Чайаачыбыс пістең хай-хай хыйға. Ол, хынчатхан Паба чіли, пістеңер сағыссырапча паза піс аның на устаанының хоостыра чуртир иде чайалғабыс (Иеремия 10:23). Хайди кічіг палаа іҷе-пабазының устааны кирек, піске ідӧк Чайаачыбыстың хыйға чӧптері кирек (Исаия 48:17, 18). Худай піске Библиядағы принциптерні сыйлаан. Олар чуртазыбысха устағ полчалар. (2 Тимофейге 3:16 хығырыбызыңар.)

Иегованың чахығлары паза принциптері амох чахсы чуртас апарарға полысчалар. Оларның хоостыра чуртазабыс, мӧгі чуртас чуртирбыс. Худай пісті чайаан паза пістеңер прай ниме пілче, аннаңар аның чӧптерін истерге паза оларның ӱчӱн Худайны алғыстирға хыйға полар. (Псалом 19:7, 11; Азых чоох 4:11 хығырыбызыңар.)

Библияда чахығлар паза принциптер пар. Чахығлар — кӧні пирілген устағлар (Второзаконие 22:8). Принциптер — Библиядағы сыннарның ӧӧні, олар алыспинчалар. Хайдағ туста хайдағ принципнең тузаланарын чахсы сағынып аларға кирек (Притчи 2:10—12). Кӧзідімге, Библия чуртас Худайның сыйии тіп ӱгретче. Пу ӧӧн принцип тоғыста даа, ибде дее, тынанчатсабыс таа, чуртазыбысты паза хазиибысты хайраллапчатхан правилоларҷа тудынарға кӧӧктірер. (Илҷілернің 17:28 хығырыбызыңар.)

Иисус ікі ӧӧн принциптеңер чоохтаан. Пастағы принцип кізее чуртас нимее пирілгенінең палғалыстығ: Худайны пілерге,  ағаа хынарға паза ағаа киртістіг нымысчыланарға. Чуртаста хайдағ даа пӧгін алзабыс, ол пастағы принципнең устанарға кирекпіс (Притчи 3:6). Іди тудынчатханнар Худайның нанҷылары пол поларлар, мӧгі чуртас чуртирлар паза сынап часкалығ поларлар. (Матфей 22:36—38 хығырыбызыңар.)

Ікінҷі принцип кізілернең ынағ чуртирға полыс пирер (1 Коринфтегілерге 13:4—7). Пу принципнең тузаланар ӱчӱн, Худай хайди кізілерге кӧрче, піске кізілерге ідӧк кӧрерге кирек. (Матфей 7:12; 22:39, 40 хығырыбызыңар.)

Библиядағы принциптер сӧбірені хыныс пастыра пик итчелер (Колосстағыларға 3:12—14). Худайның Сӧзінде сӧбірені тыытчатхан паза пір аарлығ принцип пар: хоных хон салғаннар чуртас тооза хада чуртирға киректер. (Марк 10:7—9 хығырыбызыңар.)

Библия хоостыра чуртазабыс, материальнай паза эмоциональнай саринаң позыбысты арачылап поларбыс. Кӧзідімге, алаахтырбинчатханнарны паза тоғынарға кӱлӱктерні тоғысха чахсы алчалар (Притчи 10:4, 26; Еврейлерге 13:18). Худайның Сӧзі чуртасха сынап кирек нимелерге чӧпсінерге паза Худайнаң нанҷыласханын ниме-ноолардаң артыхха санирға ӱгретче. (Матфей 6:24, 25, 33; 1 Тимофейге 6:8—10 хығырыбызыңар.)

Библиядағы принциптерҷе чуртааны хазыхты хайраллапча (Притчи 14:30; 22:24, 25). Кӧзідімге, Худайның Сӧзінде араға иртіре іскені хомай нимее саналча. Ол киректе Худайның чооғын иссебіс, ӧлімге ағылчатхан ағырығлар чухтырбаспыс паза автокатастрофа осхас саайларға изірікке кір парбаспыс (Притчи 23:20). Иегова араға ізерге чаратча, че кӧп іспеске чоохтапча (Псалом 104:15; 1 Коринфтегілерге 6:10). Худайның принциптері тудынызыбысты паза сағыстарыбысты сыныхтирға ӱгретчелер (Псалом 119:97—100). Сын христианнар Худайның нормаларынҷа чуртастарын чахсыландырар ла ӱчӱн чуртабинчалар, че Иегованы сабландырар ӱчӱн чуртапчалар. (Матфей 5:14—16 хығырыбызыңар.)