1, 2. Иегова кемні позының нанҷызына санаан?

КЕМНЕҢ сірер нанҷылазарҷыхсар? Сірернің кӧңніңерге кірчеткен кізінең, кемнең сірерге тус иртірерге чахсы. Піс нанҷыларыбысты паарсастарының ӱчӱн паза чахсы хылыхтарының ӱчӱн аарлыға санапчабыс.

² Кізілернің аразында Иегованың нанҷылары пар. Кӧзідімге, Авраам Иегованың нанҷыларының пірсі полған (Исаия 41:8; Иаковтың 2:23). Ідӧк Худай Давидке хынған, аны «кӧңніме кірчеткен кізі» тіп адаан (Илҷілернің 13:22). Паза Даниил ухаанҷыны «аарлығ кізі» тіп адаан (Даниил 9:23).

3. Ноға Иегова Авраамны, Давидті паза Даниилны позының нанҷыларына санаан?

³ Хайди Авраам, Давид паза Даниил Иегованың нанҷылары пол парғаннар? Олар аның чооғын пазымнығ искеннер. Иегова Авраамға теен: «Син минің чооғымны искезің» (Бытие 22:18). Худай оонаң кізілерні ле нимес, че пӱкӱлее дее чонны нанҷызына санаҷаң. Иегова Израиль чонына теен: «Минің ӱнімні истіңер, мин сірернің Худайыңар полам, сірер, тізең, минің чоным поларзар» (Иеремия 7:23). Сірер Иегованың нанҷызы поларға хынчатсар, сірерге ідӧк аның чооғын истерге кирек.

4, 5. Хайди Иегова нанҷыларын арачылапча?

⁴ Библияда Иегова, «прай чӱреенең анынаң хада полчатханнарға, чахсы ползын тіп, кӱзін кӧзідерге хынча»  тіп чоохталча (2 Летопись 16:9). Псалом 32:8-те Иегова нанҷыларына ниме молҷааннаңар чоохталча: «Піліп оңнаанын сағаа пирем, сағаа кирек чолҷа парарға ӱгрет салам. Чӧп пирем, синің соонҷа кӧрем».

⁵ Худайның ыырҷызы пістің Иегованаң ынархазыбысты сайбабызарға прай кӱзін салча. Че Иегова пісті ол ыырҷыдаң арачылирға хынча. (Псалом 55:22 хығырыбызыңар.) Піс Иегованың нанҷыларыбыс, аннаңар ағаа прай чӱрекнең нымысчыланарға кӱстенчебіс. Сидіктерде дее піс ағаа киртістіг халчабыс. Библияны пасхан кізілернің пірсі теен: «Ол [Иегова] минің оң холымның хыринда, аннаңар мин хорыхпаспын» (Псалом 16:8; 63:8). Піс тее Иегова піске полыс пирерінде ікінҷілебинчебіс. Че пістің Худайнаң ынархызыбысты Сайтан сайбабызарға кӱстенче. Хайди ол анзын итче?

6. Сайтан кізілердеңер ниме теен?

⁶ 11 пастағда, Сайтан Иеговадаң тоғыр парып, аны чой паза сыны чох тудыныстығ тіп пыролааннаңар піліп алғабыс. Сайтан Иегованы Адамнаң Еваа ниме чахсы, ниме хомай полчатханын постарына пӧгерге пирбинче тіп пыролаан. Че Сайтан Худайны ла нимес, аның прай нанҷыларын даа пыролаан. Нимеде пыролаан? Олар Худайға хынчатхан ӱчӱн нимес, че аннаң ниме-де алып алар ӱчӱн, анынаң нанҷыласчалар тіп чоохтаан. Сайтан полған на кізіні Худайдаң тоғыр айландыр поларбын теен. Ол киректеңер Библиядағы Иов тіп киндеде чоохталча. Иов хайдағ кізі полған паза аннаң нимее ӱгреніп аларға чарир? Анзын піліп алаалар.

