устааны кирек чоғыл, олар Худай чох таа чахсыны чабалдаң талластыр поларлар теен. Иегова хайди ӱндезерге кирек полған? Позының тоғыр парчатханнарны сах андох чох идіп, тоғырланысты тохтат салған полза, Сайтанның чойланчатханын кӧзіт пирерҷік пе? Чох.

⁹ Иегова оларны сах андох чох идібіспеен. Аның орнына ол кізілерге постарына постарынаң устирға тус пирген. Нинҷе-де тус пазынаң прайзына іле кӧрінерҷік: Сайтан чойланча паза кізілерге ниме часка  ағылчатханын Иегова ла пілче. Пу кинденің 11-ҷі пастаанда аннаңар чахсы арах піліп аларзар. Хайди сағынчазар, Адамнаң Ева орта тудынғаннар ба? Худайның чооғын испин, Сайтанға киртінерге оларның сылтағ полған ма? Иегова Адамнаң Еваа прай кирек ниме пирген. Оларны уғаа сіліг орында чуртат салған паза  хынығ тоғыс пирген. Сайтан, тізең, оларға пір дее ниме пирбеен. Сірер чи оларның орнында полған ползар, кемнің чооғын истерҷіксер?

10. Полған на кізі хайдағ таллас алнында турча?

¹⁰ Пӱӱн полған на кізінің алнында ідӧк ікі чол. Пістің чуртазыбыс оларнаң палғалыстығ: Иегованы устағҷыбысха таллап алзабыс, Сайтанның чой полчатханын кӧзіт пирербіс, Сайтанны устағҷыбысха таллап алзабыс, ӧлімге ле парарбыс (Псалом 73:28; Притчи 27:11 хығырыбызыңар). Худайның чооғын пӱӱн асхынах кізі исче. Ағаа хоза, чир-чалбахнаң Худай устабинча. Андағда кем чирнең устапча?

11, 12. а) Сайтан Иисусха прай хан-чирлерні пирем теенінең ниме піліп алчабыс? б) Чир-чалбахнаң Сайтан устапчатханын Библия хайди кӧзітче?

¹¹ Чир-чалбахнаң кем устапчатханын Иисус Христос пілген. Пірсінде Сайтан Иисусха, «чир ӱстӱндегі прай хан-чирлерін паза оларның пайын паза сілиин» кӧзіт пиріп, теен: «Тізекке тӱзіп, мағаа пазырзаң, прай пу нимені Сағаа пирібізербін» (Матфей 4:8, 9; Лука 4:5, 6). Чир ӱстӱндегі прай хан-чирлер Сайтанның холында полбаан полза, ол аны Иисусха пирерім тіп поларҷых па? Чох. Мыннаң кӧрінче: прай ӱлгӱлер Сайтанның холында.

¹² Сірер сурирзар, арса: «Иегова прай нимені чайап салған нимес пе? Андағда хайди Сайтан чир-чалбахтың устағҷызы полча?» (Азых чоох 4:11). Йа, прай нимені Худай чайаан, че Иисус кӧні теен: «Чир-чалбахтың кнезі — Сайтан» (Иоанн 12:31; 14:30; 16:11). Павел илҷі Сайтан Диаволны «пу чабал тустың худайы» тіп адаан (2 Коринфтегілерге 4:3, 4). Иоанн илҷі, тізең,  тиксі-тилекей «чабал кӱзі алтында полча» теен (1 Иоанның 5:19).

13. Ноға піске наа чир-чалбах кирек?

¹³ Кӱннің кӱнге чир-чалбахта чуртирға хорғыстығдаң хорғыстығ полып одырча. Ибіре чаалар, кӱстег, сыны чох паза чойырхос тудыныс. Кізілер хайди даа кӱстензелер, ол сидіктерні пӧк полбинчалар. Худай ӱр ниместең Армагеддон чаада пу чабал чир-чалбахты чох идібізер, аның орнына наа, сын чир-чалбах турғыс салар (Азых чоох 16:14—16; 10 приложениені кӧріңер).

14. Иегова позының Хан-ӱлгӱзінің Ханына кемні турғыс салған? Библияда аннаңар ниме пазылча?

¹⁴ Худай Иисусты тигірдегі Хан-ӱлгӱнің Ханына турғыс салған, «аның ӱлгӱзі хаҷан даа тоозылбас-ӱзілбес» (Лука 1:32, 33). Библияда азынада чоохталча: «Чир ӱстӱ ӧӧркі Чайаачыбыстың паза Аның Мессийінің хан-чирі пол парды» (Азых чоох 11:15). Пу кинденің 8-ҷі пастаанда Худайның Хан-ӱлгӱзі хайди прай чир ӱстӱндегі ӱлгӱлернің орнына турыбызарын піліп аларбыс. (Даниил 2:44 хығырыбызыңар.) Анаң Хан-ӱлгӱ прай чир ӱстӱн райға айландыр салар. (11 приложениені кӧріңер.)

15. «Наа чир» нимедір ол?

