1. Худайға хайди орта пазырарын кем чоохтап полар?

ПРАЙ даа религиялар Худайдаңар сынны ӱгретчебіс тіпчелер. Худайдаңар паза ағаа хайди орта пазырарынаңар олар пасха-пасха ӱгретчелер, аннаңар олар прайзы сын нимее ӱгретчелер тіп полбас. Андағда Худайдаңар сынны паза ағаа хайди орта пазырарынаңар хайдаң піліп аларға? Анзын Иегова Худайдаң на піліп аларға чарир.

2. Худайға хайди орта пазырарын хайдаң піліп аларға?

² Иегова, пісті ағаа хайди орта пазырарға піліп алзыннар тіп, піске Библия пирген. Аннаңар Библияны ӱгренерін тохтатпаңар. Худай, сірерге хынчатхан ӱчӱн паза чуртазыңар чахсы арах ползын тіп, сірерге Библиядағы ӱгредіглерні піліп аларға полызар (Исаия 48:17).

3. Худай пістең ниме сағыпча?

³ Піреелері прай религиялар Худайзар апарчалар тіпчелер. Че Иисус Христос іди сағынмаан. Ол теен: «Мині „Хан-пигім! Хан-пигім!“ тіпчеткен полған на кізі нимес, че Тигірдегі Пабамның кӧңнін не толдырчатхан кізі Тигір хан-чирінзер кіріп алар». Аннаңар Худайның кӧңнін піліп алып, аны толдырып чуртирға кирек. Ол уғаа аарлығ сурығ, Иисус Худайның кӧңнін толдырбинчатханнарны «закон сайбапчатханнар», пасха сӧстернең чоохтаза, сайбағҷылар тіп адаан (Матфей 7:21—23, НТ).

4. Худайның кӧңнін толдырарынаңар Иисус ниме теен?

⁴ Иисус Худайның кӧңнін толдырарға оой полбас тіп сизіндірген. Ол теен: «Кір турыңар тарғынах ізікче, ӧлімзер ле апарчатхан ізік чалбах поладыр, андар  парчатхан чол, тізең, ниик поладыр. Кӧп кізі ол чолҷа парадыр. Чуртассар апарчатхан ізік тарғынах, андар парчатхан чол, тізең, аар. Оларны таап алчатхан кізі асхынах» (Матфей 7:13, 14). Тар чол, Худайзар орта чол, мӧгі чуртасха апарча, чалбах чол, Худайзар апарбинчатхан чол, ӧлімге ағылча. Че Иегова пір кізі дее ӧлзін тіп хынминча. Аннаңар кізілерге позынаңар піліп аларға оңдай пирче (2 Петрның 3:9).

5. Худайға орта нымысчыланчатханнарны хайди танып аларға?

⁵ Иисус Худайға орта нымысчыланчатхан кізілерні хайди танып аларға чарыда чоохтап пирген. Анзы оларның нимее киртінчеткеннерінең паза киректерінең іле кӧрінер. Ол теен: «Сірер оларны иткен нимелерінең пілерзер». Анаң хосхан: «Полған на чахсы ағас чахсы чистек пирче» (Матфей 7:16, 17). Анзы Худайға пазырчатханнарның хаҷан даа алҷаас итпин чуртирларын таныхтабинча. Олар Худайның кӧңнінче тудынарға кӱстенчелер. Худайға орта пазырчатханнарны хайди танып аларға? Ам анзын кӧр кӧреелер.

6, 7. Ноға Худайға пазырыс Библияда тӧстелерге кирек? Иисустың кӧзідімі пісті нимее ӱгретче?

⁶ Худайның сын нымысчыларының киртіністері Библияда тӧстелче. Библияда чоохталча: «Прай Ызых Пічиине Худай тын кирче, Ол ӱгредіге, чӧп пиреріне, читпестерні іле сығарарына, орта чуртирына ӱгретче. Іди полза, Худай кізізі толдыра паза ноо даа чахсы кирекке тимде полар» (2 Тимофейге 3:16, 17). Павел илҷі христианнарға пасхан: «Аннаңар, сірер пістең искен Худай сӧзін, кізі сӧзін чіли нимес, че Худай сӧзін чіли алынғаннарың ӱчӱн, Худайыбысты сыбыра алғыстапчабыс.  Ол сынынаң Худай сӧзі» (1 Фессалониктегілерге 2:13). Сын пазырыс кізілер сағынып алған сағыстарда, кибірлерде алай пірее пасха нимелерде нимес, че Худай Сӧзінде, Библияда, тӧстелерге кирек.

⁷ Иисустың прай ӱгредіглері Худай Сӧзінде тӧстелгеннер. (Иоанн 17:17 хығырыбызыңар.) Ол ӱгретчетсе, удаа Ызых Пічікті цитировать полҷаң (Матфей 4:4, 7, 10). Худайның сын нымысчылары, Иисусох чіли, Библияда тӧстелчеткен нимее ле ӱгретчелер.

8. Худайға пазырыстаңар Иисус ниме теен?