7, 8. а) Иов хайдағ кізі полған? б) Сайтан Иовтаңар ниме теен?

⁷ Иов чахсы кізі полған. Ол 3 600-че чыл мының алнында чуртаан. Иегова чирде паза андағ кізі чоғыл  теен. Иов Худайны улуғлаан паза чабал киректерні хырт кӧрген (Иов 1:8). Йа, Иов Иегованың сын нанҷызы полған.

⁸ Сайтан Иовты, Худайдаң ниме-де алып алар ла ӱчӱн, аннаң нанҷыласча теен. Диавол Иеговаа теен: «Син аны, аның туразын паза аның ниме-нооларын прай саринаң арачылапчазың нимес пе? Ол итчеткен нимелерні алғастапчазың, аның маллары прай чир ӱстӱне тарап парғаннар. Че холыңны сунып, прай пар ниме-нооларына теертібіссең, ол сині харғабыспас па?» (Иов 1:10, 11).

9. Иегова Сайтанға ниме идерге чаратхан?

⁹ Сайтан Иовты Худайдаң ниме-де алып алар ӱчӱн нымысчыланча тіп пыролаан. Сынында, ол Иовты Худайдаң хыйа тартып аларбын тіп чоохтаан. Иегова Иов киртістіг халарында ікінҷілебеен, че Сайтанға Иовты сынирға чаратхан. Іди Иовтың Иеговаа сынап хынчатханы іле кӧрінерҷік.

10. Иов хайдағ сынағларға тоғасхан паза хайди ол тудынған?

¹⁰ Пастап Сайтан Иовты мал чох артыс салча: малларының піреелерін оғырлап алчалар, піреелері, тізең, ӧл парчалар. Анаң ол Иовтың сӱмекчіннерін ӧдірібісче. Иов пір дее ниме чох халча. Че Сайтан тохтабинча: ол Иовтың он палазын ӧдірібісче. Андағ даа полза, Иов Иеговаа киртістіг халча. Библияда чоохталча: «Прай ол киректерде Иов чазых итпеен паза Худайны пір дее хомай нимеде пыролабаан» (Иов 1:12—19, 22).

11. а) Паза хайдағ сынағларға Иов урунған? б) Хайди ол тудынған?

¹¹ Че Сайтанға анзы асхынах полған. Ол Иеговаа теен: «Аның иді-сӧӧгіне теертібіссең, ол сині харғабыспас па?» Сайтан Иовха чабал ағырығ ысча (Иов 2:5, 7). Ағырған полза даа, Иов Иеговаа киртістіг халча. Ол тіпче:  «Пыро чох тудынызымнаң ӧлгенҷе хыйа парбаспын!» (Иов 27:5).

12. Сайтанның чооғы чой полчатханын Иов хайди кӧзіт пирген?

¹² Иов Сайтанның ӱчӱн ирееленчеткенін паза Сайтан аны Худайның алнында пыролаанын пілбеен. Прай иреелерні ағаа Иегова ысча тіп сағынған (Иов 6:4; 16:11—14). Андағ даа полза, Иов Иеговаа киртістіг халған. Иов Худайдаң ниме-де алып алар ӱчӱн нимес, ағаа хынған ӱчӱн анынаң нанҷыласханы іле кӧрін парған. Диаволның чооғы чой полған.

13. Иов, Иеговаа киртістіг халып, ниме кӧзіт пирген?

¹³ Худай Сайтаннаң нимедеңер чоохтасханын пілбеен дее полза, Иов Худайға киртістіг халып, Сайтан чой полчатханын кӧзіт пирген. Киртістіг халған ӱчӱн Иегова Иовты сыйыхтаан (Иов 42:12—17).

14, 15. Сайтан полған на кізідеңер ниме тіпче?

