Пу брошюраны хығырып, Библия наука саринаң хап-орта чоохтапчатханын піліп алғанда, хайхап парған даа поларзың. Кӧп кізі, анзын піліп алып, ідӧк хайхап парған. Кӧп религияларның ӱгредіглері Библияда пазылбаанын піліп алып, кізілер улам тың хайхапчалар. Піреелері Худай Тилекейні 24 частығ алты кӱнге чайап салған тіп Библия ӱгретче тіпчелер. Че сынында, ученайлар Тилекей паза Чир нинҷе чыл турча тіп санапчатханына Библия тоғырланминча a.

Чирде чуртас чайалғаннаңар Библияда хысхаҷахти чоохталғаны научнай істезіглер иртірерге паза теориялар сығарарға кӧп орын пирче. Я, Библияда Худай прай тіріг нимелерні «родтарҷа» чайап салған тіп пазылча (Бытие 1:11, 21, 24). Анзы пірее теорияларға тоғырланчатса даа, научнай факттарға тоғырланминча. Нинҷе-де тус пазынаң кӧрін парча: теориялар киліп парыбысчалар, факттар, тізең, халчалар.

Че кӧп кізілер религияа ізенмин сыхханнар, аннаңар Библияны істезерге маңзырабинчалар. Олар религияларда чойырхос, садынҷах паза чааларға кӧӧктірчеткен тудыныс кӧрчелер. Че Библия хоостыра тудынаачых полчатхан кізілернің ӱчӱн Библиядаңар хомай сағынарға орта полар ба? Пірее чабал фанактиктер паза расисттер, эволюция теориязынаң ахтанып, уғаа хорғыстығ киректер итчелер. Анзы паарсах чӱректіг учёнайларны уғаа тың хомзындырча. Андағ чабал киректер хоостыра эволюция теориязынаңар хайдағ-да сағысха килерге чарир ба? Ол теорияны чахсы істезіп, пар факттарнаң тиңнестірзе, чахсы поларҷых нимес пе?

Піс сині Библияны ідӧк істезерге кӧӧктірчебіс. Библия кӧп религияларның ӱгредіглерінең пасха ӱгретчеткеніне хайхап парарзың. Библия чаалазарға паза нациялар аразында ыырлазарға кӧӧктірбинче.  Ол кинде Худайның нымысчыларын чааларда араласпасха ла нимес, че кӱстеге ағылчатхан киректерні дее хырт кӧрерге ӱгретче (Исаия 2:2—4; Матфей 5:43, 44; 26:52). Библия фанатизмнең паза пір дее нимеде тӧстелбеен киртіністең хыйа тудынарға кӧӧктірче, сын киртініс киречілестерде тӧстенче паза Худайға нымысчыланыста сағыснаң тузаланарға кирек тіп ӱгретче (Римдегілерге 12:1, НТ; Еврейлерге 11:1). Библия наа пілістер аларын хомай нимее санабинча, кізілер хас-хаҷаннаң нандырығ таап полбинчатхан, сидік сурығларны істезерге кӧӧктірче.

Кӧзідімге, мындағ сурығдаңар сағынғазың ма: Худай пар полза, ноға чир-чалбахта анҷа кӧп ирее? Библия пу паза пасха даа сурығларға нандырча b. Сынны тілирін тохтатпа. Андада киречілестерде тӧстенчеткен паза чӱрееңе теңер нандырығлар таап аларзың.