Авраамның тӧлінең Худай чон тӧстеп алып, ағаа чахығлар пирген. Ол чонны Худай «Израиль» тіп адап салып, сын пазырысты паза позының сӧзін хайраллирға чахаан (Псалом 147:19, 20). Іди прай чоннарның кізілеріне Худайзар килерге оңдай азылған. (Илҷілернің 3:25 хығырыбызыңар.)

Худай Израиль чонын позының киречілері поларға таллап алған. Пурунғы Израиль чонының чуртазы Худайның чахығларынҷа чуртааны нинҷе хыйға полчатханын чахсы кӧзітче (Второзаконие 4:6). Израиль чонынзар кӧріп, пасха чоннарның кізілеріне сын Худайға киртінерге ідӧк оңдай полған. (Исаия 43:10, 12 хығырыбызыңар.)

Пола-пола Израиль чонының тудыныстары Худайның кӧңніне кірбинібіскен. Аннаңар Иегова ол чоннаң хыйа айланыбызып, христианнарның ӧмезін тӧстеен (Матфей 21:43; 23:37, 38). Мының алнында Израиль чоны Иегованың киречілері полғаннар, ам, тізең, сын христианнар аның киречілері пол парғаннар. (Илҷілернің 15:14, 17 хығырыбызыңар.)

Иисус позының ӱгренҷілеріне прай чоннарда чахсы хабарны искірерге паза ӱгренҷілер тимнирге чахаан (Матфей 10:7, 11; 24:14; 28:19, 20). Пӱӱнгі кӱннерде, пу чир-чалбах хырылар алнында, искіріг тоғызы прай чир ӱстӱнде хайнапча. Пастағызын на Иегова прай чоннарның кізілерінең миллионнарны сын пазырыста піріктіріп алған (Азых чоох 7:9, 10). Иегова сын христианнарны удур-тӧдір полызыссыннар паза тыыдыссыннар тіп пір организацияа чыып алған. Олар прай чир ӱстӱнде Библияны пір программа хоостыра ӱгренчелер. (Еврейлерге 10:24, 25 хығырыбызыңар.)

1870 чылларда Библияның істезігҷілерінің кічиҷек группазы чіт парған сыннарны чыып сыххан. Иисус христианнарның ӧмезін Хан-ӱлгӱдеңер хабарны искірер ӱчӱн тӧстеенін олар пілгеннер. Аннаңар олар прай чир ӱстӱнде искіріг тоғызын апар сыхханнар. 1931 чылда олар постарына Иегованың киречілері тіп адан сыхханнар. (Илҷілернің 1:8; 2:1, 4, 11; 5:42 хығырыбызыңар.)

Пастағы чӱс чылларда пасха-пасха хазналардағы христианнарның ӧмелері Устапчатхан чӧптің устаанынҷа тудынҷаңнар. Устапчатхан чӧп Иисусты ӧменің пазы тіп санаҷаң (Илҷілернің 16:4, 5). Пӱӱн Иегованың киречілерінің Устапчатхан чӧбі парох. Ол чӧп опытнай ах сағалларнаң пӱткен. Устапчатхан чӧптің холында Иегованың киречілерінің филиаллары. Филиалларда Библияны ӱгренҷең пічіктерні 850 азыра тіллерге тілбестепчелер паза сығарчалар. Іди Устапчатхан чӧп прай чир ӱстӱнде 120 муң азыра ӧмелердегі христианнарға духовнай ӱгредіг пир полча. Полған на ӧмеде духовнай саринаң пызығ иреннер ах сағал полып нымысчыланчалар. Олар ӧмедегілердеңер сынап сағыссырапчалар. (1 Петрның 5:2, 3 хығырыбызыңар.)

Иегованың киречілерінің организациязы чахсы хабарны искірерге паза ӱгренҷілер тимнирге турғызылған. Илҷілернің кӧзідімінің хоостыра, піс чахсы хабарны ибдең ибге искірчебіс (Илҷілернің 20:20). Сынны піліп аларға хынчатхан полған на кізіні Библия ӱгренерге хығырчабыс. Иегованың киречілері олаңай ла организация нимес, че піс ынағ сӧбіре полчабыс. Пістің хыныстығ Пабабыс пар, піс, тізең, прайзыбыс удур-тӧдір полызысчатхан харындас-пиҷелер полчабыс (2 Фессалониктегілерге 1:3). Иегованың киречілерінің организациязы Худайның кӧңнін толдырарға паза пасхаларына полызарға тӧстелген ӱчӱн чир ӱстӱнде ол иң часкалығ сӧбіре полча. (1 Петрның 2:9 хығырыбызыңар.)