17-ҶІ УРОК
Иисус Христос. Хайдағ ол?
Иисустың кӧзідімі прайзын хайхатча. Иисус иткен киректердеңер паза аның ӱгредіглерінеңер піліп алзаң, ағаа паза аның Пабазына, Иеговаа, чағын арах поларың килер. Иисустың хайдағ аарлығ качестволар пар? Хайди ағаа тӧӧй полып аларға?
1. Иисус Пабазына нименең тӧӧй?
Иисустың тигірде нинҷе-нинҷе миллиард чыллар Пабазынаң ӱгренерге паза хайди ол хынызын кӧзітчеткенін кӧрерге оңдай полған. Аннаңар ол, Пабазыох чіли, сағынча, чувствовать полча паза тудынча. (Иоанн 5:19 хығырыбызыңар.) Ол Пабазына уғаа тӧӧй, аннаңар піди чоохтаан: «Мині кӧрген кізі, Пабамны даа кӧрген полча» (Иоанн 14:9). Иисустаңар нинҷе кӧп піліп одырарзар, Иегованы анҷох чахсы піліп аларзар. Кӧзідімге, Иисустың кізілерге хайди хынғанынаңар хығырып, Иегова кізілерге хайди тың хынчатханын піліп аларзар.
2. Иисустың Иеговаа хынчатханы нимедең кӧрінче?
Иисус теен: «Пабама хынчатханымны паза Аның чахаан нимелерін итчеткенімні чир-чалбах пілзін» (Иоанн 14:31). Иисус хаҷан даа, сидіктерде дее, Пабазының чооғын исчең. Анзында аның Пабазына улуғ хынызы кӧрінген. Иисус кізілерге Пабазынаңар чоохтирға хынҷаң. Ідӧк, хайди Худайның нанҷызы полып аларға чарыда чоохтаҷаң (Иоанн 14:23).
3. Иисустың кізілерге хынчатханы нимедең кӧрінче?
Библияда Иисус кізілерге уғаа тың хынча тіп чоохталча (Притчи 8:31). Иисус, кізілерге полызар ӱчӱн, прай кӱс салған, кізілерге, тізең, аның хыринда истіг полған. Худай ағаа кӱс пирген не ӱчӱн нимес, че ол, кізілерге полыс пирерге тың хынғаннаңар, хайхастар иткен (Марк 1:40—42). Иисус кізілерге паарсаснаң паза сырай таллабин хайҷаң. Аны исчеткен, азых чӱректіг кізілерні Иисустың сӧстері часхарҷаң паза оларға ізеніс пирҷең. Ол кізілерге уғаа тың хынҷаң, оларның ӱчӱн ирееленерге дее, ӧлімге дее парарға тимде полған. Аның ӱгредіглерінің хоостыра чуртапчатханнар, тізең, ағаа иң аарлығлар. (Иоанн 15:13, 14 хығырыбызыңар.)
ТИРЕҢ АРАХ ХАС КӦРІҢЕР
Иисустың качестволарынаңар кӧп арах піліп алыңар. Сағынып алыңар, хайди сірер хыныстығ паза сыйҷы пол поларзар.
4. Иисус Пабазына хынча
Худайға хынызыбысты хайди кӧзідерге Иисус чахсы кӧзіт пирген. Лука 6:12 паза Иоанн 15:10; 17:26 хығырып алыңар. Полған на стих хығырған соонда, пу сурығны ӱзӱрібізіңер:
-
Иеговаа хынызыбысты, Иисус чіли, хайди кӧзіт поларбыс?
Иисус тигірдегі Пабазына хынған, аннаңар ол пазырыста Пабазынаң удаа чоохтасхан
5. Иисус кізілерге хынча
Иисус кізілернің кирексіністерін позының кирексіністерінең пӧзік турғысхан. Маң чох полза даа, тың майых парза даа, ол кізілерге полысчаң. Марк 6:30—44 хығырып алып, пу сурығларны ӱзӱрібізіңер:
-
Иисустың кізілердеңер сағыссырааны хайди кӧрінген? (31, 34, 41 паза 42 стихтарны кӧріңер.)
-
Ноға Иисус кізілерге полысхан? (34 стихты кӧріңер.)
-
Иисус Пабазына уғаа тӧӧй полғанын санға алзабыс, пу киректең Иеговадаңар ниме піліп алчабыс?
-
Хайди піс, Иисус чіли, кізілерге полыс поларбыс?
6. Иисус сыйҷы кізі полған
Иисустың ниме-ноолары асхынах полза даа, ол уғаа сыйҷы полған. Ол пісті ідӧк сыйҷы поларға ӱгретче. Илҷілернің 20:35 хығырып алып, ӱзӱрібізіңер:
-
Иисустың сӧстерінің хоостыра, часкалығ полар ӱчӱн, ниме идерге кирек?
ВИДЕО кӧріп алып, ӱзӱрібізіңер:
-
Хайди, пай полбазабыс таа, сыйҷы пол поларбыс?
Пілчезер бе?
Библия пісті Иеговаа Иисустаң пастыра пазырарға ӱгретче. (Иоанн 16:23, 24 хығырыбызыңар.) Піс Иисус чох хаҷан даа Иегованың нанҷызы пол полбаспыс. Иисустаң пастыра пазырчатсабыс, анзын пілінчеткенібісті кӧзітчебіс.
КЕМ-ДЕ ПІДИ ТІПЧЕ: «Худайның кізілерге кирегі халбинча».
-
Иисус Пабазына уғаа тӧӧй, аннаңар ол иткен киректер Иегова піске тың хынчатханын хайди кӧзітчелер?
ӦӦН САҒЫС
Иисус Иеговаа паза кізілерге хынча. Иисус позының Пабазына уғаа тӧӧй, аннаңар Иисустаңар нинҷе кӧп піліп одырарбыс, анҷох кӧп Иеговадаңар піліп аларбыс.
Сағысха хатап кир кӧреелер
-
Хайди піс Иеговаа хынызыбысты, Иисусох чіли, кӧзіт поларбыс?
-
Хайди кізілерге, Иисусох чіли, хынарға?
-
Иисустың хайдағ хылығы сірернің кӧңніңерге иң тың кірче?
ХОЗА ІСТЕЗІҢЕР
Иисустаң нимее ӱгрен поларбыс?
«Иисусха кӧӧгіп...» («Иисус — чол, сын паза чуртас», 317 с.)
Піліп алыңар: ноға Иисустаң пастыра пазырарға кирек?
«Ноға, Иисустың адын адап, пазырарға кирек?» («Сторожевой башня», 1 азығ айы, 2008 чыл)
Иисустың тастындағы кӧрімінеңер Библияда пірее ниме чоохталча ба?
Иисустың ипчілерге хайди хайғаны пісті нимее ӱгретче?
«Худай ипчілерні улуғлапча паза аарлапча» («Сторожевой башня», 1 ӱртӱн айы, 2012 чыл)
Сірерге хынығ полар, арса
УДАА ТУРҒЫЗЫЛЧАТХАН СУРЫҒЛАР
Иегованың киречілері иртірчеткен библейскай курс нимедір ол?
Иегованың киречілерінің Библия нимее ӱгретчеткенін піліп аларға полысчатхан курс пар. Ӱгренчетсер, постарыңның Библияңарнаң тузаланарға паза ӱгредіге сӧбіреңерні паза нанҷыларыңны хығырарға чарир.
