1, 2. Кізілернің хайдағ сурығлар полчалар?

ПАЛАЛАР сурығлар турғызарға хынчалар. Кӧзідімге, сірер пірее нимедеңер чоохтап пиргезер, олар сурчалар: «Ноға?» Сірер чарыда чоохтап пирерге кӱстенгезер, че олар пазох сурчалар: «Ноға?»

² Ӧс парзабыс таа, пістің сурығларыбыс тоозылбинча. Сурығлар олаңай полчалар: ниме чирге? Хайдағ кип-азах кизерге? Ниме садып аларға? Ідӧк аарлығ арах сурығлар полчалар: чуртастаңар паза полар туста пісті ниме сағыпчатханнаңар. Пу аарлығ сурығларға киртінерге турыстығ нандырығлар таппинчатсабыс, удаа нандырығлар тілирін тохтат салчабыс.

3. Ноға кӧп кізі иң аарлығ сурығларға нандырығ таап полбас тіп сағынча?

³ Пісті сағыссыратчатхан аарлығ сурығларға Библия нандыр полар ба? Піреелері нандыр полар тіп сағынчалар, че Библияны піліп аларға уғаа сидік тіп санапчалар. Олар пу сурығларға абыстар ла алай ӧнетін ӱгренген кізілер ле нандырығлар пілчелер тіп сағынчалар. Пасхалары, тізең, нандырығлар пілбинчетселер дее, сурирға уйатчалар. Сірер чи хайди сағынчазар: Библия ол сурығларға нандыр полар ба?

4, 5. Хайдағ сурығларға сірер нандырығлар таап аларға хынчазар? Ноға ол сурығларға нандырығлар тілирге кирек?

⁴ Сірер постарыңнаң сурчазар, арса: «Ноға мин мындазым? Ӱреп парзам, миннең ниме полар? Худай кемдір ол?» Илбек ӱгретчі, Иисус Христос, чоохтаан:  «Сурыңар — сірерге Худай пирер, тілеңер — таап аларзар, тохладыңар — сірерге азыл парар» (Матфей 7:7). Сірерні киртіндірер нандырығлар тапханҷа, нандырығлар тілирін тохтатпаңар!

⁵ Тілирін тохтатпазар, андағ нандырығларны Библияда хайди даа таап аларзар (Притчи 2:1—5). Оларны піліп аларға аар нимес. Библиядаң алған пілістер чуртазыңарны часкалығ ит саларлар паза полар туста уғаа чахсы чуртасха ізеніс пирерлер. Ам кӧп кізіні сағыссыратчатхан сурығны ӱзӱрібізеелер.

6. Ноға піреелері Худай кізілерге хынминча тіп сағынчалар?

⁶ Кӧп кізі Худай кізілерге хынминча тіп санапча. Хынған полза, чир-чалбахта чуртас саңай пасха поларҷых тіп сағынчалар. Че піс чаалар, хазыр тудыныс паза чобағ кӧрчебіс. Кізілер ағырчалар, ирееленчелер паза ӱрепчелер. Аннаңар сурығ сыхча: «Худай піске хынчатса, ноға иреелерні тохтатпинча?»

7. а) Ноға кізілер Худайны чабал тіп санапчалар? б) Ноға Худай кізілерні иреелебинче тирге чарир?

⁷ Абыстарның ӱгредии кізілерні Худай чабал тіп сағынарға кӧӧктірче. Пірее чобағ пол парза, абыстар анзы Худайның кӧңнінҷе пол парған, Худай іди хынған тіп чоохтапчалар. Іди олар иреелер полчатхан ӱчӱн Худайны пыролапчалар. Че Библияда Худай пір дее чабал ниме итпинче тіп чоохталча. Иаковтың 1:13-те чоохталча: «Сынағларда пірдеезі „Худай мині хыҷаландырча“ тібезін. Худай чабалға сабыла чоғыл, аннаңар Позы даа пірдеезін хыҷаландыртпинча». Анзы, Худай чабал киректерні тохтатпинчатса даа, позы чабал ниме хаҷан даа итпинчеткенін кӧзітче.  (Иов 34:10—12 хығырыбызыңар.) Пір кӧзідім кӧр кӧреелер.

