1—3. Кізілер ӧлімнеңер хайдағ сурығлар турғысчалар? Аймах-пасха религиялар ол сурығларға хайди нандырчалар?

БИБЛИЯДА «ӧлім... чох пол парар» тіп чоохталча (Азых чоох 21:4). 5-ҷі пастағдаң піс піліп алдыбыс: толығ тӧлелген ӱчӱн пістің мӧгі чуртирға оңдай пар. Че кізілер ам даа ӱрепчелер (Экклезиаст 9:5). Аның ӱчӱн сурығ сыхча: ӱреен соонда кізінең ниме полча?

² Чағын кізізін чідір салғаннар пу сурыға нандырығны піліп аларға тың хынчалар. Олар сағынчалар, арса: «Ол ам хайда? Ол мині кӧрче бе? Ол мағаа полыс полар ба? Піс анынаң тоғазарбыс па?»

³ Аймах-пасха религияларда пу сурығларға пасха-пасха нандырчалар. Піреелері чахсы кізі ӱреен соонда тигірзер парар тіп, хомай кізі, тізең, отта кӧйіп, ирееленер тіп ӱгретчелер. Пасхалары, тізең, ӱреен соонда кізі хут пол парып, ӱреп парған туғаннарынаң хада хайда-да чуртапча тіп ӱгретчелер. Кем-де, кізі ӱреп парза, аны пастап чарғылапчалар, анаң ол, пасха кізі, аң алай хус полып, тӧріпче тіпче.

4. Ӧлімнеңер религияларның кӧрістері нименең тӧӧйлер?

⁴ Религиялар ӧлімнеңер пасха-пасха ӱгретчетселер дее, олар прайлары ӧлген кізінің хайдағ-да чардығы чуртапча тіпчелер. Че анзы андағ ба?

5, 6. Кізі ӱреп парған соонда, анынаң ниме полча?

⁵ Кізі ӱреп парған соонда, анынаң ниме полчатханын  Иегова пілче. Иегова, кізі ӱреп парза, аның чуртазы тоозыл парча тіп чоохтаан. Ӱреен соонда кізінің чувстволары, сағыстары паза сағызында халған нимелері анынаң хада ӧл парчалар *. Ӧлген соонда кізі кӧрбинче, испинче паза сағынминча.

⁶ Соломон хан пасхан: «Ӧліглер пір дее ниме пілбинчелер». Ӱреен кізілер хын таа полбинчалар, хырт таа кӧр полбинчалар. Ӧлген соонда «тоғыс таа, сағын салған сағыс таа, піліс тее, хыйға сағыс таа чоғыл». (Экклезиаст 9:5, 6, 10 хығырыбызыңар.) Псалом 146:4-те кізі ӱреп парза, анынаң хада аның сағыстары даа тоозыл парчалар тіп пазылча.

7. Иисус Христос ӧлімнеңер ниме чоохтаан?

⁷ Иисустың чағын нанҷызы Лазарь ӱреп парғанда, ӱгренҷілеріне ол теен: «Лазарь арғызыбыс узубысты». Иисус іди теенде, ӱгренҷілер Лазарь тынанып узупча тіп сағынғаннар. Аннаңар ол кӧні чоохтаан: «Лазарь ӱреп парды» (Иоанн 11:11—14). Иисус ӧлімні уйғунаң тиңнестірген. Лазарь тигірзер парған алай ӱреен туғаннарынаң хада хайда-да чуртапча тібеен. Ідӧк Лазарь кӧйчеткен отта ирееленче алай пасха ниме полып тӧріп парған тібеен. Чох, Лазарь ӱреп парғанда, Иисус аны халын уйғудағы кізінең тиңнестірген. Библияның пасха даа стихтарында ӧлім уйғунаң тиңнестірілче. Кӧзідімге, Иисус Иаирнің хызын тірілдірібіскенде, ӧлімні уйғунаң тиңнестірген. Ол теен: «Ол ӱребеен, че узупча» (Лука 8:52, 53).

8. Иегова кізілерні ӱрезіннер тіп чайабаанын хайдаң пілчебіс?

 ⁸ Худай Адамнаң Еваны нинҷе-де тус пазынаң ӱреп парзыннар тіп чайаан ма? Чох! Иегова оларны мӧгі чуртир иде паза хаҷан даа ағырбас иде чайаан. Иегова кізілерні, мӧгі чуртирға хынар иде чайап салған (Экклезиаст 3:11). Іҷе-пабалар палалары киріп ӱрепчеткеннерін кӧрерге хынчалар ба? Чох, хынминчалар. Пістің Чайаачыбыс ідӧк пісті ӱрезіннер тіп хынминча. Андағда кізілер ноға ӱрепчелер?