¹⁴ Иовтаңар чоох пісті нимее ӱгретче? Сайтан Иеговаа нымысчыланчатхан полған на кізі, аннаң ниме-де алып алар ӱчӱн, нымысчыланча тіпче. Диавол теен: «Позының чуртазының ӱчӱн кізі пар нимезін прай пирібізер» (Иов 2:4). Сайтан «кізі» теенде, Иов ла нимес, че Худайға нымысчыланчатханнарның прайзы даа, Худайдаң ниме-де алып алар ӱчӱн, ағаа нымысчыланчалар тіп чоохтирға хынған. Иов ӱреен соонда чӱзер чыллар ирт парғанда даа, Сайтан Иегованы пыролирын тохтатпаан паза аның нымысчыларын постарынаңар ла сағынчалар тіп пыролаан. Аннаңар Иегова теен: «Оолғым, хыйға пол паза чӱреемні ӧріндір. Андада мині пыролапчатханға мин нандыр полам» (Притчи 27:11).

¹⁵ Иегованың нанҷызы поларға паза прай чуртазыңарда аның чооғының хоостыра тудынарға пӧгін алзар,  Сайтан чой полчатханын кӧзіт поларзар. Чуртастарыңда кӧп алызығлар идерге кирек полза даа, Худайның нанҷызы поларға пӧгін алғаныңарға хаҷан даа ачырғанмассар! Пу уғаа аарлығ пӧгін. Ноға? Сынында, Сайтан, сидіктерге урунзар, сірер Худайның чооғын испинібізерзер тирге иткен нооза. Сайтан пісті Худайға киртістіг халбазыннар тіп кӱстенче. Хайди ол анзын итче?

16. а) Кізілерге Иеговаа нымысчыланарға Сайтан хайди харығ полча? б) Сірерге харығ полар ӱчӱн, ол ниме идерге айабас?

¹⁶ Худайнаң ынархазыбысты сайбабызар ӱчӱн, Сайтан аймах-пасха оңдайларнаң тузаланча. Кӧзідімге, Библияда ол «ыыран чӧрчеткен ала парыс чіли, кемні чібізерін тілеп чӧрче» тіп пазылча (1 Петрның 5:8). Хайди ол ыыранча? Пірееде туғаннар, нанҷылар алай пасха даа кізілер Иегованың кӧңнінҷе тудынарға паза Библияны ӱгренерге харығ полчалар (Иоанн 15:19, 20) *. Пірееде Диавол, «чарыхтың ангелінің омазын алып», кізілерні алаахтырча (2 Коринфтегілерге 11:14). Ідӧк Сайтан, Худайнаң ынархазыбысты сайбабызар ӱчӱн, пісті Иеговаа нымысчыланарға турыстығ нимеспіс тіп киртіндірче (Притчи 24:10).

17. Ноға піс Иегованың чооғын исчебіс?

¹⁷ Иегованың чооғын исчетсебіс, Сайтан чой полчатханын кӧзітчебіс. Худайның чооғын истерге піске ниме полызар? Библияда чоохталча: «Иегова Худайыңа прай чӱрееңнең, прай кӧңніңнең, прай кӱзіңнең хын»  (Второзаконие 6:5). Піс Иеговаа хынчабыс, аннаңар аның чооғын исчебіс. Иеговаа хынызыбыс нинҷе ӧсче, анҷох аның чооғын истерге хынчабыс. Иоанн илҷі пасхан: «Худайның чахығларын толдырчатханыбыс Ағаа хынчатханыбысты таныхтапча. Аның чахығларын толдырарға, тізең, тың аар нимес» (1 Иоанның 5:3).

18, 19. а) Иегова хомайға санапчатхан киректерні адап пиріңер. б) Иегова пісті піс ит полбинчатхан нимені идерге кӱстебинчеткенін хайдаң пілчебіс?

