УРОК 4
Иисус Христос кемдір ол?
1. Иисус хаҷан чайалған?
Ноға кізілер Иисуссар тартылҷаңнар? (МАТФЕЙ 11:29; МАРК 10:13—16).
Иисус пасха кізілерге тӧӧй нимес, ол чирде тӧрир алнында тигірде, хут полып, чуртаан (Иоанн 8:23). Ол Худайның пастағы чайаағы полған паза Худайға прай нимелерні чайирға полысхан. Иегова Иисусты ла чалғысхан чайап салған, аннаңар ол «Пабазының чалғыс Оолғы» тіп адалча (Иоанн 1:14). Ідӧк ол Худайның Представительі полча, аннаңар «Сӧс» тіп адалча. (Притчи 8:22, 23, 30; Колосстағыларға 1:15, 16 хығырыбызыңар.)
2. Ноға Иисус чирзер килген?
Худай, Оолғының чуртазын тигірдең Марияның, ирнең хонғалах хыстың, істінзер сал салған. Анзы Иисустың чирдегі пабазы чох полғанын кӧзітче (Лука 1:30—35). Иисус чирзер килген: 1) Худайдаңар сыннаңар ӱгредерге, 2) сидік тее полза, Худайның кӧңнін толдырарында кӧзідім поларға, 3) «толығ» полып, позының толдыра чуртазын пирібізерге. (Матфей 20:28 хығырыбызыңар.)
3. Ноға толығ кирек полған?
Толығ — кізіні ӧлімнең осхырып алар ӱчӱн пирілчеткен тӧлег (Исход 21:29, 30). Худай кізілер кирізіннер паза ӧлзіннер тіп хынмаан. Піс анзын хайдаң пілчебіс? Худай пастағы кізіні, Адамны, чазых ит салзаң, ӧл парарзың тіп сизіндірген. Адам чазых итпеен полза, хаҷан даа ӱребесчік (Бытие 2:16, 17; 5:5). Библияның хоостыра, тилекейге ӧлім Адамнаң пастыра «килген». Ол позының тӧліне ӱлӱске чазых артыс салған. Чазыхтың ӱчӱн хатығлааны, тізең, ӧлім. Адам ӱлӱске пирген ӧлімнең позып алар ӱчӱн, піске толығ кирек. (Римдегілерге 5:12; 6:23 хығырыбызыңар.)
Кем, толығ тӧлеп салып, пісті ӧлімнең осхыр поларҷых? Кізі позының ӧлімінең позының на чазыхтарының ӱчӱн тӧлепче. Чазыхтығ кізілернің пірдеезі пасхаларының чазыхтарының ӱчӱн тӧлеп полбинча. (Псалом 49:7—9 хығырыбызыңар.)
4. Ноға Иисус ӱреен?
Кізілер чазыхтығлар, Иисус, тізең, чазыхтығ полбаан. Ол хаҷан даа чазых итпеен, аннаңар ағаа позының чазыхтарының ӱчӱн ӧлерге кирек чох полған. Иисус пасха кізілернің чазыхтарының ӱчӱн ӱреен. Худай позының Оолғын, пістің ӱчӱн ӧлзін тіп, чирзер ысханда, кізілерге уғаа хынчатханын кӧзіткен. Иисус, Пабазының чооғын истіп паза пістің чазыхтарыбыстың ӱчӱн чуртазын пирібізіп, піске хынчатханын ідӧк кӧзіт пирген. (Иоанн 3:16; Римдегілерге 5:18, 19 хығырыбызыңар.)
«Ноға Иисус ӱреен?» тіп видеороликті кӧріп алыңар.
5. Иисус амғы туста ниме итче?
Иисус, чирде чуртаанда, ағырығ кізілерні имнеҷең, ӱрееннерні тірілдірҷең паза чобаға кір парғаннарға полысчаң. Іди Иисус полар туста Худайның чооғын исчеткеннерге ниме идерін кӧзіт пирген (Матфей 15:30, 31; Иоанн 5:28). Иисус ӱреп парғанда, Худай аны, кӧрінмес хут идіп, тірілдірібіскен (1 Петрның 3:18). Анаң Иисус Худайның оң саринда одырыбызып, Пабазы ағаа прай чир ӱстӱнең устирға ӱлгӱ пирерін сахтап сыххан (Еврейлерге 10:12, 13). Амды Иисус тигірде, Хан полып, устапча, аның ӱгренҷілері, тізең, чахсы хабарны прай чир ӱстӱнде искірчелер. (Лука 1:32, 33; Матфей 24:14 хығырыбызыңар.)
Ӱр ниместең Хан полчатхан Иисус, позының ӱлгӱзінең тузаланып, прай иреелерні тохтадыбызар паза чабал кізілерні чох идібізер. Иисусха киртінчеткеннер паза аның чооғын исчеткеннер чирдегі райда чуртирлар. (2 Фессалониктегілерге 1:6—8 хығырыбызыңар.)