9. Ноға Иегова Адамнаң Еваа чахығ пирген паза ол чахығны толдырарға сидік полған ма?

⁹ Адамнаң Еваны Эдем тіп садта чуртат салып, Иегова Адамға чахығ пирген: «Сағаа садта полған на ағастаң тосханҷа чирге чарир. Че чахсы-чабалны пілерге полысчатхан ағастаң чібе, чібіссең, олох кӱнде ӱреп парарзың» (Бытие 2:9, 16, 17). Пу чахығны пиргенде, Иегова кӧзіт пирген: аннаң пасха пірдеезіне ниме чахсы, ниме чабал полчатханын пӧгерге чарабас. Ол чахығны толдырарға сидік полбаан. Аның чооғын искен ползалар, олар Иегованың ӱлгӱзін улуғлапчатханнарын паза Худай оларға пирген нимелерні прай аарлапчатханнарын кӧзідерҷіктер.

10, 11. а) Адамнаң Еваа Сайтан хайдағ чой чоох чоохтаан? б) Ноға оларның пыроларына ахтаныс чоғыл?

¹⁰ Ачырғастығ, че Адамнаң Ева Иегованың чооғын испееннер. Сайтан Евадаң сурған: «Худай сірерге сынап садта прай ағастардаң чирге чаратпаан ма?». Ева ағаа нандырған: «Садтағы ағастарның чистектерін піске чирге чарир. Че садтың ортызындағы ағастың чистектерінеңер Худай теен: „Ӧл парбас ӱчӱн, аннаң чібеңер паза ағаа теңмеңер“» (Бытие 3:1—3).

¹¹ Сайтан чооғын узаратхан: «Чох, сірер ӧлбессер. Че Худай пілче: ол ағастаң чібіскен кӱндӧк харахтарың азыл парар паза сірер чахсы-чабалны, Худай чіли, пілерзер» (Бытие 3:4—6). Сайтан Еваны ниме чахсы, ниме чабал полчатханын позы пӧк полар тіп киртіндірерге хынған. Олох туста ол аны, Худайның чооғын испезең дее, ӧлбессің тіп алаахтырыбысхан. Ева, ол ағастың чистегін алып алып, чіп сыххан, соонаң иріне пирген, ол ідӧк чеен. Иегова ол ағастың чистегін чирге чарабас теенін Адамнаң Ева пілгеннер,  че піле-тура чібіскеннер. Іди оларға хынчатхан Пабаларын олар улуғлабааннар. Худай пирген пілдістіг, толдырарға сидік нимес чахығны ӧнетін толдырбин, Худайдаң тоғыр парғаннар. Оларның пыроларына ахтаныс чоғыл!

12. Адамнаң Ева чоох испеен ӱчӱн, Иегованың чӱреенде ниме полған полар?

¹² Уғаа ачырғастығ, че пістің ӧбекелерібіс, Адамнаң Ева, Чайаачыны улуғлабааннар. Сірер палаларыңны, кӧп кӱс салып, ӧскіріп алған ползар, олар, тізең, сірернің чооғыңарны испин, ӧнетін сірердең тоғыр пар сыххан ползалар, хайди поларҷыхсар? Чӱрееңер ағырарҷых па?

13. Иегованың Адамға тозын пол парарзың теені ниме таныхтапча?

¹³ Чоох испеен ӱчӱн Адамнаң Ева мӧгі чуртир оңдайларын чідір салғаннар. Иегова Адамға теен: «Син чир тозынызың, тозынох пол парарзың». (Бытие 3:19 хығырыбызыңар.) Анзы Адам, хаҷан даа чайалбаан чіли, чох пол парарын таныхтаан (Бытие 2:7). Адам чазых ит салған, аннаңар, ӱреп парып, чох пол парған.

14. Ноға кізілер ӱрепчелер?

¹⁴ Адамнаң Ева Худайның чооғын искен ползалар, ам даа чуртирҷыхтар. Че олар, чоох испин, чазых ит салып, ӱреп парғаннар. Чазых Адамнаң Евадаң, прай чоннарның ӧбекелерінең, ӱлӱске пирілген чабал  ағырыға тӧӧй. Прай кізілер чазыхтығ тӧріпчелер, аннаңар ӱрепчелер (Римдегілерге 5:12). Че Худайның сағын салған сағызы андағ полбаан. Ол, кізілер ӱрезіннер тіп, хаҷан даа хынмаан. Аннаңар Библияда ӧлім ыырҷы тіп адалчатханы хайхастығ нимес (1 Коринфтегілерге 15:26).

