Істезіглер хоостыра, адайлар пасха адайларны чыстап, чиит алай кирі, іргек алай тізі адай ба піл салчалар паза оларның кӧңнілерін дее сизін салчалар. Ӧнетін ӱгреділген адайлар, чыстап, взрывчаткаларны паза наркотиктерні таап алчалар. Кізі ибіре прай нимені кӧріп танып салча, адай тізең, чыстап прай нимені таныпча. Адай кӧбізін тунҷуғына ізенче.

Хайығ айландырыңар. Кізінің хыринда адай муңар хати чыссырах. США-ның стандарттар паза технологиялар хоостыра национальнай институдының істезіглері кӧзітчелер: адайлар «пірее нимені триллионның аразында чыстап сизін салчалар. Анзын олимпийскай бассейнге кічиҷек сомнахтың тӧртінҷі чардығынҷа сахар салыбысса, аның тадиин сизін салғанынаң тиңнестірерге чарир».

Ноға адай андағ чыссырах?

• Адайның тунҷуғы ӧл, аннаңар ол чысты чахсы сизінче.

• Адай ікі пасха воздуховоднаң тузаланча: пірсінең ол тынча, пірсінең чыстапча. Адай кии тартынчатса, кии аның тунҷуғының істіндегі чыстаҷаң рецепторларзар кірче.

• Адайның тунҷуғындағы рецепторларның площадьы 130 квадратнай сантиметрҷе алай аннаң даа кӧп полча, кізінің, тізең, 5 ле.

• Адайның чыс пілчеткен клеткалары кізінинең 50 дее хати кӧп полча.

Прай пу нимелернің сылтаанда адай хадыл чыстарның аразында хайдағ-да чысты таап алча. Кӧзідімге, піс ӱгренің чызын таныпчабыс. Пірее специалисттер адай ӱгрее салған нимелернің полғанының на чызын сизінче тіп санапчалар.

«Пайн-стриттің» (Pine Street Foundation), онкологияны істесчеткен кіннің учёнайлары адайның миизі паза тунҷуғы чир ӱстӱндегі чыс пілҷең устройстволарның иң артых устройствозы тіпчелер. Пӱӱн специалисттер электроннай «тунҷухтар» идіп аларға кӱстенчелер. Андағ устройстволарнаң взрывчаткаларны, контрабандаларны паза ағырығларны, ракты даа, табарында тузаланарлар.

Хайди сағынчазар? Адайның чыссырах тунҷуғын эволюция ит салған ма алай аны хыйға Чайаачы чайап салған ма?