1, 2. Ноға пазырысты аарлығ сыйых тирге чарир? Библияда пазырыстаңар ниме пазылчатханын ноға пілерге кирек?

ЧИР илбек Тилекейнің хыринда уғаа кічиҷек. Че анда чуртапчатхан кізілер аннаң хай-хай кічиҷектер. Библияда чоннар Иеговаа суғ тамҷығы осхас тіп пазылча (Псалом 115:15; Исаия 40:15). Псалом 145:18, 19-та чоохталча: «Иегова аны прай чӱрекнең, полызығ сурынып, хығырчатханнарға прайзына чағын. Аның хорыхчатханнарның кӧңнілерін толдырар, оларның, полызығ сурынып, хысхырчатханнарын ис салып, арачылап алар». Худай піске ағаа пазырарға чаратханы хайдағ чахсыдыр! Иегова, Тилекейнің Чайаачызы, піске чағын поларға хынча паза пазырыстарыбысты истерге тимде. Пазырыс — полған на кізее пирілген аарлығ сыйых.

² Че Иегова пістің пазырыстарыбысты, аның кӧңніне кірер иде ле пазырзабыс, истер. Аннаңар Библияда пазырыстаңар ниме чоохталчатханын піліп алаалар.

3. Ноға Худайға пазырарға кирек?

³ Иегова пісті аннаң чоохтассыннар тіп хынча. Піс анзын хайдаң пілчебіс? Филипптегілерге 4:6, 7 хығырыбызыңар. Сағын на кӧріңер: Тилекейнің Ээзі сірердеңер сағыссырапча паза сірернің чӱрееңерде ниме  полчатханнаңар паза сидіктеріңнеңер ағаа пазырыста чоохтазыннар тіп хынча.

4. Иеговаа сыбыра пазырғаныбыс аннаң ынархазыбысты хайди тыыт полар?

⁴ Пазырыс Иеговаа чағын нанҷы поларға полысча. Нанҷылар удур-тӧдір сағыстарынаң, чӱректерінде ниме полчатханнарынаң паза сағыссырастарынаң ӱлесчетселер, оларның ынархазы пиктең пик ле полып одырча. Иегова позының сағыстарынаңар, чӱреенде ниме полчатханынаңар паза полар туста ниме идерінеңер Библия пастыра піске чоохтапча. Сірер дее ағаа чӱрееңерні прай ас турыңар. Андада Иегованаң ынархазыңар пиктең пик полып одырар (Иаковтың 4:8).

5. Иегова прай пазырыстарны испинчеткенін хайдаң пілчебіс?

⁵ Иегова прай пазырыстарны исче бе? Чох. Исаия чуртаан туста Иегова Израиль чонына чоохтаан: «Сірер  кӧп пазырчатсар даа, мин сірерні испинчем. Сірернің холларыңа хан толдыра» (Исаия 1:15). Иегова хырт кӧрчеткен нимелерні паза аннаң ынархазыбысты сайбапчатхан киректерні итсебіс, ол пістің пазырызыбысты испинібізер.

6. Пазырыс киртініснең хайди палғалыстығ? Пістің киртінізібіс нимедең кӧрінер?

⁶ Худай пістің пазырызыбысты иссін тіп хынчатсабыс, ағаа киртінерге кирекпіс (Марк 11:24). Павел илҷі аннаңар піди чоохтаан: «Киртінізі чох кізілернің пірдеезі Худайның кӧңніне кірбес. Худайзар килчеткен кізілер Аның парына паза Худайны тілепчеткеннер Ағаа сыйыхтадарларына ізенерге киректер» (Еврейлерге 11:6). «Мин Худайға киртінчем» теені ле асхынах, киртіністі киректернең кӧзідерге кирек. Хайди? Хаҷан даа Худайның чооғын истіп. (Иаковтың 2:26 хығырыбызыңар.)

