Иегова прай кізілер ағаа пазырып чағдазыннар тіп хынча (Псалом 65:2). Че ол прай пазырыстарны испинче. Кӧзідімге, ипчізінең хазыр тудынчатхан ир кізінің пазырыстырына Худай нандырбинча (1 Петрның 3:7). Израиль чоны, пыросынмин, чабал киректер иткенде, Худай оларның пазырыстарын испеҷең. Че Иегова чазыхтарында пыросынчатханнарны истерге тимде. Ундутпаңар, Худайға пазырыс — піске уғаа улуғ аарлас. (Исаия 1:15; Илҷілернің 3:19 хығырыбызыңар.)

«Худай прай пазырыстарны исче бе?» тіп видеороликті кӧріп алыңар.

Иегова — Чайаачы паза аннаң пасха сын Худай чоғыл, аннаңар ағаа ла пазырарға кирек (Матфей 4:10; 6:9). Піс чазыхтығ тӧріпчебіс, аннаңар чазыхтарыбыстың ӱчӱн ӱреен Иисус Христостың адынаң пастыра пазырарға кирек (Иоанн 14:6). Молитвенниктең ӱгрен салған алай аннаң хығырчатхан пазырыстар Иегованың кӧңніне кірбинчелер. Иегова сағыстарыбысты паза чӱреебісті пазырыста ассыннар тіп хынча. (Матфей 6:7; Филипптегілерге 4:6, 7 хығырыбызыңар.)

Чайаачыбыс, истілдіре чоохтанмин, істібісте дее пазырчатсабыс исче (1 Самуил 1:12, 13). Худай пісті ағаа хайдағ даа туста пазырарға кӧӧктірче. Иртен турып алып, иирде узир алнында, азыранар алнында паза сидіктер пол парза, пазырарға чарир. (Псалом 55:22; Матфей 15:36 хығырыбызыңар.)

Піс Худайға киртінминчеткен паза Худай чирні райға айландыр саларына кӱлчеткен кізілер аразында чуртапчабыс, аннаңар піске Худайға чағдирға оой нимес (2 Тимофейге  3:1, 4; 2 Петрның 3:3, 13). Аннаңар піске харындас-пиҷелернең чоохтас чӧріп, удур-тӧдір хабазарға кирек. (Еврейлерге 10:24, 25 хығырыбызыңар.)

Иеговаа хынчатханнарнаң нанҷыласханыбыс ағаа чағын арах поларға полызар. Иегованың киречілерінің чыылығларына чӧрзебіс, киртінізібісті тыыт поларбыс. (Римдегілерге 1:11, 12 хығырыбызыңар.)

Худай Сӧзінең піліп алған нимелердеңер тирең сағынзар, Иеговаа чағдирзар. Аннаңар аның иткен киректерінеңер, чахығларынаңар паза молҷағларынаңар сағын чӧріңер. Анзы Худайның хынызының паза хыйғазының ӱчӱн алғыстығ поларға полызар. (Иисус Навин 1:8; Псалом 1:1—3 хығырыбызыңар.)

Худайға ізензер ле, киртінзер ле, ағаа чағын пол поларзар. Киртіністі ӧзімнең тиңнестірерге чарир: ӧзім ӧссін тіп, аны суғлирға кирек. Киртіністі ідӧк ӧскірерге кирек. Киртініс ӧссін тіп, киртіністерің тӧстелчеткен нимелердеңер хатап-хатап сағын турарға кирек. (Матфей 4:4; Еврейлерге 11:1, 6 хығырыбызыңар.)

Иегова ағаа хынчатханнардаңар сағыссырапча. Киртінізібісті сайбабызар паза мӧгі чуртасха ізеністі чох идібізер нимелердең арачылапча (Псалом 91:1, 2, 7—10). Худай хазыхты ардатчатхан паза часка чох итчеткен чуртас оңдайынҷа чуртабасха чоохтапча. Иегова иң чахсы чуртас чолынҷа парарға полысча. (Псалом 73:27, 28; Иаковтың 4:4, 8 хығырыбызыңар.)