Сірер хаҷан-да чағын кізіні чідіргезер бе? Чідірген ползар, арса, мындағ сурығлар турғысхазар: «Ӱреен кізінең ниме полча? Хаҷан полза, піс ағаа тоғазарбыс па?» Пу паза мының соондағы уроктарда Библиядаң часхарыстығ нандырығлар піліп аларзар.

1. Ӱреен соонда кізінең ниме полча?

Иисус ӱреен кізіні узупчатхан кізінең тиңнестірче. Ноға? Узупчатхан кізі ниме ибіре полчатханын пілбинче. Ӱреен кізі ідӧк пір дее ниме пілбинче паза аның пір дее нимезі ағырбинча. Чуртаста туғаннарына паза нанҷыларына хайди даа тың хынған полза, ол ӱреен соонда оларға сағынминча. Библияда чоохталча: «Ӧліглер, тізең, пір дее ниме пілбинчелер». (Экклезиаст 9:5 хығырыбызыңар.)

2. Ӱреен кізілердеңер сынны пілгені піске хайди полысча?

Кӧп кізі ӧлімнең паза ӧліг кізілердең хорыхча! Че Библияда ӧліг кізілердеңер ниме пазылчатханы олардаң хорыхпасха полызар. Иисус сынны пілгені кізіні пос чуртастығ итче тіп чоохтаан (Иоанн 8:32). Религияларның кӧбізі кізі ӱреен соонда аның худы чӧрче тіп ӱгретчелер, че Библия анзына ӱгретпинче. Аннаңар ӱреен кізілер ирееленчелер тіп сағыссырирға паза олар піске хомай идерлер тіп хорығарға кирек чоғыл. Ідӧк оларға пазырарға, олардаңар пазырарға паза оларға тайығ саларға кирек чоғыл.

Пірее кізілер ӱреен кізілернең чоохтасчабыс тіп сағынчалар. Че хайди піліп алдыбыс, ӱреен кізі пір дее ниме пілбинче, аннаңар оларнаң чоохтасчаң оңдай чоғыл. Ӱреен кізінең чоохтасчабыс тіп сағынчатхан кізілер сынында айналарнаң чоохтасчалар. Ӱреен кізідеңер сынны пілгені пісті айналардаң арачылапча. Айналарнаң палғалысханы уғаа хорғыстығ, аннаңар Иегова ӱреен кізілернең чоохтазарға кӱстенмеске чоохтапча. (Второзаконие 18:10—12 хығырыбызыңар.)

3. Ӱреен соонда кізінең сынында ниме полчатханын піліп алыңар

Ӱреен соонда кізінең ниме полчатханнаңар аймах-пасха чоннарда пасха-пасха киртіністер пар. Че оларны прайларын орта киртіністер тіп полбассың.

• Сірернің ибіркі кізілер нимее киртінчелер?

 4. Ӱреен кізілердеңер сынны пілгені нименең туза?

Ӱреен соонда кізінең ниме полчатханын пілгені ӧліг кізілердең хорыхпасха полысча. Экклезиаст 9:10 хығырып алып, ӱзӱрібізіңер:

• Ӧліг кізілер піске хомай ит поларлар ба?

Библияның сыны пісті религияның чой ӱгредіглерінең арачылапча. Библиядаң піс піліп алчабыс: ӧліг кізілерні сыйыхтирға, оларға тайығ саларға кирек чоғыл паза оларға пазырарға чарабас. Исайя 8:19 паза Азых чоох 4:11 хығырып алып, ӱзӱрібізіңер:

• Хайди сағынчазар, Иегова ӧліг кізілерге пазырчатханнарға паза олардаң полызығ сурынчатханнарға хайди кӧрче?

5. Ӱреен кізілердеңер сынны пілгені пісті часхарча

Кӧп кізілерні иткен чазыхтарының ӱчӱн ӱреен соонда ирееленерлер тіп ӱгреткеннер. Кізі, чуртаста уғаа хомай тудынза даа, ӱреен соонда, ол киректернің ӱчӱн ирееленминчеткенін пілгені хайдағ часхарыстығ! Римдегілерге 6:7 хығырып алып, ӱзӱрібізіңер:

• Библияда ӧлім чазыхтаң позытча тіп пазылчатса, чуртаста иткен алҷаастарының ӱчӱн ӱреен соонда кем-де ирееленче бе?

Иегова кізіні ӱреен соонда иреелирге хаҷан даа чаратпасчых. Иеговадаңар нинҷе кӧп піліп одырзар, анҷох кӧп анзына киртінерзер. Второзаконие 32:4 паза 1 Иоанның 4:8 хығырып алып, пу сурығларны ӱзӱрібізіңер:

• Андағ чахсы хылыхтығ Худай кізіні ӱреен соонда иреелирге чарадар ба?

• Ӧлген кізідеңер сынны пілгені часхарча тіп санапчазар ба? Ноға?

 ӦӦН САҒЫС

Кізі ӱреп парза, аның чуртазы тоозыл парча. Ӱреен кізі ирееленминче паза тіріг кізее хомай ит полбинча.

Сағысха хатап кир кӧреелер

• Ӱреен соонда кізінең ниме полча?

• Ӱрееннердеңер сынны пілгені ноға туза?

• Ӱрееннердеңер сынны пілгені хайди часхарча?