⁸ Пір ле сын Худайға, Иеговаа, пазырчалар. Псалом 83:18-те чоохталча: «Кізілер пілзіннер, син не, кемнің ады Иегова, чир ӱстӱнде Иң Пӧзік Худайзың» (Псалом 83:18). Иисус Христос, кем сын Худай полчатханын кізілер пілзіннер тіп, аның адын асхан. (Иоанн 17:6, НТ хығырыбызыңар.) Иисус чоохтаан: «Позыңның Хан Худайыңа пазыр паза Аның на нымысчызы пол» (Матфей 4:10). Худайның нымысчылары, Иисусох чіли, тудынчалар. Олар Иеговаа ла пазырчалар паза андар, аның адын адап, айланчалар. Худайның адынаңар паза Худай кізілерге ниме идерінеңер пасхаларына чоохтапчалар.

9, 10. Хайди Худайның нымысчылары удур-тӧдір хыныстарын кӧзітчелер?

⁹ Оларның аразында сын хыныс. Иисус ӱгренҷілерін удур-тӧдір хынарға ӱгрет салған, Худайның сын нымысчылары сах ідӧк тудынчалар. (Иоанн 13:35 хығырыбызыңар.) Хайда даа тӧреен ползалар, хайдағ даа культурада ӧскен ползалар, пай даа, чох таа ползалар, олар ӱдӱр-тӧдір харындас-пиҷелер чіли хынысчалар (Колосстағыларға 3:14). Аннаңар олар чааларда араласпинчалар паза кізі ӧдірбинчелер. Библияда чоохталча: «Худайның палаларын паза сайтанның палаларын хайди  пасхалидырлар? Орта итпинчеткен паза харындазына хынминчатхан кізі Худайдаң тӧрібеен». Ідӧк: «Піс удур-тӧдір хынызарға кирекпіс. Піске Каин чіли полбасха кирек. Ол, сайтанның кізізі полып, позының харындазын ӧдір салған» (1 Иоанның 3:10—12; 4:20, 21).

¹⁰ Худайның сын нымысчылары удур-тӧдір полызар ӱчӱн, тустарын паза кӱстерін хорадарға тимделер (Еврейлерге 10:24, 25). Олар прай кізілерге чахсы ниме итчелер (Галат чиріндегілерге 6:10).

11. Арачыланыс Иисус Христостаң на пастыра полчатханына ноға киртінерге кирек?

¹¹ Арачыланыс Иисус Христостаң на пастыра, аннаңар аның чооғын исчелер. Библияда чоохталча: «Арачыланыс Аннаң пасха пірдеезінде чоғыл. Кізілерге, позыбысты арачыланарыбыс ӱчӱн, пу чир ӱстӱнде Аннаң пасха пірдеезінің ады адалбаан» (Илҷілернің 4:11, 12). Пу кинденің 5-ҷі пастааннаң Иегова Иисусты Худайның чооғын исчеткен кізілернің ӱчӱн чуртазын толыға пирібіссін тіп, чирзер ысханнаңар піліп алғабыс (Матфей 20:28). Паза Иегова Иисусты чирнең устирға турғыс салған. Аннаңар Библияда, мӧгі чуртирға хынчатсабыс, Иисустың чооғын истерге кирекпіс тіп чоохталча. (Иоанн 3:36 хығырыбызыңар.)

12. Ноға Худайның нымысчылары политикада араласпинчалар?

¹² Политикада араласпинчалар. Иисус Христос политикада араласпаан. Пилаттың, Рим устағҷызының, чарғызының алнында турчатханда, ол теен: «Минің хан-чирім пу чир ӱстӱнде нимес». (Иоанн 18:36 хығырыбызыңар.) Худайның нымысчылары, Христос чіли, Худайның Хан-ӱлгӱзіне киртістіглер. Аннаңар, хайда даа чуртапчатсалар, олар политикада араласпинчалар. Че андағ даа полза, олар постарының хазналарының законнарынҷа чуртапчалар. Библияда «ӧӧркі ӱлгӱлернің»,  хазнаның устағҷыларының, чооғын истерге кирек тіп чоохталча (Римдегілерге 13:1). Хайдағ-да закон Худайның чахиина тоғыр полза, Худайның нымысчылары, илҷілер чіли, тудынчалар. Олар пірсінде тееннер: «Піс кізілернің нимес, Худайның сӧзін истерге кирекпіс» (Илҷілернің 5:29; Марк 12:17).

13. Худайның сын нымысчылары нимедеңер искірчелер?

¹³ Худайның Хан-ӱлгӱзі ле кізілернің сидіктерін пӧк поларына киртінчелер. Иисус теен: «Тигір хан-чирінеңер Чахсы Хабарны прай чир ӱстӱндегі чоннар иссіннер». (Матфей 24:14 хығырыбызыңар.) Худайның Хан-ӱлгӱзі пирер нимелерні пір дее пасха ӱлгӱ пир полбас (Псалом 146:3). Иисус піске ол Хан-ӱлгӱдеңер пазырарға чахаан: «Синің хан-ӱлгӱң пеер килзін. Чир ӱстӱнде дее, тигірдегӧк чіли, Синің кӧңніңҷе прай ниме ползын» (Матфей 6:10). Библияда Худайның Хан-ӱлгӱзі прай чирдегі ӱлгӱлерні чох идібізер, «позы, тізең, мӧгі тус турар» тіп чоохталча (Даниил 2:44).

