Сын Худай — ол прай нименің Чайаачызы. Ол хаҷан даа полған паза хаҷан даа полар (Псалом 90:2). Библияда пазыл парған чахсы хабарны ол пирген (1 Тимофейге 1:11). Худай піске чуртас сыйлаан, аннаңар ағаа ла пазырарға кирек. (Азых чоох 4:11 хығырыбызыңар.)

Худай — ол Хут, аннаңар аны хаҷан даа пір дее кізі кӧрбеен. Хут — пістің чуртазыбыстың хай-хай пӧзік чуртастың формазы (Иоанн 1:18; 4:24). Худай харахха кӧрінминчетсе дее, ол чайаан нимелер пастыра аннаңар піліп аларға чарир. Кӧзідімге, аймах-пасха фрукттар, чахайахтар аның хынызынаңар паза хыйғазынаңар киречілепчелер. Илбек Тилекей, тізең, Худайның кӱзінеңер киречілепче. (Римдегілерге 1:20 хығырыбызыңар.)

Библияны хығырып, Худайдаңар кӧп арах піліп аларға чарир. Аннаң Худай нимее хынчатханнаңар, нимее хынминчатханнаңар, хайди кізілерге хайчатханнаңар паза хайди ол аймах-пасха киректерде тудынчатханнаңар піліп аларға чарир. (1 Иоанның 4:8; Иаковтың 4:6 хығырыбызыңар.)

Иисус теен: «Тигірдегі Пабабыс! Синің Адың сабланзын» (Матфей 6:9). Худайның титуллары кӧп, че ады пір ле. Аймах-пасха чоннарның ол атты адапчатханнары пасха-пасха истілче. Хакас тілінең аны «Иегова» тіп адапчалар. (Псалом 83:18 хығырыбызыңар.)

Библияның кӧп тілбестеглерінең Худайның адын чох идібіскеннер, аны Хан-пиг паза Худай тіп титулларға алыстырыбысханнар, че Библия пазылған пурунғы пічіктерде Худайның  ады 7 000-ҷа хати учураҷаң. Иисус кізілерні, Худайның адын адап, Худайдаңар ӱгретчең. (Еврейлерге 2:12 хығырыбызыңар.)

«Худайның ады пар ба?» тіп видеороликті кӧріп алыңар.

Пӱӱн чир-чалбахта чобағлар паза иреелер кӧп. Анзы Худай піске хынминчатханын паза піске аның кирегі халбинчатханын таныхтапча ба? Піреелері Худай пісті сыныхтир ӱчӱн, піске иреелер ысча тіпчелер, че анзы саба сағыс. (Иаковтың 1:13 хығырыбызыңар.)

Иегова пісті постарыбыстың сағыстарыбыснаң пӧгін аларға чайаан. Ол пісті робот ит салбаан ӱчӱн піс ағаа алғыстығбыс. Ол пирген сыйыхнаң, пос чуртаснаң, тузаланып, ағаа нымысчыланарға пӧгін алҷаң оңдай пар (Иисус Навин 24:15). Ачырғастығ, че кӧбізі пасха чолҷа парча. Олар пасхаларына хомай итчелер, аннаңар чир-чалбахта анҷа кӧп ирее. Пу прай сыны чох тудынысты кӧріп, Иегованың чӱрее ағырча. (Бытие 6:5, 6 хығырыбызыңар.)

Иегова піске хынча, аннаңар пісті чуртасха ӧрінзіннер тіп сағынча. Ӱр ниместең ол прай чабал киректерні паза андағ киректерні итчеткеннерні чох идібізер. Иегова чабал киректерні ам даа тохтатпаан, че анзына улуғ сылтағ пар. Хайдағ? Аннаңар піс 8-ҷі уроктаң піліп аларбыс. (2 Петрның 2:9; 3:7, 13 хығырыбызыңар.)

Иегова пісті ағаа чағын ползыннар тіп хынча. Анзында піске пазырыс полыс пирер. Піске Худайнаң чоохтазарға кирек. Ол полған на кізее хайығ салча (Псалом 65:2; 145:18). Иегова пыро тастирға тимде. Пірее ниме киліспинчетсе дее, Худай пістің аны ӧріндірерге кӱстенчеткенібісті сизінче. Прай ол ниме кӧзітче: піс чазыхтығ ползабыс таа, Худайға чағын пол поларбыс. (1 Иоанның 1:9; Иаковтың 4:8 хығырыбызыңар.)

Иегова піске чуртас сыйлап пирген, аннаңар ағаа прайзынаң артых хынарға кирек (Марк 12:30). Худайға хынызыбысты кӧзідер ӱчӱн, аннаңар піліс аларын тохтатпасха паза аның чахығларын толдырарға кирек. Іди піс Иеговаа чағын пол поларбыс. (1 Тимофейге 2:4; 1 Иоанның 5:3 хығырыбызыңар.)