16-ҶЫ УРОК
Иисус чирде ниме иткен?
Кӧп кізінің сағызында Иисус Христос — час пала, хыйға ухаанҷы алай ӧлер алнында ирееленчеткен кізі. Че піс аннаңар паза ниме пілчебіс? Чирде чуртаанда, ол ниме иткен? Пу уроктаң Иисусха ниме иң аарлығ полғанын паза анзын пілгені сірерге хайди полызарын піліп аларзар.
1. Иисусха хайдағ тоғыс иң аарлығ полған?
Иисус пу сурыға позы піди нандырған: «Мин Худай хан-ӱлгӱзінеңер Чахсы Хабарны... искірерге кирекпін». (Лука 4:43 хығырыбызыңар.) Иисус Худай Хан-ӱлгӱзін турғыс саларынаңар чахсы хабар чоохтаан. Ол Хан-ӱлгӱ кізілернің прай сидіктерін чох идібізер a. Иисус ӱс чыл чарым ол тоғысты, кӱзіне дее, тузына даа айабин, иткен (Матфей 9:35).
2. Ноға Иисус хайхастар иткен?
Библияда Худай Иисус пастыра кӧп хайхастар паза танығлар иткен тіп пазылча (Илҷілернің 2:22). Худайның полызиинаң Иисус хазыр чилні амырадыбысхан, муңар кізілерні азыраан, ағырығ кізілерні чазылдырған паза ӱрееннерні тірілдірген (Матфей 8:23—27; 14:15—21; Марк 6:56; Лука 7:11—17). Иисусты чирзер Худай ысханын ол иткен хайхастар киречілееннер. Ағаа хоза, олар пістің прай сидіктерібісті чох идібізерге Иегованың кӱзі парын кӧзіткеннер.
3. Иисустың чуртазы пісті нимее ӱгретче?
Иисус сидік тее, оой даа тустарда Иегованың чооғын исчең. (Иоанн 8:29 хығырыбызыңар.) Иисус, тоғырланыстар даа, сӱрдіріглер дее полза, Пабазының чахығларын толдырҷаң. Іди ол, кізілерге аар даа полза, Худайның чооғын толдыр поларларын кӧзіт пирген. Андағ оңдайнаң, Иисус аның істерінҷе орта парарға кӧзідім артыс пирген (1 Петрның 2:21).
ТИРЕҢ АРАХ ХАС КӦРІҢЕР
Иисус чахсы хабарны искіргеннеңер паза хайхастар иткеннеңер кӧп арах піліп алыңар.
4. Иисус чахсы хабарны искірген
Иисус, чахсы хабарны кӧп арах кізі иссін тіп, тозыннығ чолларҷа чӱзер километр чӧр салған. Лука 8:1 хығырып алып, пу сурығларны ӱзӱрібізіңер:
-
Иисус позын истерге килген не кізілерге Худай сӧзін чоохтаҷаң ма?
-
Кізілернең чахсы хабарнаң ӱлезер ӱчӱн, Иисус нинҷе кӱс салған?
Мессий чахсы хабарны чоохтир тіп Худай азынада ухаанҷылаан. Исайя 61:1, 2 хығырып алып, пу сурығларны ӱзӱрібізіңер:
-
Хайди пу ухаанҷылас Иисуста тол парған?
-
Хайди сағынчазар, амғы туста кізілерге чахсы хабар кирек пе?
5. Иисус аарлығ сыннарға ӱгреткен
Иисус Хан-ӱлгӱдеңер чахсы хабар искірген паза чуртасха тузалығ принциптерге ӱгреткен. Иисустың Тағдағы ӱгредиинең нинҷе-де кӧзідім кӧр кӧреелер. Матфей 6:14, 34 паза 7:12 хығырып алып, пу сурығларны ӱзӱрібізіңер:
-
Иисустың пу сӧстерінде хайдағ аарлығ ӱгредіглер пар?
-
Хайди сағынчазар, пу чӧптер амғы туста тузалығлар ба?