7. а) Ноға посты кӧдірбин, Худайны улуғлап пазырарға кирек? б) Иеговаа прай чӱректі азып пазырғаны нимедір ол?

⁷ Пазырчатса, посты кӧдірбин, Худайны улуғлап, айланарға кирек. Ханзар алай президентсер айланған ползабыс, ідӧк тудынарҷыхпыс нооза. Иегова — Прай нимедең кӱстіг Худай, аннаңар улуғласха ол уламох турыстығ (Бытие 17:1; Псалом 138:6). Хайдағ-да сӧстерні хатап-хатап адап пазырбаңар. Пазырчатсар, Иеговаа прай чӱрееңерні азыңар (Матфей 6:7, 8).

8. Худайдаң пірее ниме сурынчатсабыс, позыбыс ниме идерге кирекпіс?

⁸ Худайдаң пірее ниме сурынып пазырчатсабыс, піске сурынызыбыс хоостыра тудынарға кирек. Кӧзідімге, чуртастағы кирексіністерібістеңер Иеговаа пазырзабыс, ол пістің орныбысха прай ниме идер тіп сағынғаны  саба полар. Піске позыбысха кӱстеніп тоғынарға паза хайдағ даа тоғыс идерге тимде поларға кирек (Матфей 6:11; 2 Фессалониктегілерге 3:10). Алай хайдағ-да хыҷаланысха тоғырланып, Иеговадаң полызығ сурынчатсабыс, пісті хыҷаландырчатхан нимелердең хыйа тудынарға кирекпіс (Колосстағыларға 3:5). Амды пазырыстаңар нинҷе-де сурыға нандыр кӧреелер.

9. Кемге пазырарға кирек? Иоанн 14:6 хоостыра, кемнең пастыра пазырарға кирек?

⁹ Кемге пазырарға кирек? Иисус Христос ӱгренҷілерін «Тигірдегі Пабаа» пазырарға ӱгреткен (Матфей 6:9). Ідӧк ол теен: «Чол, Сын паза чуртас — Минмін. Мағаа киртінчеткен кізі ле Пабамзар пар полар, Мин чох пірдеезі пар полбас» (Иоанн 14:6). Пу стихтардаң кӧрінче: Иеговаа ла паза Иисус Христос пастыра ла пазырарға кирек. Иисус Христос пастыра пазырғаны ниме таныхтапча? Иегова Иисусха пирген уғаа аарлығ тоғысха улуғласнаң хайғанын. Иисус чирзер пісті чазыхтаң паза ӧлімнең осхырып аларға килген (Иоанн 3:16; Римдегілерге 5:12). Ағаа хоза, Иегова аны иң улуғ абыс паза чарғыҷы поларға турғыс салған (Иоанн 5:22; Еврейлерге 6:20).

10. Худайға хайди пазырарға кирек?

¹⁰ Хайди пазырарға кирек? Библияда хайди даа тізекке тӱзіп, одырып алай турып пазырарға кирек тіп пазылбинча. Иеговаа пазырчатса, ӧнетін хайди-да турарға кирек чоғыл (1 Летопись 17:16; Неемия 8:6; Даниил 6:10; 1 Царей 8:22, 23). Иеговаа кізінің хайди турып алып пазырчатханы нимес, че чӱреенең пазырчатханы аарлығ. Пазырарға хайдағ даа орында паза хайдағ  даа туста чарир. Істібісте дее пазырзабыс, Иегова пісті истер (Неемия 2:1—6).

11. Нимедеңер пазырарға чарир?

