Худайның Хан-ӱлгӱзі — тигірдегі ӱлгӱ. Ол ӱлгӱ, кізілернің прай ӱлгӱлерінің орнына турып, Худайның кӧңнін тигірде дее, чирде дее толдыр салар. Худайның Хан-ӱлгӱзінеңер хабар — ол чахсы хабар. Прай кізілер чахсы ӱлгӱ ползын тіп хынчалар. Ӱр ниместең Худайның Хан-ӱлгӱзі, андағ чахсы ӱлгӱ турғыс салып, прай чоннарны ынағ ит салар. (Даниил 2:44; Матфей 6:9, 10; 24:14 хығырыбызыңар.)

Полған на хан-ӱлгӱнің ханы пар. Тигірдегі Хан-ӱлгӱнің Ханына Иегова Иисусты турғыс салған. (Азых чоох 11:15 хығырыбызыңар.)

«Худайның Хан-ӱлгӱзі нимедір ол?» тіп видеороликті кӧріп алыңар.

Худайның Оолғы, Иисус, нымзах паза сын тудыныстығ, аннаңар ол иң чахсы Хан полча (Матфей 11:28—30). Ідӧк ол тигірдең устапчатханнаңар, аның кӱзі уғаа илбек. Аннаңар ол кізілерге чахсы полыс полар. Иисус тірілген соонда тигірзер ӧрлеп парыбысхан. Анаң Иегованың оң саринда одырыбысхан (Еврейлерге 10:12, 13). Тус читкенде, Худай ағаа ӱлгӱ пирген, анаң Иисус устап сыххан. (Даниил 7:13, 14 хығырыбызыңар.)

Тигірде Иисуснаң хада устир кізілер Библияда «ах арығ» кізілер тіп адалчалар (Даниил 7:27). Оларны Иегова Иисустың киртістіг илҷілерінең таллап пастаан. Худай «ах арығларны» — ағаа киртістіг иреннерні паза ипчілерні — амғы  тусха теере чыыпча. Иисусох чіли, олар, хут полып, тигірде чуртирға тірілчелер. (Иоанн 14:1—3; 1 Коринфтегілерге 15:42—44 хығырыбызыңар.)

Нинҷе кізі тигірзер парар? Иисус оларны «кічіг хой ӧӧрі» тіп адаан (Лука 12:32). Оларның саны 144 000. Олар Иисуснаң хада чирнең устирлар. (Азых чоох 14:1 хығырыбызыңар.)

Худайның Хан-ӱлгӱзі 1914 чылдаң сығара устапча *. Иисус, устап пастаанда, Сайтанны паза аның айналарын тигірдең чирзер тастабысхан. Сайтан, тың ӧкпелен парып, кізілерге иреенің ӱстӱне ирее ыс сыххан (Азых чоох 12:7—10, 12). Ол тустаң сығара кӧп чобағлар полча. Чаалар, ӧзӧгіс, чуғынҷах ағырығлар паза чир тітіреені — прай пу нимелер Худайның Хан-ӱлгӱзі чағдапчатханын кӧзітчеткен «танығларның» чардығы. (Лука 21:7, 10, 11, 31 хығырыбызыңар.)

Прай чир ӱстӱнде чахсы хабар искірілче. Аның сылтаанда Худайның Хан-ӱлгӱзі прай чоннардаң «санап тоосча чох кӧп чон» чыыпча. Амыр хылыхтығ миллионнар Иисустың Хан-ӱлгӱзінің кізілері пол парчалар. Худайның Хан-ӱлгӱзі, пу чабал чир-чалбахты чох итчетсе, оларны арачылап халар. Аннаңар Худайның Хан-ӱлгӱзінде чуртирға хынчатхан кізілер Иисустың чооғын истерге ӱгреніп аларға киректер. (Азых чоох 7:9, 14, 16, 17 хығырыбызыңар.)

Иисус Христостың пір муң чыллығ ӱлгӱзінде Хан-ӱлгӱ Худайның пастағыдаң сығара кізілердеңер сағынған сағызын толдыр салар. Прай чир рай пол парар. Анаң Иисус Хан-ӱлгӱні Пабазына пирібізер (1 Коринфтегілерге 15:24—26). Худайның Хан-ӱлгӱзінеңер кемге чоохтап пирерге хынчазар? (Псалом 37:10, 11, 29 хығырыбызыңар.)