6. Иисус хайхастар иткен
Иегова Иисусха хайхастар идерге кӱс пирген. Мына пір кӧзідім. Марк 5:25—34 хығырып алыңар алай ВИДЕО кӧріп алыңар. Анаң пу сурығларны ӱзӱрібізіңер:
-
Аар ағырығлығ ипчі нимеде ікінҷілебеен?
-
Пу киректе сірерні ниме хайхатча?
Иоанн 5:36 хығырып алып, ӱзӱрібізіңер:
-
Иисус иткен хайхастар ниме киречілепчелер?
Пілчезер бе?
Иисустаңар иң кӧп Библияның тӧрт киндезінде чоохталча. Олар Чахсы хабарлар тіп адалчалар. Оларны Матфей, Марк, Лука паза Иоанн пас салғаннар. Полған на киндеде Иисустың чуртазы пасха-пасха саринаң азылча. Прай кинделерні піріктірібіссе, Иисустың чуртазынаңар уғаа хынығ чоох пол парча.
-
МАТФЕЙ
позының Чахсы Хабарын прайзынаң пурун пас салған. Анда ол Иисус нимее ӱгреткеннеңер чоохтапча. Худайның Хан-ӱлгӱзінеңер Иисус ниме чоохтаанына ӧӧн хайығ салча.
-
МАРК
иң хысхаҷах Чахсы Хабар пас салған. Анда Иисустың чуртазында полған киректер уғаа кӧп.
-
ЛУКА
Иисустың пазырыстаңар сӧстеріне паза Иисус ипчілерге хайди хайғанына ӧӧн хайығ салча.
-
ИОАНН
Иисус хайдағ кізі полғанын кӧзітче паза Иисус нанҷыларынаң паза пасха даа кізілернең чоохтасханына хайығ салча.
КЕМ-ДЕ ПІДИ ТІПЧЕ: «Иисус олаңай ла, чахсы кізі полған».
-
Сірер чи аннаңар ниме сағынчазар?
ӦӦН САҒЫС
Иисус Худай Хан-ӱлгӱзінеңер чоохтаан паза хайхастар иткен. Ол, Иегованың чооғынҷа оой даа, сидік тее полза, тудынҷаң.
Сағысха хатап кир кӧреелер
-
Хайдағ тоғыс Иисусха иң аарлығ полған?
-
Иисус иткен хайхастар ниме киречілепчелер?
-
Иисус хайдағ принциптерге ӱгреткен?
ХОЗА ІСТЕЗІҢЕР
Иисус хайдағ темаа ӧӧн хайығ салған?
«Худайның Хан-ӱлгӱзі. Иисусха нимедір ол?» («Сторожевой башня», 1 чарыс айы, 2014 чыл)
Иисус иткен хайхастар сынап полғанына киречілестер кӧр кӧріңер.
«Иисустың хайхастары. Олар нимедеңер чоохтапчалар?» («Сторожевой башня», 15 от айы, 2004 чыл)
Иисустың кізілерге хынызынаңар піліп алған соонда, пір ир кізі чуртазын хайди алыстырыбысханнаңар хығырып алыңар.
«Мин, позымнаңар ла сағынып, чуртаам» («Сторожевой башня», 1 чарыс айы, 2014 чыл)
Пу таблицада Иисустың чуртазы хронология хоостыра пазылча.
a Худайның Хан-ӱлгӱзінеңер 31—33 уроктарда кӧп арах чоохталча.
Сірерге хынығ полар, арса
УДАА ТУРҒЫЗЫЛЧАТХАН СУРЫҒЛАР
Иегованың киречілері иртірчеткен библейскай курс нимедір ол?
Иегованың киречілерінің Библия нимее ӱгретчеткенін піліп аларға полысчатхан курс пар. Ӱгренчетсер, постарыңның Библияңарнаң тузаланарға паза ӱгредіге сӧбіреңерні паза нанҷыларыңны хығырарға чарир.
