Чахсы хабарны пирчеткен часкалығ Худай Иегова, прай чир ӱстӱндегі сӧбірелер часкалығ ползыннар тіп хынча (1 Тимофейге 1:11, НТ). Хоныхты ол тӧстеен. Сӧбіре часкалығ ползын тіп, хоныхты закон хоостыра регистрировать поларға кирек. Андағ сӧбіреде прайзы алнынзар хорығыс чох кӧрчелер, палалар, тізең, ізестіг сӧбіреде ӧсчелер. Христианнарға хазнаның хоныхты санға алчатхан законнарынҷа тудынарға кирек. (Лука 2:1, 4, 5 хығырыбызыңар.)

Худай хоныхха хайди кӧрче? Иегова хоных хонған кізілер чуртас тооза хада чуртазыннар тіп паза ирепчілер удур-тӧдір киртістіг ползыннар тіп хынча (Еврейлерге 13:4). Ирепчі чарылысчатханын Худай хырт кӧрче (Малахия 2:16). Че Худай христианинге, хоных хонған кізізі киртістіг халбаза, чарылызып, хатап хоных хонарға чаратча. (Матфей 19:3—6, 9 хығырыбызыңар.)

Иегова ир паза ипчі кізіні удур-тӧдір толдырыссыннар тіп чайап салған (Бытие 2:18). Ирі — сӧбіренің пазы. Ағаа ипчізінің паза палаларының чуртасха кирек нимелер ползын тіп тоғынарға кирек. Ідӧк ағаа сӧбіре пазырызын иртірерге кирек. Ирі ипчізінің ӱчӱн тайығларға парарға тимде поларға кирек. Ирепчілер удур-тӧдір хынызып паза улуғлазып чуртирға киректер. Чазых чох кізі чоғыл, аннаңар ирепчілернің удур-тӧдір пыроларын тастазарға ӱгренгені уғаа аарлығ. Пыро тастап оңнааны — сӧбіре часказының клӱзі. (Ефестегілерге 4:31, 32; 5:22—25, 33; 1 Петрның 3:7 хығырыбызыңар.)

Хоныхта сидіктер пол сыхсалар, ирепчілерге удур-тӧдір хыныснаң хайарға ӱгренерге кирек (1 Коринфтегілерге 13:4, 5). Худайның Сӧзі сӧбіредегі сидіктерні, чара чуртап, пӧгерге чаратпинча. (1 Коринфтегілерге 7:10—13 хығырыбызыңар.)

Иегова сірерні чуртасха ӧрінзіннер тіп хынча. Сірер аның чооғын иссер, саарбах тузыңарны ӧріністіг паза часкалығ иртірерзер. Іҷе-пабаңар сірердең хыйғалар паза олар сірердең хай-хай ӱр чуртапчалар, аннаңар Худай сірерні оларның чооғын иссіннер тіп хынча (Колосстағыларға 3:20). Ідӧк Иегова сірерні ағаа паза аның Оолғына ниме-де идіп ӧрінзіннер тіп хынча. (Экклезиаст 11:9—12:1; Матфей 19:13—15; 21:15, 16 хығырыбызыңар.)

Сірерге палаларыңның чиис, кип-азах паза чуртаҷаң орын ползын тіп кӱстенерге кирек (1 Тимофейге 5:8). Палалар часкалығ ӧссіннер тіп, оларны Худайға хынарға паза аның чооғын истерге ӱгредерге кирек (Ефестегілерге 6:4). Анзында кӧзідім полыңар. Палаларың сірернің Худайға хынчатханнарыңны кӧрзелер, ідӧк тудынарға кӱстенерлер. Худайның Сӧзі палаларыңны чахсы хылыхтығ паза орта сағыстығ иде ӧскірерге полызар. (Второзаконие 6:4—7; Притчи 22:6 хығырыбызыңар.)

Палаларны махтирға паза оларға хыныс кӧзідерге кирек. Че оларны тӱзедерге паза хатығлирға кирегӧк. Анзы оларны хомай салтарларға ағылчатхан тудыныстаң арачылир (Притчи 22:15). Че паланы чабалланып, хазыр хатығлирға чарабас. (Колосстағыларға 3:21 хығырыбызыңар.)

Иегованың киречілері іҷе-пабаларға паза палаларға полызар ӱчӱн, нинҷе-де кинде сығарғаннар. Ол кинделер Библияда тӧстелгеннер. (Псалом 19:7, 11 хығырыбызыңар.)