¹⁵ Библия молҷапча: «Піс, тізең, Хан Худай молҷаан наа тигірні паза наа чирні сағыпчабыс. Анда прай кізілер Худайның оңдайынҷа чуртирлар» (2 Петрның 3:13; Исаия 65:17). Библияда «чир» тіп сӧс пірееде анда чуртапчатхан кізілерні таныхтапча (Бытие 11:1). Аннаңар «наа чир» — сын тудыныстығ, Худайның чооғын исчеткен паза Худай алғастапчатхан кізілер.

16. а) «Наа чирде» чуртир кізілерге Худай хайдағ сыйых пирер? б) Ол сыйыхты алып алар ӱчӱн, піске ниме идерге кирек?

 ¹⁶ Иисус «наа чирде» чуртир кізілерге «мӧгі чуртас пирілер» тіп молҷаан (Марк 10:30). Ол сыйыхты алып алар ӱчӱн, ниме идерге кирек? Пу сурыға нандырығ таап алар ӱчӱн, Иоанн 3:16 паза 17:3 хығырыбызыңар. Амды, райда хайдағ чуртас поларынаңар Библия ниме чоохтапчатханын кӧр кӧреелер.

17, 18. Прай чир-ӱстӱнде амыр чуртас поларын паза пістің хорғыс чох чуртирыбысты хайдаң пілчебіс?

¹⁷ Чабал киректер, чаалар, сайбағлар паза кӱстег чох полар. Чир ӱстӱнде пір дее чабал кізі чох полар (Псалом 37:10, 11; Матфей 5:5). Худай «чааларны чир хырина читіре» тохтат салар (Псалом 46:9; Исаия 2:4). Прай чир ӱстӱнде Худайға хынчатханнар паза аның чооғын исчеткеннер чуртирлар. Чирде хаҷан даа амыр чуртас полар (Псалом 72:7).

¹⁸ Иегованың нымысчылары хорғыс чох чуртирлар. Пурунғыда Израиль чоны Худайның чооғын исчетсе, Худай оларны арачылаҷаң. Аннаңар олар хорғыс чох чуртаҷаңнар (Левит 25:18, 19). Райда піс пірдеезінең паза пір дее нимедең хорыхпаспыс. Піс хаҷан даа хорғыс чох чуртирбыс! (Исаия 32:18; Михей 4:4 хығырыбызыңар.)

19. Наа чир-чалбахта чиис уғаа кӧп поларында ноға ікінҷілебеске чарир?

¹⁹ Чиис кӧп полар. «Тамах чир ӱстӱне толдыра полар, тағлар пастарында даа кӧп полар» (Псалом 72:16). Иегова, «пістің Худайыбыс пісті алғастир» паза «чир позының тамағын пирер» (Псалом 67:6).

20. Чир рай пол парарын хайдаң пілчебіс?

²⁰ Прай чир ӱстӱ рай пол парар. Полған на кізінің сіліг туразы паза сады полар. (Исаия 65:21—24; Азых  чоох 11:18 хығырыбызыңар.) Прай чир ӱстӱ Эдем сад осхас уғаа сіліг пол парар. Иегова чуртасха кирек нимелерні піске хаҷан даа пир турар. Библияда аннаңар чоохталча: «Син холыңны азып, полған на тіріг нименің кӧңнін толдырчазың» (Псалом 145:16).

21. Кізілернің аң-хустарнаң амыр чуртирларын хайдаң пілчебіс?

²¹ Кізілер аң-хустарнаң амыр чуртирлар. Аңнар кізілерге паза хорғыс ағылбастар. Амғы ачын аңнардаң анда палалар даа хорыхпастар. (Исаия 11:6—9; 65:25 хығырыбызыңар.)

22. Ноға ағырығлар чох пол парарлар?

²² Ағырығлар чох полар. Иисус Христос чирде полғанда, кӧп кізіні хазых ит салған (Матфей 9:35; Марк 1:40—42; Иоанн 5:5—9). Че Иисус, Худайның Хан-ӱлгӱзінің Ханы, полар туста прайзын хазых ит салар. Библияда чоохталча: «Ағырығлар даа чох пол парарлар» (Азых чоох 21:4; Исаия 35:5, 6).

23. Ӱреп парған кізілерге хайдағ ізеніс пар?

²³ Ӱреен кізілер хатап чуртирлар. Худай миллионнарны тіргізібізербін тіп молҷапча. «Арығ даа, арығ нимес тее чӱректіг кізілер... тірілерлер». (Иоанн 5:28, 29 хығырыбызыңар; Илҷілернің 24:15.)

24. Райда чуртирға хынчазар ба?

²⁴ Піске прайзыбысха таллирға кирек: Иеговадаңар піліс алып, ағаа нымысчыланарға алай хайди хынчабыс, іди чуртирға. Иеговаа нымысчыланарға пӧгін алзабыс, пісті уғаа чахсы чуртас сағыпча. Иисус Христос, ӧлер алнында, хости тӧгее хазаттыртхан сайбағҷаа теен: «Син миннең хада Райда поларзың» (Лука 23:43, НТ). Иисус Христостаңар паза Худай ағаа пирген молҷағларны хайди ол толдыр саларынаңар кӧп арах піліп алаалар.