Библияда кізілер чирде мӧгі чуртас чуртирынаңар чахсы хабар пазыл парған (Псалом 37:29). Библияда 66 кічиҷек кинде. Аны Худайға киртістіг 40-ча ирен пасхан. Пастағы пис киндені 3 500-че чыл мының алнында Моисей пасхан. Халғанҷы киндені 1 900 азыра чыл мының алнында Иоанн илҷі пас салған. Библияда кемнің сағыстары пазыл парған? Худай хабарларны ухаанҷыларына ызых хут пастыра читірҷең (2 Самуила 23:2). Олар постарының нимес, че Худайның сағыстарын пасханнар, аннаңар Библияның Авторы — Иегова. (2 Тимофейге 3:16; 2 Петрның 1:20, 21 хығырыбызыңар.)

«Библияның авторы кем?» тіп видеороликті кӧріп алыңар.

Библия — Худай пирген кинде. Анда полар тустаңар ухаанҷыластар, прай оох-теек киректерні дее иртірбин, хап-орта пазыл парғаннар. Пір дее кізі іди ухаанҷылап полбас (Иисус Навин 23:14). Прай нимедең кӱстіг Худай ла алнында ниме поларын азынада чоохтап полча. (Исаия 42:9; 46:10 хығырыбызыңар.)

Худайның киндезі пасха кинделерге тӧӧй нимес, че анзы хайхастығ нимес. Амғы тусха читіре чӱзер тіллернең нинҷе-де миллиард Библия сығарылған. Библия уғаа иргі кинде полза даа, ол наукаа прай саринаң килісче. Хайхастығ, че 40 кізі пір дее удур-тӧдір киліспес сағыс паспаан *. Прай Библияда чоохталчатхан нимелерде Худайның хынызы кӧрінче. Ол кинденің кізілернің чуртастарын чахсы саринзар алыстырҷаң кӱзі ам даа пар. Прай пу сағыстарны санға алып, миллионнар Библия Худайның Сӧзі полчатханына киртін сыхханнар. (1 Фессалониктегілерге 2:13 хығырыбызыңар.)

«Библия сын полчатханнаңар хайдаң пілчебіс?» тіп видеороликті кӧріп алыңар.

Худай кізілерге хынчатхан ӱчӱн чахсы чуртас тимнеп салғаннаңар чахсы хабар Библияда ӧӧн орында турча. Библияда хайди пастағы кізілер чирдегі райда чуртир оңдайны чідір салғаннаңар паза хайди рай хатап турғызыларынаңар чоохталча. (Азых чоох 21:4, 5 хығырыбызыңар.)

Библияда ідӧк чахығлар, принциптер паза чӧптер пар. Ағаа хоза, анда Худайның качестволарын кӧзітчеткен полған киректер пазыл парғаннар. Андағ оңдайнаң Библия пістің Чайаачыбыснаң танызып аларға полысча. Ідӧк анда хайди Худайның нанҷызы полып аларға чарыда чоохталча. (Псалом 19:7, 11; Иаковтың 2:23; 4:8 хығырыбызыңар.)

Пу брошюра Библияны піліп аларға полыс пирер. Иисус Христос нымысчыланыста Ызых Пічіктің аймах-пасха стихтарын цитировать полып, оларны чарыда чоохтаҷаң, пу брошюрада Библияның стихтары ідӧк ӱзӱрілчелер. (Лука 24:27, 45 хығырыбызыңар.)

Худайның чахсы хабарынаң артых ниме чоғыл! Че андағ даа полза, ол піреелерінің чӱректеріне теңминче, кемні-де ол хабар хыпчыхтандырча, че анзы сірерге харығ полбазын. Худайдаңар пілістер алзар, мӧгі чуртасха ізеніс полар. (Иоанн 17:3 хығырыбызыңар.)