8, 9. Сидіктерібісте Худайны пыролирға ноға саба полар? Кӧзідім кӧзіт пиріңер.

⁸ Кӧзідімге, пір чиит оол іҷе-пабазынаң хада чуртапча. Пабазы ағаа тың хынча. Ол аны орта пӧгіннер аларға ӱгрет салған. Че пірсінде оолғы, пабазының чооғын истерге хынмин, ибінең парыбызарға пӧгін алча. Оолғы хомай киректер ит сыххан ӱчӱн сидіктерге кір парча. Ибдең парчатханда, пабазы аны тохтатпаан ӱчӱн, пабазын пыролирзар ба? Чох, пыролабассар! (Лука 15:11—13). Ідӧк Худай, кізілер аның чооғын испин, хомай киректер ит сыхханда, оларны тохтатпаан. Аннаңар, пірее хомай ниме пол парза, ундутпаңар: Худай анзында пыролығ нимес. Аның ӱчӱн аны пыролирға саба полар.

⁹ Худай чир ӱстӱнде чабал киректерні ам даа тохтатпинчатханына сылтағлар пар. Пу кинденің 11-ҷі пастаанда аннаңар Библияда ниме чоохталчатханын піліп аларзар. Ікінҷілебеңер: Худай піске хынча, пістің сидіктерібісте ол пыролығ нимес. Сынында оларны ол ла пӧк полар (Исаия 33:2).

10. Худай прай чабалны чох идібізерінде ноға ікінҷілебеске чарир?

¹⁰ Худай ах-арығ (Исаия 6:3). Прай аның киректері хаҷан даа арығ, чахсы, орта. Аннаңар ағаа киртінерге чарир. Че кізілер андағ ниместер. Пірееде олар уғаа хомай киректер итчелер. Иң чахсы устағҷы даа кізілер ит салған чабал киректерні чох ит полбас. Пір дее кізінің Худайның кӱзі осхас кӱс чоғыл. Ол ла кізілер иткен чабал киректернің салтарларын паза чабалны саңай чох идібізер. (Псалом 37:9—11 хығырыбызыңар.)

11. Худай иреелерібісті кӧрчетсе, аның чӱреенде ниме полча?

¹¹ Чир-чалбахта полчатхан киректерні паза сірернің сидіктеріңні кӧрчетсе, Худайның чӱреенде ниме полча? Библия Худай «сын тудынысха хынча» тіп ӱгретче (Псалом 37:28). Ол чахсаа хынча паза чабалны хырт кӧрче. Кізілер иреелензіннер тіп хынминча. Чир-чалбахха чабал киректер тол парғанда, Худайның «чӱрее тың ағырған» тіп Библияда чоохталча (Бытие 6:5, 6). Худай алыспаан (Малахия 3:6). Библияда ол пістеңер сағыссырапча тіп чоохталча. (1 Петрның 5:7 хығырыбызыңар.)

12, 13. а) Ноға піс хынып оңнапчабыс? Пасхалары ирееленчеткенін кӧрзебіс, чӱреебісте ниме полча? б) Худай прай чобағларны паза сыны чох тудынысты чох идібізерінде ноға ікінҷілебеске чарир?

¹² Ағаа хоза, Библияда піс Худайның омазына тӧӧй чайалғабыс тіп чоохталча (Бытие 1:26). Анзы Худай пісті позының хылығына тӧӧй хылыхтығ иде чайап салғанын таныхтапча. Пырозы чох кізілер ирееленчеткеннерін кӧрзебіс, чӱреебіс ағырча. Худайның чӱрее, тізең, уламох тың ағырча. Хайдаң піс аны пілчебіс?