15. Ӧлімнеңер сынны пілгені ноға аарлығ?

¹⁵ Ӧлімнеңер сынны пілзебіс, ӱрееннердеңер хайдағ ӱгредіглер саба полчатханын оой піліп ал турарбыс. Библия ӱреен кізілернің ит-сӧӧктері дее ағырбинча, олар сағыссырабинчалар даа тіп ӱгретче. Піс оларнаң чоохтас полбаспыс, олар даа піснең чоохтас полбинчалар. Піс оларға полыс полбаспыс, олар даа піске полыс полбинчалар. Олар піске хомай ит полбастар, аннаңар олардаң хорығарға кирек чоғыл. Кӧп религиялар, тізең, саңай пасха нимее ӱгретчелер. Олар ӧлімнең чуртас тоозылбинча тіп ӱгретчелер, аннаңар ӧлген кізілерге, абыстарға алай хамнарға ахча тӧлеп, полыс пирерге чарир тіпчелер. Че ӧлімнеңер сынны пілзебіс, пісті пірдеезі алаахтыр полбас.

16. Аймах-пасха религиялар ӱрееннердеңер нимее ӱгретчелер?

¹⁶ Ӱреп парғаннар аннаң андар чуртапчалар тіп кізілерні киртіндірер ӱчӱн, Сайтан чой религияларнаң тузаланча. Кӧзідімге, пірее религияларда, кізі ӱреен соонда, аның худы алай сӱрні хайда-да аннаң андар чуртапча тіп ӱгретчелер. Сірернің религияңарда ӱрееннердеңер Библияда пазылған нимее ӱгретчелер алай пасха нимее ӱгретчелер? Ундутпаңар: Сайтан, кізілерні Иеговадаң хыйа тартып алар ӱчӱн, удаа чойланча.

17. Кізілер адта кӧйчеткеннеңер ӱгредіг ноға Иегованы хомзындырча?

¹⁷ Кӧп религиялар ӱрееннердеңер уғаа хорығыстығ  нимее ӱгретчелер. Кӧзідімге, хомай кізілер ӱреен соонда адтағы успас отта кӧйчелер тіп ӱгретчелер. Пу чой ӱгредіг Иегованы хомзындырча. Кізілерні ол хаҷан даа иреелебес! (1 Иоанның 4:8 хығырыбызыңар.) Палазының холын от ӱстӱнде тудып, аны хатығлапчатхан кізідеңер ниме сағынарҷыхсар? «Хайдағ чабал кізі! Андағ кізее чағын даа паспаспын», — тіп сағынарҷыхсар. Сайтан пісті Иеговадаңар іди сағынзыннар тіп паза Иегова кізілерні тохтабин иреелепчеткеніне киртінзіннер тіп хынча.

18. Ноға ӱрееннердең хорығарға кирек чоғыл?

¹⁸ Пасха религиялар, тізең, кізі ӱреен соонда хут пол парча тіп ӱгретчелер. Аннаңар ӱреен кізілерні тарындырбасха паза улуғлирға кирек, ол хуттар пісті арачылапчалар алай ыырҷыларыбыс пол парчалар тіпчелер. Ачырғастығ, пу чой ӱгредіге кӧп кізі киртінче. Олар ол хуттарға, Худайға чіли, пазырчалар. Ӧліг кізілер пір дее ниме пілбинчеткенін піліп алғабыс, аннаңар олар хомзынарлар тіп хорығарға кирек чоғыл. Сынында Иегова ла пазырысха турыстығ, ол сын Худай паза прай нименің Чайаачызы нооза (Азых чоох 4:11).

19. Ӧлімнеңер сынны ноға пілерге кирек?

¹⁹ Ӧлімнеңер сынны пілчетсебіс, религияларның чой ӱгредіглеріне киртінмеспіс. Паза полар тустағы чуртазыбыстаңар Иегованың молҷағларын тың аарлирбыс.

20. Мының соондағы пастағда нимедеңер піліп аларбыс?

²⁰ Худайның пурунғы нымысчызы Иов сурған: «Кізі ӱреп парза, хатап чуртап полар ба?» (Иов 14:14). Сыннаң даа, ӱреп парған кізілер хатап чуртирлар ба? Библияда аннаңар ниме пазыл парғаны сірерге хайхастығ даа пілдірер. Мының соондағы пастағда пу сурыға нандырығ піліп аларбыс.