Худай — хыныс. Худайның адынаң чоохтапчабыс паза тудынчабыс тіпчеткен религиялар уғаа кӧп чабал киректер итчелер. Ноға? Олар чой религиялар паза олар Худайдаңар саба ӱгретчелер. Хайди олар анзын итчелер? Худай анзына хайди хайча? Паза Худай оларны хайди идер?

1. Хайди чой религия позының ӱгредіглерінең Худайны уйатха сухча?

Чой религия «Худайның сынын чойға орназыбысхан» (Римдегілерге 1:25). Кӧзідімге, религияларның кӧбізі, постарының кізілерін, Худайның ады пар тіп ӱгретпинче. Че Библияда Худайның адын адааны уғаа аарлығ тіп чоохталча (Римдегілерге 10:13, 14). Пірее чобағ пол парза, абыстар удаа піди тіпчелер: «Анзы Худайның кӧңнінҷе пол парған». Че ол чой ӱгредіг. Худай чабал ниме хаҷан даа итпинче. (Иаковтың 1:13 хығырыбызыңар.) Ачырғастығ, религияның чойының ӱчӱн кӧп кізілер Худайға киртінмин сыхчалар.

2. Хайди чой религия Худайны позының тудынызынаң уйатха сухча?

Иегова кізілернең хайди тудынча, чой религия кізілернең іди тудынминча. Библияда чоохталча: «Аның чазыхтары тигірге теере ӱӱл парғаннар» (Азых чоох 18:5). Религиялар чӱзер чыллар политикаа ара кірчелер паза чааларға хабасчалар. Ідӧк чой религия санап таа полбас кӧп кізіні ӧдір салған алай оларның ӧлімінде пыролығ. Пірее религиознай устағҷылар пай чуртирға хынчатханнаңар, тигірибзер чӧрчеткен кізілерінең ахча хысчалар. Іди олар Худайны пір дее пілбинчеткеннерін кӧзітчелер, аннаңар Худайның адынаң чоохтирға паза тудынарға оларның праволары чоғыл. (1 Иоанның 4:8 хығырыбызыңар.)

3. Худай чой религияа хайди хайча?

Сірерні чой религияның тудынызы ӧкпелендірчетсе, Худайның чӱреенде чи ниме полча? Ол кізілерге уғаа тың хынча. Религиознай устағҷылар Худайдаңар чой ниме чоохтапчатсалар паза кізілернең хомай тудынчатсалар, ол тың ӧкпеленче. Худай молҷапча: чой религия хырыл парар паза хаҷан даа кӧдірілбес (Азых чоох 18:21). Ӱр ниместең Худай прай чой религияларны саңайға чох идібізер (Азых чоох 18:8).

 ТИРЕҢ АРАХ ХАС КӦРІҢЕР

4. Прай религиялар Худайның кӧңніне кірбинчелер

Кӧп кізі религиялар — ол пір чирзер, Худайзар, апарчатхан аймах-пасха чоллар тіп сағынча. Че анзы андағ ба? Матфей 7:13, 14 хығырып алып, ӱзӱрібізіңер:

• Библия хоостыра, хайдағ чол мӧгі чуртасха апарча?

ВИДЕО кӧріп алып, ӱзӱрібізіңер:

• Библия прай религиялар Худайның кӧңніне кірчелер тіп ӱгретче бе?

 6. Худай кізілерні чой религиядаң осхырып аларға хынча

Азых чоох 18:4 a хығырып алып, ӱзӱрібізіңер:

• Худай чой религияа алаахтырт салған кізілерге полыс пирерге хынчатханына хайди хайчазар?

7. Сын Худайдаңар пілістер аларын тохтатпаңар

Чой религияның киректерінің ӱчӱн Худайдаңар хомай сағынарға орта полар ба? Кӧзідім кӧр кӧреелер: оолғы пабазының хыйға чӧптерінҷе тудынмин, ибдең парыбысча паза сайбах чуртас апар сыхча. Оолғының андағ чуртазы пабазының кӧңніне кірбинче. Аның тудынызының ӱчӱн ноға пабазын пыролирға саба полар?

• Чой религияның киректерінің ӱчӱн Иегованы пыролирға орта полар ба? Ноға чой религияның киректері сірерге Худайдаңар піліс аларға харығ полбасха кирек?

 ӦӦН САҒЫС

Чой религия ӱгредіглерінең паза чабал киректерінең Худайны уйатха сухча. Худай чой религияны чох идібізер.

Сағысха хатап кир кӧреелер

• Чой религияның итчеткен киректерінеңер паза ӱгредіглерінеңер ниме сағынчазар?

• Иегова чой религияа хайди хайча?

• Иегова чой религияны хайди идер?