Давид хан теен: «Харындастар хада пір чӧптіг чуртапчатсалар, хайди чахсы паза хайди истіг!» (Псалом 133:1). Пістің харындас-пиҷелернің аразында андағох чувстволар полчалар. Ӧмеде пір чӧптіг чуртир ӱчӱн, піс прайларыбыс кӱс салчабыс.

1. Худайның чоны пасха чоннарға нименең тӧӧй нимес?

Сірер пасха хазнадағы ӧме чыылиинзар килзер, ол хазнаның тілін пілбезер дее, сірерге анда, ибдегі чіли, истіг пілдірер. Ноға? Піс Библияны прай чирде пір программаҷа ӱгренчебіс паза удур-тӧдір хынызарға кӱстенчебіс. Хайда даа чуртапчатсабыс, піс пір Худайға, Иеговаа, пазырчабыс паза, пір кізі чіли, ағаа нымысчыланчабыс (Софония 3:9, сноска).

2. Ӧмеде ынағ паза пір чӧптіг полар ӱчӱн, ниме ит поларзар?

Библия пісті кӧӧктірче: «Удур-тӧдір ізіг хыныснаң прай чӱрееңернең хынызыңар» (1 Петрның 1:22, НТ). Хайди анзын идерге? Кізілернің читпес сариларына хайығ салбин, оларның чахсы сариларын сизінерге кӱстеніңер. Сірерге чоохтазарға хынығ харындас-пиҷелернең не нимес, че аймах-пасха харындас-пиҷелернең нанҷылазарға кӱстеніңер. Кізідеңер азынада хомай сағынчатсабыс, хылығыбыстың ол сарин тастир ӱчӱн, кӱс саларға кирек. (1 Петрның 2:17 хығырыбызыңар.) a

3. Ӧмеде кемнең-де киліс полбинчатсар, ниме идерге кирек?

Піс пір ынағ сӧбіре полчабыс, че андағ даа полза, піс чазыхтығбыс. Пірееде піс удур-тӧдір кӧңнілерібісті тӱзір салчабыс паза хомзындыр салчабыс. Аннаңар Библияда піди чоохталча: «Удур-тӧдір... пыроларыңны прай чӱрекнең тастазыңар. Хайди Иегова сірернің пыроңарны прай чӱрекнең тастаан, сірер дее ідӧк тастаңар». (Колосстағыларға 3:13, НТ хығырыбызыңар.) Піс Иегованы удаа ачырғандырчабыс, че ол пістің пыроларыбысты сыбыра тастапча. Ол пістең, харындас-пиҷелерібістің пыроларын тастазыннар тіп, сағыпча. Кемні-де хомзындыр салғаныңарны сизін салзар, сірернең чаразарға килерін сахтабин, постарың пастағы алтым идіңер. (Матфей 5:23, 24 хығырыбызыңар.) b

 ТИРЕҢ АРАХ ХАС КӦРІҢЕР

4. Кізілердеңер хомай сағынмаңар

Піс харындас-пиҷелерге хынарға кӱстенчебіс. Че піске тӧӧй нимес кізіні позыбысха чағын идерге сидік. Андағ полза, піске ниме полызар? Илҷілернің 10:34, 35 хығырып алып, ӱзӱрібізіңер:

• Иегова позының сӧбірезіне удур-тӧдір тӧӧй нимес, аймах-пасха кізілерні кирче. Аннаңар, сірерге тӧӧй нимес кізілерге хайди хайарға кирек?

• Сірер чуртапчатхан орында хайдағ кізілердеңер азынада хомай сағынчалар? Ноға андағ кӧрістердең хыйа тудынарға хынчазар?

2 Коринфтегілерге 6:11—13 хығырып алып, ӱзӱрібізіңер:

• Сірерге тӧӧй нимес харындас-пиҷелерге хынарға ниме полыс пирер?

5. Прай чӱрекнең пыро тастаңар паза ынағ чуртаңар

Иегова пістің алныбыста хаҷан даа пыролығ полбас, че пістің пыроларыбысты тастирға хаҷан даа тимде. Псалом 86:5 хығырып алып, ӱзӱрібізіңер:

• Иегованың пыро тастапчатханынаңар пу стихтаң ниме піліп алчабыс?

• Иегованың пыро тастапчатханын аарлыға санапчазар ба? Ноға?

• Хаҷан кізілернең ынағ поларға аар полча?

Ӧмеде пір чӧптіг поларында Иеговаа хайди кӧӧк поларбыс? Притчи 19:11 хығырып алып, ӱзӱрібізіңер:

• Сірерні кем-де хыпчыхтандырчатса алай хомзындырчатса, аннаң ынағ халар ӱчӱн, ниме идерге чарир?

 Піс кемні-де хомзындыр салзабыс, ниме идерге? ВИДЕО кӧріп алып, ӱзӱрібізіңер:

• Пиҷенең ынағ полар ӱчӱн, пу пиҷе ниме иткен?

 ӦӦН САҒЫС

Пасхаларының пыроларын тастазар паза прай харындас-пиҷелерге хынзар, ӧмедегі ынағ чуртасха хабазарзар.

Сағысха хатап кир кӧреелер

• Хайди піске кізідеңер азынада хомай сағынмасха?

• Сірер харындаснаң алай пиҷенең піліс полбазар, ниме идерзер?

• Ноға сірер, Иегова чіли, пасхаларының пыроларын тастирға хынчазар?