¹³ Библияда «Худай — хыныс» тіп пазылча (1 Иоанның 4:8). Ол прай нимені хыныснаң итче. Худай хынча, аннаңар піс хынып оңнапчабыс. Сағын кӧріңер: чир-чалбахтағы чобағны паза сыны чох тудынысты чох идерге кӱзіңер пар полған полза, чох идібізерҷіксер бе? Йа, сірер кізілерге хынчазар нооза. Худай чи? Худай кізілерге хынча, ағаа хоза, аның прай чобағларны паза прай сыны чох тудынысты чох итчең кӱзі пар. Аннаңар ікінҷілебеңер, пу кинденің пасталчатханында  чоохталчатхан молҷағлар хайди даа толарлар! Че анзына киртініп алар ӱчӱн, Худайны чахсы арах піліп аларға кирек.

14. Худайның ады хайди паза ноға аны адынаң адирға кирек?

¹⁴ Пірее кізінең нанҷылазарға хынчатсар, нименең пастапчазар? Адыңарны адапчазар. Худайның чи ады пар ба? Кӧп религияларда аны «Худай» алай «Хан Худай» тіп адапчалар, че олар аның ады нимес. Ол сӧстер кемнің-де хайдағ-да орынын таныхтапчалар, «хан» алай «президент» тіп сӧстерге тӧӧй сӧстер. Худайның ады «Иегова», анзын ол позы чоохтаан. Ол ат Библияда муңар хати учурапча. Псалом 83:18-те чоохталча: «Кізілер сині, кемнің ады Иегова, прай чир ӱстӱнде син не Иң пӧзік Худай тіп пілзіннер». Иегова пісті аның адын пілзіннер ле нимес, че андар адынаң айланзыннар тіп хынча. Худай, сірерні аның нанҷызы полып алзыннар тіп, позының адын адаан.

15. «Иегова» тіп ат ниме таныхтапча?

¹⁵ «Иегова» тіп аттың смыслы уғаа улуғ. Аның ады Худай хайдағ даа молҷағларын паза турғысхан пӧгіннерін толдыр поларын таныхтапча.  Ағаа харығ пол полҷаң ниме чоғыл. Иегова ла андағ атха турыстығ *.

16, 17. а) «Прай нимедең кӱстіг Худай» тіп титул ниме таныхтапча? б) «Мӧгі тустың Ханы» тіп титул ниме таныхтапча? в) «Чайаачы» тіп титул ниме таныхтапча?

¹⁶ Азых чоох 15:3-те чоохталча: «Илбек паза хайхастығ Синің иткен киректерің, ӧӧркі Чайаачы, Прай  нимедең кӱстіг Худай! Син Ах-арығ кізілеріңнің Ханы! Синің чолларың орта паза сын, [«Мӧгі тустың Ханы», НТ]!». «Прай нимедең кӱстіг» тіп титул ниме таныхтапча? Тилекейде Иеговадаң кӱстіг пір дее ниме чоғын таныхтапча. «Мӧгі тустың Ханы», тізең, ниме таныхтапча? Ол хаҷан даа полғанын паза поларын таныхтапча. Псалом 90:2-де Худай «вектең векке» алай мӧгі тус чуртапча тіп чоохталча. Пу сағыс кізі чӱреен тибіретче!

¹⁷ Иегованы ла Чайаачы тіп адирға чарир. Азых чоох 4:11-де хығырчабыс: «Ӧӧркі Чайаачы, Пу тилекейде прай ниме Синнең паза Синің кӧңніңҷе чайалғаннаңар, Син сабланысха, аарласха паза ӱлгее турыстығзың». Тигірдегі ангеллерні, чылтыстарны паза планеталарны, ағастарны паза чахайахтарны, палыхтарны паза хустарны — прай пу нимелерні Иегова чайап салған.

18. Ноға піреелері Худайнаң нанҷылас полҷаң оңдай чоғыл тіп сағынчалар? Худайнаң нанҷылазарынаңар Библияда ниме чоохталча?

¹⁸ Худайның уғаа чахсы сариларын піліп алып, піреезі: «Худай уғаа кӱстіг, илбек паза андағ ырах. Мин ағаа кирексім ме?» — тир, арса. Олар Худайнаң нанҷылас поларынаңар сағынарға даа хорыхчалар. Че Худай кізілер ағаа нанҷы поларға хорыхсыннар тіп хынча ба? Чох. Иегова піске чағын поларға хынча. Библияда «ол пістің полғаныбыстаң на тың даа ырах нимес» тіп чоохталча (Илҷілернің 17:27). Худай сірерні позынзар чағдазыннар тіп хынча. Андада «сірерге Ол чағдирох» тіп пазылча (Иаковтың 4:8).