14. Хайди сағынчазар, кем Худайға орта нымысчыланча?

¹⁴ Хайди сағынчазар, кем Худайға орта пазырча: кем ӱгредіглерін Библияда тӧстепче? Кем Худайның адын чонға искірче? Хайдағ чонның аразында сын хыныс пар тирге чарир? Кем арачыланыс Иисус Христостаң на пастыра тіп киртінче? Кем политикада араласпинча? Кем Худайның Хан-ӱлгӱзі ле кізілернің прай сидіктерін пӧк полар тіп ӱгретче? Иегованың киречілері (Исаия 43:10—12).

15. Пістің пазырызыбыс Худайның кӧңніне кірзін тіп ниме идерге кирек?

¹⁵ Худай парына киртінгені ле асхынах. Айналар даа анзына киртінчелер, че аның чооғын испинчелер (Иаковтың 2:19). Пістің пазырызыбыс Худайның кӧңніне  кірер ӱчӱн, ол парына киртінерге ле асхынах, ол киректепчеткен нимелерні прай идерге кирек.

16. Ноға піске чой религиянаң палғалыстығ нимелердең хыйа тудынарға кирек?

¹⁶ Пазырызыбыс Худайның кӧңніне кірер ӱчӱн, пісті чой религиянаң пір дее ниме палғалыстырбасха кирек. Исаия ухаанҷы пасхан: «Сығыңар андартын... постарыңны арығ тудыңар» (Исаия 52:11; 2 Коринфтегілерге 6:17). Аннаңар піске чой религиянаң палғалыстығ нимелердең хыйа тудынарға кирек.

17, 18. «Илбек Вавилон» нимедір ол паза ноға аннаң сығыбызарға маңзырирға кирек?

¹⁷ Хайдағ религияны чой религия тирге чарир? Худайның Сӧзінде пазылбаан оңдайнаң Худайға пазырарға ӱгретчеткен религияны. Библия прай чой религияларны «Илбек Вавилон» тіп адапча (Азых чоох 17:5). Ноға? Прай чир ӱстӱне суғ чайылған соонда Вавилон саарда уғаа кӧп чой ӱгредіглер тӧстелгеннер. Ол ӱгредіглер, прай чир ӱстӱне тарап парып, чой религиялар пол парғаннар. Кӧзідімге, Вавилондағы кізілер ӱс худайнаң піріккен худайларға пазырҷаңнар. Амғы туста кӧп религиялар Худай Троица тіп ӱгретчелер. Че Библияда пір ле сын Худайдаңар пазылча, аның ады Иегова, Иисус Христос, тізең, аның Оолғы (Иоанн 17:3). Ідӧк, Вавилонда чуртаан кізілер, ӱреен соонда кізінің худы чуртапча паза піреелері адта ирееленчелер тіп киртінҷеңнер. Че ол чой ӱгредіг. (14, 17 паза 18 приложениелерні кӧріңер.)

¹⁸ Худай ӱр ниместең прай чой религияларны чох идібізербін тіп молҷапча (Азых чоох 18:8). Аннаңар чой религиядаң, соона салдырбин, сығыбызарға кирек. Иегова сірерні андартын сығарға маңнанзыннар тіп хынча (Азых чоох 18:4).

19. Иеговаа нымысчыланарға пӧгін алзар, ол сірерге хайди полызар?

 ¹⁹ Чой религиядаң сығып, Иеговаа пазырарға пӧгін алзар, сірернің нанҷыларыңның алай туғаннарыңның піреезі сірерні піл полбин, тоғырланар даа. Че Иегова сірерні артыспас. Худайға нымысчылан сыхсар, сірер прай чир ӱстӱндегі удур-тӧдір хынысчатхан миллионнар харындас-пиҷелернең пӱткен сӧбіренің чардығы пол парарзар. Ідӧк Худай молҷапчатхан наа тилекейде чуртирға ізеніс полар (Марк 10:28—30). Кем пілче, Иеговаа нымысчыланарға пӧгін алғаныңарға тоғырланған чағыннарыңның піреезі пола-пола Библияны ӱгрен сығар, арса.

20. Ноға Иеговаа амох нымысчыланып пастирға кирек?

²⁰ Прай чабал киректерні Худай чирдең чох идібізер тус уғаа чағын. Анаң аның Хан-ӱлгӱзі устап пастир (2 Петрның 3:9, 13). Піс ол тусты чидікпин сағыпчабыс. Андада прай кізілер Иеговаа ол киректепчеткен оңдайнаң орта пазырарлар. Иеговаа амох нымысчыланып пастаңар.