Піс Библияның ӧӧн ӱгредіглерін хысхаҷахти кӧрглебістебіс, анзы Иеговаа хынызыңарны тыытхан полар. Ол хынысты аннаң андар ӧскірерге кирек (1 Петрның 2:2). Худайдаңар аннаң андар піліп одырзар паза аның Сӧзін ӱгрензер, мӧгі чуртас сыйыхха аларзар. (Иоанн 17:3; Иуданың 21 хығырыбызыңар.)

Худайдаңар нинҷе кӧп піліп одырзар, киртіністерің анҷох пик полып одырар. Киртініс Худайның кӧңніне кірер иде тудынарға полызар (Еврейлерге 11:1, 6). Киртініс сірерні пыросынарға паза кирек алызығлар идерге кӧӧктірер. (Илҷілернің 3:19 хығырыбызыңар.)

Алған пілістеріңнең пасхаларынаң ӱлезеріңер килер, прайзыбыс чахсы хабарларнаң ӱлезерге хынчабыс нооза. Худайдаңар пілістер аларын тохтатпазар, киртіністеріңні Библия хоостыра чарыда чоохтирға ӱгреніп аларзар. (Римдегілерге 10:13—15 хығырыбызыңар.)

Кӧбізі чахсы хабарнаң пастап нанҷыларынаң паза туғаннарынаң ӱлесчелер. Ӱлессер, иптіг тудыныңар. Пасхаларының религиялары чой тир орнына, Худайның молҷағларынаңар чоохтап пиріңер. Ундутпаңар, сірернің тудыныстарың сӧстеріңнің хай-хай кӧп чоохтирлар. (2 Тимофейге 2:24, 25 хығырыбызыңар.)

Худайның Сӧзін ӱгренгені сірерге духовнай саринаң ӧзерге полыс пирер. Пола-пола Иегованаң уғаа чағын палғалыстығ пол парарзар. Иегованың сӧбірезінің чардығы пол парарзар. (2 Коринфтегілерге 6:18 хығырыбызыңар.)

Духовнай саринаң ӧзерге хынчатсар, Библияны ӱгренерін тохтатпаңар (Еврейлерге 5:13, 14). Иегованың киречілерінің піреезін сірернең «Библия пісті нимее ӱгретче?» тіп кинде хоостыра Библияны ӱгренерге сурынып алыңар. Худай Сӧзінің пілістер нинҷе кӧп алып одырарзар, чуртастарың анҷох чахсы саринзар алызып одырар. (1 Тимофейге 4:15, 16; Римдегілерге 12: 2 хығырыбызыңар.)

Чахсы хабарны часкалығ Худай, Иегова, пирче. Аның чонынаң пірік парзар, ағаа чағын арах пол поларзар (Еврейлерге 10:24, 25). Чахсы киректернең Иегованы ӧріндіріп, сірер сын, мӧгі чуртасха чағдапчазар. Иегованаң ынархызыңарны тыыдыңар. Кізее анзы иң аарлығ нооза! (1 Тимофейге 6:19 хығырыбызыңар.)