Азых чӱректіг кізілер прай религияларда пар. Худай андағ кізілерні кӧрче паза оларға полысча. Ачырғастығ, че религияның адынаң кӧп чабал киректер иділче (2 Коринфтегілерге 4:3, 4; 11:13—15). Пірееде хабарларда религияларның чааларда, геноцидте, терроризмде паза палаа кӱлгенінде пыролығ полчатханы истіл парча. Анзы Худайға сынап киртінчеткен, арығ чӱректіг кізілерні уғаа тың сағыссыратча! (Матфей 24:3—5, 11, 12 хығырыбызыңар.)

Сын религия Худайны сабландырча, чой религия, тізең, уйатха сухча. Чой религия Худайдаңар паза ӱреен соонда кізінең ниме полчатханнаңар Библия ӱгретпинчеткен, чой нимелерге ӱгретче. Че Иегова кізілер аннаңар сынны пілзіннер тіп хынча. (Римдегілерге 6:23; 1 Тимофейге 2:3—5 хығырыбызыңар.)

Худайны алаахтыр полбас. Ағаа хынаачых полчатхан, че сынында Сайтанның чир-чалбағына хынчатхан кізілернің чойырхостарын ол кӧрче (Иаковтың 4:4). Худай Сӧзінде прай чой религиялар «Илбек Вавилон» тіп адалча. Ной тузындағы Чайых соонда ол саарда чой религия тӧстелген. Кізілерні пазынчатхан паза алаахтырчатхан религияны ӱр ниместең Худай чарғылап, чох идібізер. (Азых чоох 17:1, 2, 5, 16, 17; 18:8 хығырыбызыңар.)

Че чахсы хабар пар. Чой религиядағы азых чӱректіг кізілердеңер Иегова ундутпаан. Андағ кізілерні сынға ӱгредіп, позынзар чыыпча. (Иоанн 6:45 хығырыбызыңар.)

Сынға паза чахсы киректерге хынчатхан кізілерні Иегова аарлыға санапча. Оларны чой религиядаң сығыбызарға хығырча. Иеговаа хынчатханнар, аны ӧріндірер ӱчӱн, алызарға тимделер. (Азых чоох 18:4 хығырыбызыңар.)

Пастағы векте азых чӱректіг кізілер чахсы хабарны Иисустың илҷілерінең истіп, ӧрініснең ӱндескеннер. Олар Худайның кӧңні хоостыра чуртирға ӱгреніп алғаннар, аннаңар часкалығ пол парғаннар паза ізеністері пар пол парған. Ол христианнар піске чахсы кӧзідім полчалар. Олар чахсы хабарға ӱндезіп, чуртастарын Иеговаа пирібіскеннер. (1 Фессалониктегілерге 1:8, 9; 2:13 хығырыбызыңар.)

Чой религиянаң палғалыстығ поларға хынминчатханнарны Иегова позының сӧбірезіне хозыларға хығырча. Ол хығырыға ӱндессер, аның нанҷызы пол поларзар паза Худайның нымысчыларының аразында кӧп чахсы нанҷылар таап аларзар. Полар туста, тізең, сірерні мӧгі чуртас сағыпча. (Марк 10:29, 30; 2 Коринфтегілерге 6:17, 18 хығырыбызыңар.)

Ӱр ниместең Худай чой религияны чох идер. Іди Иегова пазындыр салғаннарны позыдар. Чой религия паза хаҷан даа кізілерні алаахтыр полбас, чар полбас. Андада Иеговаа киртістіг прай чайаахтар, пір сӧбіре чіли, сын Худайға нымысчыланарлар. (Азых чоох 18:20, 21; 21:3, 4 хығырыбызыңар.)