Иегова чирні кізілер чуртазыннар тіп чайап салған. Чир — прай чоннарның ибі. Пастағы кізілер, Адамнаң Ева, тигірде чуртирға чайалбааннар, тигірде чуртирға Худай ангеллерні чайап салған (Иов 38:4, 7). Кізілерні, тізең, Худай райда, Эдем тіп уғаа сіліг садта, чуртат салған (Бытие 2:15—17). Иегова пастағы кізілер паза оларның тӧлі, хаҷан даа ӧлбин, чирде мӧгі чуртазыннар тіп хынған. (Псалом 37:29; 115:16 хығырыбызыңар.)

Пастап Эдем сад ла рай полған. Соонаң, пастағы ирепчінің палалары тӧрізе, чон прай чир ӱстӱне тол парарға кирек полған. Нинҷе-де тус пазынаң олар прай чир ӱстӱн рай, ӧңненчеткен сад, ит саларҷыхтар (Бытие 1:28). Чир хаҷан даа чох иділбес. Ол хаҷан даа пістің ибібіс полар. (Псалом 104:5 хығырыбызыңар.)

«Ноо нимее Худай чирні чайап салған?» тіп видеороликті кӧріп алыңар.

Адамнаң Ева Худайдаң тоғыр пар сыхханнар, аннаңар Худай оларны Эдем садтаң сығара сӱрібіскен. Іди рай чох пол парған. Амғаа читіре пір дее кізі чирні рай ит полбаан. Ол тустаң сығара чир ӱстӱнде чабал кізілер устапчалар. (Бытие 3:23, 24 хығырыбызыңар.)

Иегова кізілердеңер сағын салған сағызын тастабысхан ма? Чох! Иегова прай нимедең кӱстіг Худай, аннаңар ағаа сағызын толдырарға пір дее ниме харығ пол полбас (Исаия 45:18). Иегова чирні хайди даа хатап рай ит салар, іди кізілердеңер иң пастағы кӧстиин толдыр салар. (Псалом 37:11, 34 хығырыбызыңар.)

Чирдегі Рай Иисустың ӱлгӱзінің тузында хатап турғызылар. Пастап Иисус Худайның ангеллерінең хада Худайға  тоғырланчатханнарны Армагеддон чаада прай хырыбызар. Анаң Сайтанны 1 000 чылға тӱбі чох чирзер тастабызар. Ол чаада тіріг халзыннар тіп, Иисус Худайның нымысчыларына ниме идерге чоохтир паза оларны арачылир, аннаңар олар хырылбастар. Олар чирдегі Райда мӧгі чуртас чуртирлар. (Азых чоох 20:1—3; 21:3, 4 хығырыбызыңар.)

Хаҷан Худай чабал киректерні чох идібізер? Иисус ол тус хаҷан килерін піліп аларға «танығ» пирген. Амғы туста полчатхан киректер кізілерге саңай хырыл парарға хорғыс ағылчалар. Анзы «тӱгенҷі туста» чуртапчатханыбысты кӧзітче. (Матфей 24:3, 7—14, 21, 22 хығырыбызыңар.)

Иисустың Хан-ӱлгӱзі пір муң чыл турар. Ол туста Иисус чирдегі иреелерні прай чох идібізер (Исаия 9:6, 7; 11:9). Ол Хан на полбас, ідӧк Иң улуғ абыс полар. Иң улуғ абыс полып, Худайға хынчатханнарны чазыхтарынаң осхырар. Іди Худай Иисустаң пастыра ағырығларны, кізі киріпчеткенін паза ӧлімні чох идібізер. (Исаия 25:8; 33:24 хығырыбызыңар.)

Райда Худайның чооғын исчеткеннер чуртирлар (1 Иоанның 2:17). Иисус ӱгренҷілеріне пазымнығ, ӱгренерге тимде кізілерні тілирге паза ол кізілерге Худайның нанҷылары полып аларға полыс пирерге чахаан. Амғы туста Иегова миллионнарны чирдегі Райда чуртирға тимнепче (Софония 2:3). Иегованың киречілерінің Залларында кізілер чахсы ирлер, ипчілер, іҷе-пабалар поларға ӱгренчелер. Іҷе-пабалар палаларынаң хада Худайға пазырчалар паза Библиядаң алған пілістер хайдағ туза ағылчатханын піліп одырчалар. (Михей 4:1—4 хығырыбызыңар.)