УРОК 6
Ӱреен кізілерге хайдағ ізеніс пар?
1. Ӱреен кізілерні ниме сағыпча?
Иисустың нанҷызы Лазарь полған. Ол Иерусалимнің хыриндағы Вифаний аалда чуртаан. Пірсінде Лазарь, ағырыбызып, ӱреп парған. Иисус килгенде, ол тӧрт кӱн ӧліг полған. Иисус Лазарьның пиҷелерінең, Марфанаң паза Мариянаң, хада Лазарьны чыып салған чирзер парған. Ӱр ниместең анда кӧп кізі чыыл парған. Иисус Лазарьны ол кізілернің кӧзіне тірілдірібіскен. Сағын на кӧріңер, Марфанаң Мария Лазарьны тіріг кӧр салғанда, хайди тың ӧрінген поларлар! (Иоанн 11:21—24, 38—44 хығырыбызыңар.)
Ӱреен кізілерге чахсы хабар парын Марфа пілген: Иегова оларны чир ӱстӱнде чуртирға тірілдірер. (Иов 14:14, 15 хығырыбызыңар.)
2. Ӱреен соонда кізінең ниме полча?
Худай Адамға теен: «Син чир тозынызың, тозынох пол парарзың» (БЫТИЕ 3:19).
Кізі «чир тозынынаң» чайалған (Бытие 2:7; 3:19). Кізілер ит-сӧӧктіг хуттар нимес. Кізілер — ит-сӧӧктіг чайаахтар, аннаңар ӧлім соонда кізінің хайдағ-да чардығы чуртабинча. Кізі ӱреп парза, аның миизі ӧл парча, аннаңар аның прай сағыстары чох пол парчалар. Лазарь, тірілгенде, ӧлім соондағы чуртастаңар пір дее ниме чоохтабааны ӧлім соонда чуртас чох полчатханын кӧзітче. (Экклезиаст 9:5, 6, 10 хығырыбызыңар.)
Худай кізілерні адта иреелепче бе? Библияда ӱреен кізілер пір дее ниме пілбинчелер паза сағынминчалар тіп чоохталча. Аннаңар ӱспин кӧйчеткен адтаңар ӱгредіг — Худайдаңар чой нимее ӱгретчеткен ӱгредіг. Кізілерні іди иреелирінеңер Худайға сағынарға даа чиркестіг. (Иеремия 7:31 хығырыбызыңар.)
«Ӱреен соонда кізінең ниме полча?» тіп видеороликті кӧріп алыңар.
3. Ӱреен кізілер піснең чоохтас полчалар ба?
Ӧлген кізілер чоохтас таа, ис тее полбинчалар (Псалом 115:17). Че чабал ангеллер, ӱреен кізі полып, ол кізінің ӱнінең чоохтанчалар (2 Петрның 2:4). Аннаңар Иегова ӱрееннерні хығырарға чаратпинча. (Второзаконие 18:10, 11 хығырыбызыңар.)
4. Кем тірілер?
Миллионнар тірілерлер. Худайны пілбин, саба тудынған кізілер дее тірілерлер. (Лука 23:43; Илҷілернің 24:15 хығырыбызыңар.)
Тірілген кізілернің Худайдаңар сынны піліп аларға паза, Иисустың чооғын истіп, ағаа киртіністерін кӧзідерге оңдай полар (Азых чоох 20:11—13). Орта тудынчатханнар чирдегі райда мӧгі чуртас чуртирлар. (Иоанн 5:28, 29 хығырыбызыңар.)
5. Иегованың ӱрееннерні тірілдірерге хынчатханы аннаңар ниме чоохтапча?
Худай Оолғын чирзер пістің ӱчӱн чуртазын пирібізерге ысхан, аннаңар прай кізілернің тірілерге ізеністері пар. Анзы Иегованың піске илбек хынызын паза паарсазын кӧзітче. Тірілген кізілернің хайзынаң иң пастап тоғазарға хынчазар? (Иоанн 3:16; Римдегілерге 6:23 хығырыбызыңар.)