¹¹ Нимедеңер пазырарға чарир? Иегованың кӧңніне кірчеткен прай нимелердеңер пазырарға чарир. Библияда чоохталча: «Піс Худайның кӧңніне кірчеткен нимелернің хайзын даа сурзабыс, Ол пісті исче» (1 Иоанның 5:14). Посха пірее нимедеңер Худайдаң сурынарға чарир ба? Йа, чарир. Иегова пісті ағаа, нанҷызына чіли, прай ниме чоохтазыннар тіп хынча. Пазырчатсабыс, постарыбыстың сағыстарыбыстаң паза чувстволарыбыстаң уйадарға кирек чоғыл (Псалом 62:8). Орта тудынар ӱчӱн, Худайдаң ызых хут сурынарға чарир (Лука 11:13). Чахсы пӧгіннер алып алар ӱчӱн, хыйға тудыныстаңар пазырарға чарир, сидіктерні тобырып алар ӱчӱн, кӱс сурынарға чарир (Иаковтың 1:5). Ідӧк Иегова пыроларыбысты тастазын тіп сурынарға уғаа кирек (Ефестегілерге 1:3, 7). Ағаа хоза, пасхаларынаңар, сӧбіредегілердеңер алай ӧмедегі харындас-пиҷелердеңер, пазырарға кирек (Илҷілернің 12:5; Колосстағыларға 4:12).

12. Иң пурун нимедеңер пазырарға кирек?

¹² Иң пастағызын нимедеңер пазырарға кирек? Иегованаң палғалыстығ нимелердеңер паза аның кӧңні толарынаңар. Піске итчеткен прай нимелернің ӱчӱн аны прай чӱреебіснең алғыстирға кирекпіс (1 Летопись 29:10—13). Иисус чирде полғанда, ӱгренҷілерін сах ол нимелердеңер пазырарға ӱгреткен. (Матфей 6:9—13 хығырыбызыңар.) Ол ӱгренҷілеріне, иң пурун Худайның ады сабланзын тіп, аннаң Худайның Хан-ӱлгӱзі килзін паза Худайның кӧңні прай чир ӱстӱнде толзын тіп, пазырарға кирек теен. Анаң на посха ниме-де сурынарға чарир. Иң пурун Иегованаң палғалыстығ нимелердеңер  пазырчатсабыс, аннаң нанҷыласханы пастағы орында полчатханын кӧзітчебіс.

13. Нинҷе ӱр пазырарға кирек?

¹³ Нинҷе ӱр пазырарға кирек? Библияда аннаңар пір дее ниме пазылбинча. Пазырыстар пасха-пасха полчалар. Кӧзідімге: азыранар алнында хысхаҷахти пазырарға чарир. Иегованы пірее нименің ӱчӱн алғыстапчатсабыс алай сағыссырастарыбыстаңар ағаа  чоохтапчатсабыс, пазырыстарыбыс узун арах полар (1 Самуила 1:12, 15). Иисус чуртаан туста піреелері, пасхаларын хайхадар ӱчӱн, ӧнетін ӱр пазырҷаңнар. Олар чіли, ӱр пазырарға кирек чоғыл (Лука 20:46, 47). Андағ пазырыстар Иегованы хайхатпинчалар. Ол чӱректең сыхчатхан пазырыстарны аарлыға санапча.

14. Нинҷе удаа пазырарға кирек паза ноға?

¹⁴ Нинҷе удаа пазырарға кирек? Иегова пісті аннаң удаа чоохтассыннар тіп хынча. Библия піске: «Сыбыра пазырыңар», — тіпче (Римдегілерге 12:12; 1 Фессалониктегілерге 5:17). Ноға? Иегова пісті истерге хаҷан даа тимде. Піске аны хынызының ӱчӱн, піске прай ниме пирчеткен ӱчӱн кӱннің сай алғыстирға чарир. Ідӧк пістің  чуртазыбыснаң устазын тіп, піске хабассын паза піске кӱс пирзін тіп сурынарға чарир. Иеговаа пазырарға оңдай парын сынап аарлыға санапчатсабыс, аннаң чоохтазарға тус хаҷан даа табарбыс.

15. Ноға пазырыс соонда «аминь» тирге кирек?

