Иисус пір ле религияны тӧстеен. Ол сын религия. Сын религияны мӧгі чуртасха апарчатхан чолдаң тиңнестірерге чарир. Иисус ол чолны «таап алчатхан кізі асхынах» теен (Матфей 7:14). Библияда ла тӧстелген пазырыс Худайның кӧңніне кірче. Худайның сын нымысчыларын пір киртініс піріктірче. (Иоанн 4:23, 24; 14:6; Ефестегілерге 4:4, 5 хығырыбызыңар.)

«Прай религиялар Худайның кӧңіне кірчелер бе?» тіп видеороликті кӧріп алыңар.

Иисус христианствоны ардат салар чой ухаанҷылар килерлер теен. Олар сын христианнарға тӧӧй кӧрінчелер. Олар постарын Христостың ӱгренҷілері тіп санапчалар паза постарының тигіриблерін христианнар тигіриблері тіп адапчалар. Че сынында кем сын христианин полчатханын піліп аларға оңдай пар. Хайди? Сын на религия христианскай киректер паза качестволар кӧзітче. (Матфей 7:13—23 хығырыбызыңар.)

Пис танығ кӧр кӧреелер.

• Сын христианнар Библия Худай Сӧзі полчатханына киртінчелер. Сын христианнар Библиядағы принциптернің хоостыра чуртапчалар. Чой христианнар, тізең, пазырыстарын кізілернің ӱгредіглерінде паза кӧрістерінде  тӧстепчелер (Матфей 15:7—9). Сын христианнар нимее ӱгретчелер, постары ідӧк тудынчалар. (Иоанн 17:17; 2 Тимофейге 3:16, 17 хығырыбызыңар.)

• Христостың сын ӱгренҷілері Худайның адын, Иегованы, саблапчалар. Иисус, кізілернең чоохтасчатса, Худайның адын удаа адаҷаң. Іди ол Пабазының адын саблаҷаң. Ол кізілерге Худайдаңар чоохтаҷаң паза Худайның ады сабланзын тіп пазырарға ӱгретчең (Матфей 6:9). Сірер чуртапчатхан орында Худайның адын кем искірче? (Иоанн 17:26, НТ; Римдегілерге 10:13, 14, НТ хығырыбызыңар.)

• Сын христианнар Худайның Хан-ӱлгӱзініңер чоохтапчалар. Худай Иисусты Хан-ӱлгӱдеңер чахсы хабарны таратсын тіп ысхан. Хан-ӱлгӱ ле кізілернің сидіктерін пӧк полар. Иисус аннаңар чуртазы ӱзілгенҷе чоохтаан (Лука 4:43; 8:1; 23:42, 43). Аның ӱгренҷілері ідӧк Хан-ӱлгӱдеңер искірерлер теен. Хайдағ религияның кізілері Худайның Хан-ӱлгӱзінеңер чоохтапчалар? (Матфей 24:14 хығырыбызыңар.)

• Иисустың сын ӱгренҷілері пу чабал чир-чалбахтың чардығы ниместер. Олар политикада, чонның тоғырланыстарында араласпинчалар (Иоанн 17:16; 18:36). Ідӧк олар чир-чалбахта тарап парған сайбах тудыныстарға сабылбинчалар паза кізіні ардатчатхан кӧнігістердең хыйа тудынчалар. (Иаковтың 4:4 хығырыбызыңар.)

• Сын христианнарның аразында сын хыныс. Худайның Сӧзі оларны прай нациялардағы кізілерні улуғлирға ӱгрет салған. Чой религиялар чааларға удаа хабасчалар, сын христианнар, тізең, андағ киректерге ара кірбинчелер (Михей 4:1—3). Чааларда аралазар орнына, олар, кізілерге полызар ӱчӱн, оларны часхарар ӱчӱн, тустарын паза ахчаларын хоратчалар. (Иоанн 13:34, 35; 1 Иоанның 4:20 хығырыбызыңар.)

Хайдағ религияның ӱгредіглері Худайның Сӧзінде тӧстелчелер, Худайның адын саблапчалар паза Худайның Хан-ӱлгӱзі ле кізілернің сидіктерін пӧк полар тіп чоохтапчалар? Худайға киртінчеткеннернің аразында кемнің сын хыныс пар паза кем чааларда араласпинча? Хайди сағынчазар? (1 Иоанның 3:10—12 хығырыбызыңар.)