19. а) Хайди сірер Худайның нанҷызы пол поларзар? б) Худайның хылыхтарының хайзы сірернің кӧңніңерге иң тың кірче?

¹⁹ Хайди сірер Худайның нанҷызы пол поларзар? Иисус теен: «Мӧгі чуртас Сині — чалғыс сын Худайны — паза Син ысхан Иисус Мессий-Христос полчатханын пілчеткені полча» (Иоанн 17:3). Худайдаңар паза Иисус Христостаңар пілістер аларын тохтатпазар, мӧгі чуртирзар. Кӧзідімге, «Худай — хыныс» полчатханын піліп алғабыс (1 Иоанның 4:16). Ағаа хоза, аның пасха даа уғаа чахсы хылыхтары кӧп. Библияда чоохталча: «Иегова «нымзах, алғым чӱректіг, ӧкпеленерге маңзырабинчатхан, паарсаста паза сында илбек» (Исход 34:6). Ол «чахсы паза пыро тастирға тимде» (Псалом 86:5). Ол тыстаныстығ паза киртістіг (2 Петрның 3:9; Азых чоох 15:4, НТ). Библияны хығырып, сірер Худайның уғаа чахсы хылыхтарынаңар кӧп арах піліп аларзар.

20—22. а) Худай кізі харағына кӧрінминчетсе, хайди аның нанҷызы полып аларға? б) Сірерні Библияны ӱгренмеске чӧптепчетселер, ниме идерге?

²⁰ Худай кізі харағына кӧрінминчетсе, хайди аннаң  нанҷылазарға? (Иоанн 1:18; 4:24; 1 Тимофейге 1:17). Библияны хығырыңар, іди сірер Иегованаң чахсы танызып аларзар (Псалом 27:4; Римдегілерге 1:20). Нинҷе кӧп аны піліп одырзар, анҷох тың ағаа хынарзар, пола-пола аның нанҷызы полып аларзар.

²¹ Ноға Иегова пістің Пабабыс полчатханын піліп аларзар (Матфей 6:9). Ол піске чуртас пирген паза пістің чуртазыбыс часкалығ ползын тіп хынча. Полған на хынчатхан паба палалары часкалығ чуртазыннар тіп хынча (Псалом 36:9). Хайди кӧрдібіс, Библия ӱгретче: Худайның нанҷызы полып алҷаң оңдай пар (Иаковтың 2:23). Сағын на кӧріңер: Иегова, тилекейнің Чайаачызы, сірернең нанҷылазарға хынча!

²² Арса, піреелері сірерні Библияны ӱгренмеске чӧптирлер. Олар, арса, сірер пасха религиязар парыбызарзар тіп хорыхча поларлар. Че Иегованың нанҷызы полып аларға харығ поларға пірдеезіне чаратпаңар. Ағаа тӧӧй чахсы нанҷы паза таап полбассар нооза.

23, 24. а) Ноға сурығлар турғызарға чалтанмасха кирек? б) Полар пастағда ниме ӱзӱрербіс?

²³ Библияны ӱгренчетсер, пірее нимені піл полбин турарзар. Аны піліп алар ӱчӱн, сурығлар турғызарға алай полызығ сурынарға чалтанмаңар. Иисус піске, палалар осхас, пазымнығ поларға чоохтаан (Матфей 18:2—4). Палалар сурығлар турғызарға уйатпинчалар. Худай сірерні сурығларыңа нандырығлар тапсыннар тіп хынча. Аннаңар Библияны кӱстеніп істезіңер, іди Библиядағы пілістер сын полчатханын піліп аларзар. (Илҷілернің 17:11 хығырыбыс.)

²⁴ Библияны ӱгренгені — Иеговадаңар піліп одырарға иң чахсы оңдай. Библия пасха кинделердең нименең пасха мының соондағы пастағда чоохталар.