¹⁵ Ноға пазырыс соонда «аминь» тирге кирек? «Аминь» сӧс «орта» алай «іди ползын» теенін таныхтапча. Пазырысты «аминь» тіп сӧснең тоосчатсабыс, прай чӱреебіснең пазырғаныбысты киречілепчебіс (Псалом 41:13). Пасха кізінің пазырғанының соонда «аминь» тіпчетсебіс, ол кізінің пазырызынаң чарасчатханыбысты кӧзітчебіс. «Аминь» сӧсті істібісте алай истілдіре чоохтирға чарир (1 Летопись 16:36; 1 Коринфтегілерге 14:16).

16. Ноға Иегова пістің пазырыстарыбысха нандырча тирге чарир?

¹⁶ Ноға Иегова пазырыстарыбысха нандырча тирге чарир? Библияда ол «Пазырыстарны исчеткен Худай» тіп адалча (Псалом 65:2). Иегова миллионнарның азых чӱректіг пазырыстарын исче паза оларның пазырыстарына нандырча.

17. Хайди Иегова пазырысха нандырча? Кӧзідімнер кӧзіт пиріңер.

¹⁷ Иегова, ангеллерін алай пасха даа нымысчыларын піске полызарға ызып, пазырыстарыбысха нандырча (Еврейлерге 1:13, 14). Библияны піліп аларға сурынып пазырған соонда, ӱр ниместең минзер Иегованың киречілері килгеннер тіп кӧп кізі чоохтапча. Анзы ангеллернің «Чахсы Хабарны» искірерінде араласчатханнарын кӧзітче. (Азых чоох 14:6 хығырыбызыңар.) Ідӧк Иегова, харындас-пиҷелерні кирек туста піске полызарға  кӧӧктіріп, пістің пазырызыбысха нандырча (Притчи 12:25; Иаковтың 2:16).

18. Паза хайдағ оңдайларнаң Иегова пазырысха нандырча?

¹⁸ Иегова паза хайди пазырысха нандырча? Хайдағ-да сидікті тобырып аларға піске устағ алай кӱс кирек полза, Иегова ызых хут пирче (2 Коринфтегілерге 4:7). Пірее пӧгін аларға кирек полза, Иегова позының Сӧзіндегі килістіре сағыстарны табарға полыс пирер. Хайди? Библияны пос алынҷа хығырчатсабыс, хайиибыс хайдағ-да піске кирек сағысха тартылар. Алай Иегова кемні-де ӧме чыылиинда комментарийде піске кирек сағыстар чоохтирға кӧӧктірер. Алай ах сағалларның піреезі Библиядағы сағыснаң ӱлезер (Галат чиріндегілерге 6:1).

19. Иегова пазырызыбысха нандырбинча тіп пілдірчетсе, нимедеңер ундутпасха кирек?

¹⁹ Пірееде Иегова пазырызыбысха нандырбинча тіп пілдірер, арса. Че ундутпаңар: піске ниме кирек полчатханын, хаҷан паза хайди анзын пирерін Иегова чахсы пілче. Пірееде пір сурыныснаң Худайға кӧп хати пазырарға кирек — іди анзы піске сынап кирек полчатханын Иегова кӧрер. Кӧп хати пазырып, Иегова пазырызыбысха хайди даа нандыр пирерінде ікінҷілебинчеткенібісті кӧзітчебіс (Лука 11:5—10). Пірееде Иегова піс сағыбаан оңдайнаң нандыр пирерге айабас. Кӧзідімге, Иеговадаң хайдағ-да сидікті чох идібізерге сурынзабыс, ол сидікті чох идер орнына аны тобырарға кӱс пирер. (Филипптегілерге 4:13 хығырыбызыңар.)

20. Ноға Иеговаа удаа пазырарға кирек?

²⁰ Иеговаа пазырарға оңдай пары уғаа ӧріністіг! Ікінҷілебеңер, Иегова пісті исче (Псалом 145:18). Иеговаа нинҷе удаа пазырчабыс, аннаң ынархазыбыс анҷох пик полып одырча.