¹⁸ Иегова хомайға санапчатхан киректер пар. Оларның піреелерінеңер « Иегова хырт кӧрчеткен нимелерні хырт кӧріңер» тіп рамкада хығырып аларға чарир. Оларның хайзы-да сірерге тың даа хомай нимес тіп пілдірер, арса. Рамкадағы Библияның стихтарынаңар тирең сағын кӧрзер, Иегованың чооғын искені ноға хыйға полчатханын піліп аларзар. Арса, чуртазыңарда ниме-де  алыстырарға кирек полчатханы кӧрін парар. Алызарға ниик полбас. Че алыссар, чӱрееңерде амыр паза ӧрініс полар. Сірер Худайның сын нанҷызы чіли тудынғазар нооза (Исаия 48:17, 18). Чуртаста алызығлар ит поларында ноға ікінҷілебеске чарир?

¹⁹ Иегова піс ит полбинчатхан нимені идерге пісті хаҷан даа кӱстебес (Второзаконие 30:11—14). Иегова пістің нанҷыбыс, ол пісті позыбыстыңох артых пілче. Ол пістің чахсы даа, уйан даа сариларыбысты пілче (Псалом 103:14). Павел илҷі теен: «Худай, тізең, киртістіг, ол сірерге сыдап полбас хыҷыхтанысты ыспас. Хыҷыхтаныста сірерге аны сыдас парыбызар кӱс пирер» (1 Коринфтегілерге 10:13). Иегова піске орта тудынарға хаҷан даа полызар. Хайдағ даа сидіктерні тобырып алзыннар тіп, ол піске пістің кӱзібістең артых кӱс пирер (2 Коринфтегілерге 4:7). Павел илҷі пасхан: «Иисус  Христос мині пик итчеткенде, прай нимее кӱзім чидер» (Филипптегілерге 4:13). Ноға Павел анзында ікінҷілебеен? Аның чуртазында сидіктер полғанда, Иегова ағаа полысчаң.

20. Иегованың хайдағ качестволарына кӧӧгерге кирекпіс паза ноға?

²⁰ Иегованың нанҷызы полып алар ӱчӱн, ол хырт кӧрчеткен нимелерні итпеені ле асхынах полар, че ағаа хоза ниме-де идерге кирек (Римдегілерге 12:9). Ол хынчатхан нимелерге хынарға кирек. Аннаңар Псалом 15:1—5-те пазылча. (Хығырыбызыңар.) Худайның нанҷылары аның чахсы качестволарына кӧӧгіп, мындағ качестволарын кӧзітчелер: «хыныс, ӧрініс, амыр хоных, тыстаныс, паарсас, айас, киртініс, тоғырланмааны, посты тудын пілгені» (Галат чиріндегілерге 5:22, 23).

21. Худайның кӧңніне кірчеткен хылыхтығ поларға сірерге ниме полызар?

²¹ Мындағ чахсы хылыхтығ поларға сірерге ниме полыс пирер? Библияны сыбыра хығырарға паза ӱгренерге кирек (Исаия 30:20, 21). Іди Иеговаа хынызыңар ӧзер паза аның сӧзінҷе тудынарға хынарзар.

22. Ноға Иегованың чооғын истерге кирек?

²² Чуртазыбыста алызығлар итчетсебіс, иргі кип-азаабысты сурып, наа кип-азах кисчеткенге тӧӧйбіс. Библияда «иргі чуртас кибірлерін хыйа ал тастабызып», «наа кізі пол парарға» кирек тіп чоохталча (Колосстағыларға 3:9, 10). Иегованың чооғын истіп, мындағ алызығлар итчетсебіс, Иегова піске «илбек сыйых» пирер (Псалом 19:11). Иегованың чооғын истіңер. Сыйых ӱчӱн нимес, че ағаа хынчатхан ӱчӱн нымысчыланыңар. Сайтанның чой полчатханын кӧзідіңер. Андада сынап Иегованың нанҷызы полып аларзар!