Полған на ӱгренҷінің алнында турчатхан сурығ
Максим, экзамен алнында хайди сағыссырапча, ам ідӧк сағыссырапча. Ӱгретчі Дарвиннің эволюция теориязы хайди научнай прогресске хабасханын паза кізілерге религиялар чонны хорыхтырчатхан ӱгредіглердең позып аларға полыс пиргенін чарыда чоохтап пирген. Ам, тізең, ӱгренҷілер ниме аннаңар сағынчатханнарын чоохтап пирерін сағыпча.
Максим хайди поларға пілбинче. Іҷе-пабазы ағаа чирні паза прай тіріг нимелерні Худай чайаан тіп чоохтааннар. Олар Библиядағы чайалыстаңар чоох орта чоох, эволюция, тізең, пір дее киречілес чох теория ла тіп ӱгреткеннер. Ӱгретчі дее, іҷе-пабазы даа чахсы сағыснаң ӱгретчелер. Оларның хайзына киртінерге?
Чир ӱстӱнде прай даа школалардағы ӱгренҷілер андағ сурығ алнында турчалар. Максимге дее, пасха даа ӱгренҷілерге хайди поларға? Пу сурыға нандырығны оларға постарына таап аларға кирек нимес пе? Эволюцияа паза чайалысха киречілестерні істезіп алып, нимее киртінерге оларға постарына таллап аларға кирек нимес пе?
Библия пасхалары чоохтапчатхан нимее, сағынып албин, киртінерге ӱгретпинче. Библияны пасхан кізілернің пірсі піди тіпче: «Сағынып оңнабинчатхан кізі полған на сӧске киртінче, ибіре сағынчатхан кізі, тізең, полған на алтымын сынапча» (Притчи 14:15). Библия христианнарны кізілер нимее ӱгретчеткенін, «чахсы сағынып», сыныхтирға кӧӧктірче (Римдегілерге 12:1, 2, НТ).
Пу брошюра школаларда прай ниме чайалған тіп ӱгредерге кирек тіпчеткен религиознай группаларның саринда турбинча. Аның кӧстии — чуртас позы ла пол парған тіпчеткен паза Библиядағы чайалыстаңар чоохты миф тіп санапчатхан учёнайларның ӱгредіглерін істезерге.
Клетка чуртас ӧӧні полча, аннаңар піс аны істезербіс. Клетканың пӱдізінеңер хайхастығ нимелер піліп аларзың. Ідӧк эволюцияның теориязына киречілес тіп кӧзітчеткен нимелерні позың істес кӧрерзің.
Полған на кізее мындағ сурыға нандырығ таап аларға кирек: чуртас чайалған алай эволюция пастыра пол парған? Син аннаңар сағынған поларзың. Чуртас чайалғанына нинҷе-де киречілес ӱзӱрібізерге хығырчабыс.
